ބްރިޖްގެ ހައިވޭގައި އެކްސިޑެންޓެއްގައި މީހަކަށް ސީރިއަސް އަނިޔާތަކެއް

ސިނަމާލެ ބްރިޖުގެ ހައިވޭގައި މީގެ އިރުކޮޅެއް ކުރިން ހިނގި އެކްސިޑެންޓެއްގައި ސީރިއަސް ޒަހަމްތަކެއް ލިބުނު މީހަކަށް ފަރުވާ ދޭން ފަށައިފި އެވެ.

އައިޖީއެމްއެޗްގެ މީޑިއާ އޮފިޝަލަކު ވިދާޅުވީ އެކްސިޑެންޓުގައި އަނިޔާވި ފިރިހެނަކު މީގެ ކުޑައިރުކޮޅެއް ކުރިން އެ ހޮސްޕިޓަލަށް ގެންގޮސް އިމަޖެންސީގައި ފަރުވާ ދެމުން އަންނަ ކަމަށެވެ.

އެ މީހާގެ ހާލު ވަރަށް ކްރިޓިކަލް ކަމަށް ވިދާޅުވިއަސް އިތުރު ތަފްސީލެއް ނުދެއްވަ އެވެ. އެހެންވެ، އެ މީހާގެ އުމުރެއް ވެސް ސާފެއް ނުވެ އެވެ.

މި އެކްސިޑެންޓާ ގުޅޭ އިތުރު މައުލޫމާތެއް ނުލިބެ އެވެ. އެކަމަކު، ސޯޝަލް މީޑިއާގައި ދައުރުވަމުންދާ ފޮޓޯތަކުން އެނގޭ ގޮތުގައި އެކްސިޑެންޓުވެފައި ވަނީ ހުޅުމާލެއިން މާލެއަށް ދަތުރުކުރި ކާރަކާއި ސައިކަލެއް ޖެހިގެންނެވެ.