މޯލްޑިވިއަންގެ އެއާބަސްގެ ޓެކްނިކަލް މައްސަލައާ ހެދި ޑާކާގެ ދަތުރު ކެންސަލް!

މޯލްޑިވިއަން އެއާލައިންގެ އެއާބަސް ބޯޓަށް އަނެއްކާވެސް ޓެކްނިކަލް މައްސަލައެއް ދިމާވެ، ބަންގްލަދޭޝްގެ ޑާކާ އަށް މިއަދު ކުރަން އޮތް ދަތުރު ކެންސަލް ކޮށްފި އެވެ.

އެ އެއާލައިނުން ބުނީ، ދެ ދަތުރު ކެންސަލްކުރީ، އެއާބަސް ބޯޓަށް ދިމާވި މައްސަލައަކާ ގުޅިގެން ކަމަށެވެ. ޑާކާގެ އެ ދެ ދަތުރު ކެންސަލް ކުރި ނަމަވެސް، މޯލްޑިވިއަންގެ އެހެން މަންޒިލްތަކަށް ކުރާ ދަތުރުތަކާއި ޑާކާއަށް ޝެޑިއުލްކޮށްފައިވާ ދަތުރުތައް ޝެޑިއުލާ އެއްގޮތަށް ކުރިއަށް ދާނެ ކަމަށް މޯލްޑިވިއަން އިން ބުންޏެވެ.

މީގެ ހަފުތާއެއް ކުރިން، އެއާބަސް އަށް ޓެކްނިކަލް މައްސަލައެއް ދިމާވެ، އިންޑިއާގެ ޓްރިވެންޑްރަމަށް ކުރަން އޮތް ދަތުރެއް ވެސް ވަނީ މޯލްޑިވިއަން އިން ކެންސަލް ކޮށްފަ އެވެ.

މޯލްޑިވިއަން އިން ބުނީ، ޑާކާ އަށް އެ އެއާލައިނުން ދާން ކަނޑައެޅި ދަތުރު ކުރުމާއި ތާށިވި މީހުން އެހެން އެއާލައިންތައް މެދުވެރިކޮށް ދަތުރުތައް ހަމަޖައްސައި ދެމުން އަންނަ ކަމަށެވެ.

މޯލްޑިވިއަން އިން މިވަގުތު އިންޑިއާގެ ކޮޗިން އާއި ޓްރިވެންޑްރަމަށް ބާއްވަނީ އޭޓީއާރް ބޯޓުތަކެވެ.

އެއާބަސް އޭ320 ގެ ބޯޓެއް މޯލްޑިވިއަން އިން ގެންގުޅޭއިރު، ކުރިން ދުއްވި އޭ321 މަރުކާގެ ބޯޓު ވަނީ މުއްދަތު ހަމަވުމުން 2022 ވަނަ އަހަރު ފޮނުވާލައިފަ އެވެ. އެ އެއާލައިނުން އަންނަނީ އާ ދެ އެއާބަސް ހޯދުމަށް މަސައްކަތް ކުރަމުންނެވެ. ޓްރާންސްޕޯޓް މިނިސްޓަރު މުހައްމަދު އަމީން ވަނީ މި އަހަރު ނިމުމުގެ ކުރިން އެ ދެ ބޯޓު ހޯދާނެ ކަމަށް މީގެ ކުރިން ވިދާޅުވެފަ އެވެ.

މޯލްޑިވިއަންގެ ފްލީޓުގައި މި ވަގުތު 23 ބޯޓު އެބަ އޮތެވެ. އޭގެ ތެރޭގައި އޭޓީއާރް ހަތަރު ބޯޓުވެސް ހިމެނެ އެވެ.