"އެވެޓާ 2" އިން ޒޯއީ އަށް ބޮކްސް އޮފީހުގެ ތާރީހީ ރެކޯޑެއް

މި ހަފްތާގައި ފިލްމުގެ ޖުމްލަ އާމްދަނީ ދެ ބިލިއަން ޑޮލަރު ހުރަސްކުރި "އެވަޓާ: ދަ ވޭ އޮފް ވޯޓާ" ގެ އެއް ލީޑް، "ނޭޓިރީ" ގެ ރޯލުން ފެންނަ ޒޯއީ ސަލްޑާނާ އަށް، ތާރީހުގައި މިހާތަނަށް އެއްވެސް އެކްޓަރަކަށް ހާސިލްނުވެ އޮތް ބޮކްސް އޮފީސް ރެކޯޑެއް ލިބިއްޖެ އެވެ.

އެއީ މިހާތަނަށް ދެ ބިލިއަން ޑޮލަރުގެ އާމްދަނީއެއް ހޯދި އެންމެ ގިނަ ފިލްމުތަކުގައި އުޅުނު ހަމައެކަނި އެކްޓަރުގެ ލަގަބެވެ. މިއީ ހޮލީވުޑްގެ އިތުރުން މުޅި ދުނިޔޭގެ ފިލްމީ ތާރީހުގައި ވެސް ނުލިބޭ ޝަރަފެކެވެ.

"އެވަޓާ 2" އަކީ މިހާތަނަށް ސިނަމާގެ ތާރީހުގައި ދެ ބިލިއަން ޑޮލަރަށް ވުރެ އިތުރަށް ބޮކްސް އޮފިސް އާމްދަނީ އެއް ލިބުނު ހަ ވަނަ ފިލްމެވެ. އެ ފިލްމުގެ އިތުރުން، މިހާތަނަށް އެންމެ ބޮޑު ބޮކްސް އޮފިސް އާމްދަނީ އެއް (2.9 ބިލިއަން ޑޮލަރު) ހޯދި، އެވަޓާގެ ފުރަތަމަ ބައިގެ މެއިން އެއް ކެރެކްޓަ ނޭޓިރީގެ ރޯލް ވެސް ކުޅުނީ ޒޯއީ އެވެ.

އެވަޓާ ދެ ފިލްމުގެ އިތުރުން ޒޯއީ ކުޅުނު ދެ ބިލިއަން ޑޮލަރުގެ ފިލްމުތަކަކީ މާވެލް ސިނަމެޓިކް ޔުނިވާސް (އެމްސީޔޫ) ގެ "އެވެންޖާސް: އިންފިނިޓީވާ" (2.05 ބިލިއަން ޑޮލަރު) އަދި "އެވެންޖާސް: އެންޑްގޭމް" (2.7 ބިލިއަން ޑޮލަރު) އެވެ.

"އެވެންޖާސް"ގެ އެންމެ ފަހު އެ ދެ ފިލްމުގެ ލީޑު ރޯލަކުން ނުފެނުނަސް، ޒޯއީގެ ކެރެކްޓަ "ގަމޯރާ" ވަނީ މުހިންމު ރޯލެއް ދެ ފިލްމުގައި ވެސް އަދާކޮށްފަ އެވެ.

އެވަޓާ ސީކުއެލްގެ ތިން ވަނަ ފިލްމު ކުރިއަށް އޮތީ އެވެ. އެ ފިލްމުން ވެސް ޒޯއީ ފެންނާނެ ކަމަށް ގިނަ ބަޔަކު އަންނަނީ އުންމީދުކުރަމުންނެވެ.