ޗައިނާގެ ތިން ސިޓީއަށް މޯލްޑިވިއަނުން އަގު ހެޔޮ ދަތުރުތަކެއް

ގައުމީ އެއާލައިން، މޯލްޑިވިއަންގެ ފްލައިޓުތައް އޮޕަރޭޓުކުރާ ޗައިނާގެ ތިން ސިޓީއަށް ވެސް ޓިކެޓު އަގޮހެޔޮކޮށް، ޕްރޮމޯޝަނެއް ފަށައިފި އެވެ.

މޯލްޑިވިއަން ހިންގާ އައިލެންޑް އޭވިއޭޝަނުން ބުނީ އެ އެއާލައިނުން ދަތުރުކުރާ ޗައިނާގެ ބެއިޖިން އާއި ޗެންގްޑޫ އަދި ޝަންހާނީ އަށް މި ޕްރޮމޯޝަންގައި އަގު ހެޔޮކޮށް ޓިކެޓް ލިބޭނެ އެވެ. މި ޕްރޮމޯޝަން ކުރިއަށް ގެންދަނީ 28 އޮކްޓޯބަރުން 15 ނޮވެމްބަރުގެ ނިޔަލަށެވެ.

މި ޕްރޮމޯޝަންގައި މާލޭން މި ތިން ސިޓީއަށް ދަތުރުކުރާއިރު، ދެކޮޅު ޓިކެޓު 499 ޑޮލަރަށް ލިބޭނެ އެވެ.

އައިލެންޑް އޭވިއޭޝަނުން ބުނީ، މި ސިޓީއަށް ކުރާ ދަތުރުތަކާއި އެނބުރި އަންނަ ފްލައިޓުތައް ވެސް ޝެޑިއުލްކޮށްފައިވަނީ ޗުއްޓީ ހޭދަކުރަންދާ އާއިލާތަކަށާއި، ވިޔަފާރިވެރިންނަށް ވެސް އެންމެ ފަސޭހަވާނެ ގޮތަށެވެ.

މިގޮތުން، މާލެއިން ކުރާ ދަތުރުތައް ހެނދުނަށް ތާވަލުކޮށްފައިވަނީ، ޗައިނާއަށް އެ ދުވަހެއްގެ ހެނދުނު ދެވޭ ގޮތަށެވެ. އެނބުރި ރާއްޖެއަށް އަންނަ ފްލައިޓުތައް ޝެޑިއުލްކޮށްފައިވަނީ މާލޭ ގަޑިން ހެނދުނަށް ކަމަށްވާތީ، ޑޮމެސްޓިކް ފްލައިޓު ޝެޑިއުލްތަކަށް ވެސް ފަސޭހަވާނެ ކަމަށް އެ ކުންފުނިން ބުންޏެވެ.

މި ޕްރޮމޯޝަން މައިގަނޑު ގޮތެއްގައި އަމާޒުކޮށްފައިވަނީ ދިވެހިންނަށް ކަމަށްވާއިރު، ޗައިނާއަށް އެތެރެވާ ދިވެހިންނަށް 30 ދުވަހުގެ އޮން-އެރައިވަލް ވިސާ ލިބެ އެވެ.

ޗައިނާގެ މި ތިން ސިޓީއަށް ވެސް މޯލްޑިވިއަނުން ދަތުރު ކުރަނީ، އެންމެ ފަހުން ގެނައި ވައިޑް ބޮޑީ އެއާކްރާފްޓް އޭ330 މަތިންދާބޯޓުގަ އެވެ.