ބެކަމްގެ ދަރިފުޅުގެ ކުޅުން ބަލަން ރެކޯޑް އަދަދަކަށް ސަޕޯޓަރުން

ލަންޑަން (ޖެނުއަރީ 12) - ދާދި ފަހުން ލޯނު އުސޫލުން އިނގިރޭސި ޕްރިމިއާ ލީގުގެ ކްލަބް ބްރެންޓްފޯޑްގެ ބީ ޓީމާ ގުޅުނު އިންގްލެންޑްގެ ކުރީގެ ކެޕްޓަން ޑޭވިޑް ބެކަމްގެ ދަރިފުޅު، ރޯމިއޯ ބެކަމް ކުޅުނު ފުރަތަމަ މެޗު ބަލަން ކުލަބުގެ ރެކޯޑް އަދަދަކަށް ސަޕޯޓަރުން ވަނީ ދަނޑަށް ވަދެފަ އެވެ.

ބްރެންޓްފޯޑް ބީ ޓީމުން ލަންޑަން ސީނިއާ ކަޕް ގައި ރަށުން ބޭރުގައި، އެރިތު އެންޑް ބެލްވެޑަޔާއާ ދެކޮޅަށް ކުޅުނީ ޕާކް ވިއު ރޯޑް ގަ އެވެ. އިނގިރޭސި ނުވަވަނަ ޑިވިޝަންގެ އެރިތު އެންޑް ބެލްވެޑަޔާ ގެ ދަނޑަށް، ޑޭވިޑް ބެކަމް އާ އެކު 554 ސަޕޯޓަރުން ދިޔަ އެވެ.

ރޯމިއޯ ކުޅެން އެރީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގަ އެވެ. މެޗުގެ 55 ވަނަ މިނިޓުގައި އޭނާ ކުޅެން އެރި އިރު 2-1 އިން ބްރެންޓްފޯޑް އޮތީ ފަހަތުގަ އެވެ. ނަމަވެސް އެ ޓީމު މެޗު ނިންމާލީ 3-2 އިން މޮޅުވެ، މުބާރާތުގެ ކުއާޓާ ފައިނަލުން ޖާގަ ހޯދައިގެންނެވެ.

ކުޅެން އަރައި ރޯމިއޯ ވަނީ ބައްޕައެކޭ އެއްގޮތަށް ކަނާތް ފަޅިން ރީތި ހުރަހެއް އޭރިއާ ތެރެއަށް ހުރަސް ކޮށްލައިފަ އެވެ. އިދިކޮޅުން ކުޅުނު ޓީމުގެ ޓްވިޓާ އެކައުންޓުގައި ވަނީ އެކަން ފާހަގަ ކޮށްފަ އެވެ. މީގެ އިތުރުން އޭނާ ބޮލުން ފޮނުވާލި ހަމަލާއެއް ގޯލުގެ ހުރަސް ދަނޑިއަށް ވެސް އަމާޒު ވިއެވެ.

ރޯމިއޯގެ ފުރަތަމަ މެޗުގެ ކުޅުމާ މެދު ބްރެންޓްފޯޑް ބީ ޓީމުގެ ކޯޗު ނީލް މެކްފާލޭން ހުރީ ވަރަށް ބޮޑަށް ހިތްހަމަ ޖެހިފަ އެވެ.

"ރޯމިއޯ ވަނީ ވިންގް ބެކް މަގާމަށް ކުޅެމުން ޓީމު ވަރަށް ބޮޑަށް ކުރިއަށް ޖައްސާލައިފައި. އޭނާ ވަނީ ވަރަށް ރަނގަޅު ވަގުތުތަކެއް ގެނެސްދީ ވަރަށް ރީތި ބޯޅަތަކެއް ފޯރު ކޮށްދީފައި،" މެކްފާލޭން ބުންޏެވެ.

"އޭނާ އަށް ގޯލު ޖަހަން ވެސް ފުރުސަތެއް ލިބުނު، އަހަރެންނަށް ވެސް ފޯރި އެރި، މުޅި ޓީމު ވެސް އެންމެ ފަހު ވަގުތާ ޖެހެންދެން ހިތްވަރު އެލުވާނުލައި މަސައްކަތް ކޮށްގެން ނަތީޖާ ނެރުނީމައި އަހަރެން މިހުރީ ވަރަށް އުފާވެފައި."

ބްރެންޓްފޯޑް ބީ ޓީމަކީ ލަންޑަން ސީނިއާ ކަޕް އެންމެ ފަހުން ކާމިޔާބުކުރި ޓީމެވެ.

ރޯމިއޯ ވަނީ ކުރިން އާސެނަލްގެ އެކަޑަމީގައި ވެސް ކުޅެފަ އެވެ. އެމެރިކާގައި ބެކަމްގެ ހިއްސާ އޮންނަ އިންޓަ މިއާމީ ގެ ރިޒާވް ޓީމަށް ކުޅޭ ރޯމިއޯ، ލޯނު އެއްބަސްވުމެއްގެ ދަށުން ބްރެންޓްފޯޑަށް ބަދަލުވީ މި ސީޒަންގެ ނިޔަލަށެވެ.