ބޮކްސް އޮފީސް: ފުރަތަމަ ދުވަހު "ލިޓްލް މާމެއިޑް" އަށް 38 މިލިއަން ޑޮލަރު

ޑިޒްނީގެ ލައިވް-އެކްޝަން ފިލްމު "ދަ ލިޓްލް މާމެއިޑް" ޕްރިމިއާކުރި ފުރަތަމަ ދުވަހު 38 މިލިއަން ޑޮލަރުގެ އާމްދަނީއެއް ލިބިއްޖެ އެވެ.

"ވެރައިޓީ" ނޫހުން ބުނި ގޮތުގައި، މި އަދަދާ އެކު އެ ފިލްމު މިހާރު ވަނީ ބައިނަލްއަގްވާމީ ބޮކްސްއޮފީހުގެ އެއް ވަނަ އަށް އަރައިފަ އެވެ.

އެ ފެންޓަސީ ފިލްމު ވަނީ މިދިޔަ ހުކުރު ދުވަހު 4،320 ތިއޭޓަރުގައި އަޅުވައިފަ އެވެ. އަދި ލަފާކުރެވޭ ގޮތުގައި ފުރަތަމަ ހަތަރު ދުވަސް ތެރޭ 120 މިލިއަން ޑޮލަރާއި 130 މިލިއަން ޑޮލަރުގެ އާމްދަނީއެއް ހޯދާނެ އެވެ.

ހާލީ ބެއިލީ ލީޑުން ފެންނަ އެ ފިލްމު އެޅުވުމުގެ ކުރިން ޕްރިވިއުގެ ގޮތުގައި ވެސް ވަނީ 10 މިލިއަން ޑޮލަރު ލިބިފަ އެވެ. މި ފިލްމުގެ މަސައްކަތަށް 250 މިލިއަން ޑޮލަރު ހަރަދުކޮށްފައިވާއިރު، ރަނގަޅު ފައިދާއެއް ބޭނުން ނަމަ ބޮކްސް އޮފީހުގައި ކާމިޔާބު ހޯދަން މަޖުބޫރެވެ.

ރޮބް މާޝަލް ޑައިރެކްޓުކޮށްފައިވާ "ދަ ލިޓްލް މާމެއިޑް" ގެ މިއުޒިކަލް ރިމޭކަށް މާބޮޑު ތަރުހީބެއް ރިވިއުތަކަށް ބަލާ ނަމަ ނުލިބެ އެވެ. ފިލްމު އެޅުވިތާ ދެވަނަ ދުވަހު ރޮޓެން ޓޮމާޓޯސްގައި އަދި އެ ފިލްމުގެ ރޭޓިން އުޅެނީ 66 ޕަސެންޓުގަ އެވެ. މި އަދަދު މަތިވުން އެކަށީގެންވާ ކަމަށް ރިޕޯޓުތައް ބުނެ އެވެ.