ޗުއްޓީއާ ދިމާކޮށް މޯލްޑިވިއަނުން 98 ފްލައިޓް އިތުރުކޮށްފި

ސްކޫލް ބަންދާއި އާ އަހަރުގެ ޗުއްޓީއާ ދިމާކޮށް ގައުމީ އެއާލައިން، މޯލްޑިވިއަނުން 98 ފްލައިޓް އިތުރުކޮށްފި އެވެ.

އެ އެއާލައިންގެ އޮފިޝަލަކު "މިހާރު" އަށް މިއަދު ވިދާޅުވީ މި މަހުގެ 18 ވަނަ ދުވަހުން ފެށިގެން މިހާތަނަށް 98 ފްލައިޓު އިތުރު ކޮށްފައިވާ ކަމަށެވެ. އެއީ ސީދާ ޗުއްޓީ ދުވަސްވަރާ ދިމާކޮށް އިތުރުކުރި ފްލައިޓުތައް ކަމަށް އޮފިޝަލް ވިދާޅުވި އެވެ.

މޯލްޑިވިއަން އެއާލައިނުން އެތެރޭގެ އަދި ބައިނަލްއަގްވާމީ މަންޒިލުތަކަށް ވެސް ފްލައިޓުތައް އިތުރުކޮށްފައިވެ އެވެ.

މޯލްޑިވިއަނުން އިތުރުކުރާ ފްލައިޓުތަކުގެ މައުލޫމާތު އެ އެއާލައިންގެ ސޯޝަލް މީޑިއާ ޕްލެޓްފޯމުތަކުގައި އަންނަނީ ޕޯސްޓުކުރަމުންނެވެ.

އެ އެއާލައިނުން މިއަދު ވަނީ މާލެއިން ޓްރިވެންޑްރަމަށް ދަތުރުުކުރާ މީހުންނަށް ލިމިޑެޓް އޮފާއެއް ވެސް ހުޅުވާލައިފަ އެވެ. އަންނަ މަހު އަށަކާ ހަމައަށް ހުޅުވާލާފައިވާ އެ އޮފާގެ ދަށުން ދިވެހިންނަށް ކޮޅަކަށް 184 ޑޮލަރަށް އަދި ބިދޭސީންނަށް ކޮޅަކަށް 260 ޑޮލަރަށް ޓިކެޓް ލިބޭނެ އެވެ.

ސްކޫލް ބަންދާއި އާ އަހަރުގެ ބަންދާ ދިމާކޮށް މި ދުވަސްވަރު އެއާޕޯޓަށް ވެސް ވަރަށް ބާރުބޮޑެވެ. ޑޮމެސްޓިކް އަދި އިންޓަނޭޝަނަލް ދަތުރުތައް ވެސް ވަރަށް ގިނަ އެވެ.

މޯލްޑިވިއަނުން މިހާރު ތައްޔާރުވަމުން އަންނަނީ އެ އެއާލައިންގެ ފުރަތަމަ ފުރަތަމަ ވައިޑް ބޮޑީ އެއާކްރާފްޓު އަންނަ މަހު ގެނެސް ދަތުރުތައް ފެށުމަށެވެ. އެ އެއާކްރާފްޓު ގެނައުމާ އެކު، ޗައިނާ އާއި ޔޫރަޕްގެ މަންޒިލްތަކަށް މޯލްޑިވިއަނުން އަންނަ އަހަރު ދަތުރުތައް ފަށާނެ އެވެ.