އައިލެންޑް އޭވިއޭޝަން މުވައްޒަފުންގެ މުސާރަ ބޮޑުކޮށްދީ، ލޯން ސްކީމެއް ތައާރަފް ކުރަނީ

އައިލެންޑް އޭވިއޭޝަން ސާވިސަސް (އައިއޭއެސް) މުވައްޒަފުންގެ އަސާސީ މުސާރަ ބޮޑުވާނެ ކަމަށް އެ ކުންފުނީގެ މެނޭޖިން ޑިރެކްޓަރު މުހައްމަދު މިހާދު ރޭ ވިދާޅުވެއްޖެ އެވެ.

އެ ކުންފުނީގެ މުވައްޒަފުންނަށް ހާއްސަކޮށް ބޭއްވި "ސްޓާފް އެނުއަލް ނައިޓު"ގައި އޭނާ ވިދާޅުވީ، އަންނަ މަހު މުސާރައަށް ގެންނަ ބަދަލާ އެކު ޕެންޝަނަށް ރައްކާކުރާ ވަރު މިހާރަށް ވުރެ އިތުރު ކުރެވޭނެ ކަމަށެވެ. ކޮވިޑާ ގުޅިގެން އެ ކުންފުނީގެ މުވައްޒަފުންނަށް ދެމުން އައި ބައެއް އެލަވަންސްތައް ދިނުން ހުއްޓާލި ނަމަވެސް، އެ އެލަވަންސްތައް ވެސް އަލުން ދޭން ނިންމާފައިވާ ކަމަށް ވިދާޅުވި އެވެ.

މިހާދު ވިދާޅުވީ، މި ލޯން ސްކީމުގެ ދަށުން މުވައްޒަފުންނަށް 25،000ރ. އާއި 50،000ރ. އާ ދެމެދުގެ އަދަދެއް ނެގޭނެ ކަމަށެވެ.

އޭނާ ވިދާޅުވި ގޮތުގައި ދަތުރުތަކުގައި ދައްކާ ފިއުލް ޗާޖު ވެސް އެ ކުންފުނީގެ މުވައްޒަފުންނަށް އަންނަ މަހުން ފެށިގެން ކަނޑާލަން ވެސް ވަނީ ހަމަޖެހިފަ އެވެ.

"ޖެނެރަލް ކޭޑާގައި ހިމެނޭ މުވައްޒަފުންގެ މުސާރަތައް ހާމަނައިޒްކޮށް މި އަހަރުގެ މާޗް 1 އިން ފެށިގެން މުސާރައަށް ހެޔޮ ބަދަލެއް ގެނެވިގެންދާނެ. އަސާސީ މުސާރައަށް ރަނގަޅު ބަދަލެއް އައިސް ޕެންޝަނަށް ރައްކާ ކުރެވޭ ފައިސާ އިތުރުވެގެންދާނެ،" އޭނާ ވިދާޅުވި އެވެ

އޭނާ ވިދާޅުވީ އެ ކުންފުނީގައި މަސައްކަތް ކުރުމަށް ފަހު ވަކިވާ މުވައްޒަފުން އަލުން ކުންފުންޏާ ގުޅިއްޖެ ނަމަ، އެ މުވައްޒަފެއްގެ މަސައްކަތުގައި ހޭދަކުރާ ޖުމްލަ އަހަރު ގުނާނީ އެންމެ ފުރަތަމަ އެ މުވައްޒަފަކު މަސައްކަތް ކުރަން ފެށި ތާރީހުން ފެށިގެން ކަމަށެވެ.

"މި ބަދަލު ގެނައުމުގެ ބޭނުމަކީ އެ މުވައްޒަފަކު މި ކުންފުނިން ވަކި ވުމުގެ ކުރިން އަދާކޮށްދެއްވި މަސައްކަތުގެ އަގު ވަޒަން ކުރުން. މީގެ އިތުރުން ހަމަޖެހިފައިވާ އުސޫލުގެ ތެރެއިން އެއްވެސް އިންޓްރެސްޓަކާ ނުލާ ކުންފުނީގެ މުވައްޒަފުންނަށް ލޯން ސްކީމެއް ތައާރަފް ވެގެންދާކަން ވަރަށް އުފަލާ އެކު އިއުލާނު ކުރަން،" އޭނާ ވިދާޅުވި އެވެ.