ބެކަމްގެ ދޮށީ ދަރިފުޅަށް މިލިއަން ޕައުންޑްގެ ޑީލެއް ލިބުމުން ފާޑު ކިޔަނީ

އިނގިރޭސިވިލާތުގެ ކުރީގެ މަޝްހޫރު ފުޓްބޯޅަ ތަރި، ޑޭވިޑް ބެކަމްގެ ދޮށީ ފިރިގެން ދަރިފުޅު ބްރުކްލިން ބެކަމަށް މަޝްހޫރު ފެޝަން ކުންފުންޏަކުން މިލިއަން ޕައުންޑްގެ އަގަކާ އެކު އެމްބެސެޑަރުކަން ދިނުމުން ގިނަ ބައެއްގެ ފާޑުކިޔުންތައް އަމާޒުވެއްޖެ އެވެ.

މީޑިއާތަކުން ބުނި ގޮތުގައި ސްޓްރީޓްވެއާ ބްރޭންޑެއްގެ ގޮތުގައި މަޝްހޫރު ކުންފުނި، "ސުޕަޑްރައި" ގެ އުފެއްފުންތައް ބްރުކްލިން، 22، އާ އެކު ރަސްމީކޮށް ލޯންޗް ކުރާނީ މިއަދު އޮކްސްފޯޑް ސްޓްރީޓްގައި ބާއްވާ ހާއްސަ ހަރަކާތަކުންނެވެ. އޭނާ ބްރޭންޑް އެމްބެސެޑަރަކަށް ހަމަޖެއްސީ އެ ކުންފުނިން ނެރެން ނިންމާފައިވާ ތިމާވެއްޓާ ރައްޓެހި، ދެމެހެއްޓެނިވި ކަލެކްޝަންތައް ޕްރޮމޯޓް ކުރުމުގެ ގޮތުންނެވެ.

މިލިއަން ޕައުންޑް (1.35 މިލިއަން ޑޮލަރު) ގެ މި ޑީލް ބްރޫކްލިން އަށް ދިނުމާ ގުޅިގެން ބައެއް މީހުން ބުނީ އޭނާ އަކީ ބަޔަކު ބަލައިގަންނަ ފަދަ ޒުވާނެއް ނޫން ކަމަށެވެ. އެހެންވެ "ސުޕަޑްރައި" އިން ބްރުކްލިންއާ އެކު ޕްރޮމޯޝަނަލް ކެމްޕޭންތަކެއް ހިންގިޔަސް، އޭނާ ޕްރޮމޯޓް ކޮށްދޭ އެއްޗެހި ގަންނަން ގިނަ ބަޔަކު ޝައުގުވެރި ނުވާނެ ކަމަށް ބުންޏެވެ.

މީގެ އިތުރުން ބައެއް މީހުން ބުނީ ބްރުކްލިން އަށް "ހައްގު ނޫން" އެ ފުރުސަތު ލިބުނީ މަޝްހޫރު ބައްޕައަކާއި މަޝްހޫރު މަންމައަކާ ހެދި، އެ މީހުންގެ ނުފޫޒު ސަބަބުން ކަމަށެވެ. ބްރުކްލިންގެ މަންމަ އަކީ ކުރީގެ މަޝްހޫރު އަންހެން ބޭންޑް "ސްޕައިސް ގާލްސް" ގެ މެމްބަރު ވިކްޓޯރިއާ ބެކަމް (ޕޯޝް) އެވެ. އޭނާ އަކީ އަމިއްލަ ބިއުޓީ ލައިނެއް ވަރަށް ފުޅާކޮށް ހިންގާ މީހެކެވެ.

ބައެއް މީހުން ބުނެފައި ވަނީ ބްރުކްލިން އަކީ ބަޔަކު ބަލައިގަންނަ މީހެއް ނޫންކަން އެނގުނީ މިދިޔަ މަހު އޭނާ "ޓުޑޭ" ގައި ޝޯގައި ކައްކަން ވަރަށް ލޯބިކުރާ ކަމަށް ބުނެ، ހެނދުނުގެ ނާސްތާއަކަށް ބޭނުންކުރާ "ތާކުންތާކު ނުޖެހޭ" ރެސިޕީއެއް ވެސް ހިއްސާ ކުރުމުން ކަމަށެވެ.

އަމިއްލަ "އިންގްލިޝް ބްރޭކްފާސްޓް" ރެސިޕީއަކީ ދެ ފޮތި ޕާނާއި ކައްފާފައި ހުރި ބޭކަން އާއި ސޮސެޖާ އެކު ބިހެއް ކަމަށް ބްރުކްލިން ބުނެފައިވެ އެވެ. އޭނާގެ މި ރެސިޕީ އަށް އެތައް ބަޔަކު ޖޯކް ޖަހައި، "ކަލިނަރީ ހުނަރުން ލަދުން ހަލާކުވެއްޖެ" ކަމަށް ބުނެ ގިނަ ބަޔަކު ސޯޝަލް މީޑިއާގައި މަލާމާތް ކޮށްފައިވެ އެވެ.

މިދިޔަ އަހަރުގެ ޖުލައި މަހުގެ ތެރޭގައި ލޯބިވެރިޔާ ނިކޮލާ ޕެލްޒާއާ އެންގޭޖްވި، ބްރުކްލިން ބުނެފައިވާ ގޮތުގައި އޭނާ ކައްކަން ދަސްކުރީ މިދިޔަ އަހަރުގެ ލޮކްޑައުންގެ ތެރޭގަ އެވެ.

ބްރުކްލިންގެ އިތުރުން ބެކަމް އާއި ވިކްޓޯރިއާގެ ދެން ތިބެނީ ރޯމިއޯ ޖޭމްސް ބެކަމް، 18، އާއި ކްރޫޒް ބެކަމް، 16، ގެ އިތުރުން އަންހެން ދަރިފުޅު ހާޕާ ސެވެން ބެކަމް، 10، އެވެ.