"ސާޖިންއާއެކު އުތުރުން ދެކުނަށް" ސްޕޮންސަރުންނާއި ޕާޓްނަރުންނާއެކު ސޮއިކޮށްފި

ޒުވާން މަސްވެރިޔާގެ ނަމުން މަޝްހޫރު ހަސަން ސާޖިން، ރާއްޖޭގެ ހުރިހާ ރަށްތަކަށް ކުރާ ދަތުރުގެ ސްޕޮންސަރުންނާއި ޕާޓްނަރުންނާ އެކު ސޮއިކޮށްފި އެވެ.

"ސާޖިންއާ އެކު އުތުރުން ދެކުނަށް" ކުރާ ދަތުރުގައި ރާއްޖޭގެ މީހުން ދިރިއުޅޭ ހުރިހާ ރަށަކަށް އޭނާ ދާނެ އެވެ. ރަށްރަށުގެ މަސްވެރިންނާ އެކު މަހަށް ގޮސް، ދަނޑުވެރިންނާ އެކު ދަނޑަށް ވެސް ދާނެ އެވެ. އެއިން ކޮންމެ ރަށެއްގެ ދިރިއުޅުން ކެމެރާ އަށް ނަގައި ސޯޝަލް މީޑިއާގައި ހިއްސާ ކުރާނެ އެވެ.

މި ދަތުރުގެ މެއިން ސްޕޮންސަރަކީ ވިލާ ކުންފުންޏެވެ. ޕާޓްނަރުންނަކީ އެސްޑީއެފްސީ، ނޫރާއްޖެ، އެލައިޑް އަދި ވިޒިޓް މޯލްޑިވްސް އެވެ. މީޑިއާ ޕާޓްނަރަކީ "މިހާރު" އެވެ.

ސާޖިން ބުނީ މި ދަތުރުތަކުގެ ސަބަބުން ރާއްޖޭގެ މަސްވެރިކަމުގެ އިތުރުން ޓޫރިޒަމް ވެސް ވަރަށް ބޮޑަށް ބޭރު ދުނިޔޭގައި ޕްރޮމޯޓް ވާނެ ކަމަށެވެ.

"މި ދަތުރު ކުރަން އެންމެ ބޭނުންވީ ރާއްޖޭގެ ކޮންމެ ރަށަކީ ވެސް ތަފާތު ރަށެއްކަން ރާއްޖެ އާއި ބޭރުގެ މީހުންނަށް ދައްކުވައިދޭން ސޯޝަލް މީޑިއާ މެދުވެރިކޮށް. ދުނިޔޭގެ އެންމެނަށް ދިވެހިރާއްޖެ ދައްކަން ބޭނުންވަނީ،" ސާޖިން ބުންޏެވެ.

މި ދަތުރުތައް މިދިޔަ 2021 ވަނަ އަހަރު ފެށުމަށް ނިންމި ނަމަވެސް އެކި ކަންކަމާހުރެ ލަސްވެގެން ދިޔަ ކަން އޭނާ ފާހަގަ ކުރި އެވެ.

"އެންމެ ފުރަތަމަ ސްޕޮންސަރުން ހޯދަން އުޅެ ލަސްވި ލަސްވުން، ދެން ރައްޓެއްސެއްގެ ބައްޕަގެ ސަފާރީއެއް ތިލަކުރަން އުޅެނިކޮށް ފައި ބިންދައިގެން ގޮސްގެން. އެކަމަށް ވެސް އެހާ ދުވަސް ނެގި."

ގިނަ ގޮންޖެހުނަތަކާ އެކު ވެސް، 2018 ވަނަ އަހަރުން ފެށިގެން ދެކެމުން އައި ހުވަފެން ހަގީގަތަކަށް ވުމުން އޭނާ ވަނީ ސްޕޮންސަރުންނާއި ޕާޓްނަރުންނަށް ހާއްސަ ޝުކުރެއް އަދާކޮށްފަ އެވެ.