ފަލަސްތީނުގެ ރައީސަށް ދިވެހި ސަފީރަކު ފުރަތަމަ ފަހަރަށް ފަތްކޮޅު އަރުވައިފި

ދިވެހިރާއްޖެ އިން ފުރަތަމަ ފަހަރަށް ފަލަސްތީނަށް ކަނޑައެޅި ސަފީރު، އެ ގައުމުގެ ރައީސް މަހްމޫދު އައްބާސަށް ސަފީރުކަމުގެ ފަތްކޮޅު އަރުވައިފި އެވެ.

ރާއްޖެއިން ފަލަސްތީނަށް ކަނޑައަޅާ ނޮން ރެސިޑެންޓް ސަފީރުގެ މަގާމަށް އައްޔަން ކުރައްވާފައިވާ މުހައްމަދު ހަލީލް އޭނާގެ ސަފީރުކަމުގެ ފަތްކޮޅު މަހްމޫދް އައްބާސަށް އިއްޔެ އެރުއްވީ އުރުދުންގައި ހުންނަ ފަލަސްތީނު އެމްބަސީގައި ބޭއްވި ރަސްމިއްޔާތެއްގަ އެވެ.

މިއީ ރާއްޖެއިން 1982 ވަނަ އަހަރު ފަލަސްތީނާ އެކު ސިޔާސީ ގުޅުން ގާއިމްކުރި ފަހުން ރާއްޖޭގެ ސަފީރަކު ފަލަސްތީނުގެ ރައީސަކަށް ފަތްކޮޅު އެރުވި ފުރަތަމަ ފަހަރެވެ.

ނަމަވެސް ކުރީގެ ރައީސް މުހައްމަދު ނަޝީދުގެ ސަރުކާރުން 2011 ގައި ރާއްޖެ އިން ފަލަސްތީނަށް ކަނޑައަޅާ ސަފީރަކަށް ޑރ. ފަރަހަނާޒް ފައިސަލް އައްޔަންކުރި އެވެ. އެކަމަކު އޭނާގެ ފަތްކޮޅު ފަލަސްތީނުގެ ރައީސް މަހުމޫދު އައްބާސަށް އެރުވުމުގެ ކުރިން 2012 ގައި ނަޝީދު ސަރުކާރު ކުއްލި ގޮތަކަށް ބަދަލުވެ، ފަރަހަނާޒް މަގާމުން އިސްތިއުފާ ދެއްވީ އެވެ. އެހެންވެ، ފަލަސްތީނުގެ ރައީސަށް ފަރަހަނާޒްގެ މަގާމުގެ ފަތްކޮޅު އޭރު ނޭރުވުނީ އެވެ.

އިއްޔެގެ ރަސްމިއްޔާތުގައި މަހްމޫދް އައްބާސް ދެއްކެވި ވާހަކަފުޅުގައި، ފަލަސްތީނުގައި މިނިވަން ދައުލަތެއް ގާއިމްކުރަން ރާއްޖެއިން ކުރަމުން ގެންދާ މަސައްކަތަށާއި އަދި ފަލަސްތީނު ރައްޔިތުންގެ ހައްގުތައް ހިމާޔަތްކުރަން ރާއްޖެ އިން ވަކާލާތު ކުރާތީ އެކަމަށް ޝުކުރު އަދާކުރެއްވި އެވެ.

ރައީސް އިބްރާހިމް މުހައްމަދު ސޯލިހް ފަލަސްތީނާ މެދު ބަހައްޓަވާ ގާތްކަން ފާހަގަ ކުރައްވައި، އެ މަނިކުފާނަށް ވެސް މަހްމޫދު އައްބާސް ޝުކުރު އަދާކުރެއްވި އެވެ.

ސަފީރު ހަލީލުގެ ވާހަކައިގައި، ފަލަސްތީނުގައި މިނިވަން ދައުލަތެއް ގާއިމްކޮށް، އިރުމަތީ ގުދުސްއަކީ އެ ގައުމުގެ ވެރިރަށް ކަމުގައި ހަދަން ރާއްޖެ އިން އަބަދުވެސް ވަކާލާތު ކުރާނެ ކަމަށް ވިދާޅުވި އެވެ. އަދި ފަލަސްތީނާ މެދު ދިވެހިންގެ ހިތުގައި ހާއްސަ ކަމެއް އަބަދުވެސް އޮންނަކަން އޭނާ ފާހަގަ ކުރެއްވި އެވެ.

ފަލަސްތީނުގެ ބިންތަކަށް އިޒްރޭލުން ވެރިވެ ހިންގަމުންދާ ޖަރީމާތަކާ ގުޅިގެން ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގެ ކުރީކޮޅުން ފެށިގެން ރާއްޖެއިން އޮތީ އިޒްރޭލާ ގުޅުން ކަނޑާލައިފަ އެވެ.