ހެރީ ސްޓައިލްސް ސެންޓާއި ކޮސްމެޓިކް ލައިނެއް ނެރެނީ

އިނގިރޭސިވިލާތުގެ ކުރީގެ މިއުޒިކް ބޭންޑް "ވަން ޑިރެކްޝަން" ގެ މެމްބަރު ހެރީ ސްޓައިލްސް އަމިއްލަ ސެންޓާއި ކޮސްމެޓިކް ލައިނެއް ނެރެން މަސައްކަތްކުރަމުން އަންނަ ކަމަށް ރިޕޯޓްތައް ބުނެފި އެވެ.

އުމުރުން 28 އަހަރުގެ ފަންނާނު މިކަމާ ބެހޭ ގޮތުން މިހާތަނަށް އެއްވެސް އެއްޗެއް ނުބުންޏަސް ހެރީ ސްޓައިލްސް އަޕްޑޭޓްސްގެ ނަމުގައި ހަދާފައިވާ ޓްވިޓާ އެކައުންޓެއްގައި ބުނެފައިވާ ގޮތުގައި ހެރީ ވަނީ އޭނާގެ އާ ވިޔަފާރި އަށް ހާއްސަކޮށްގެން ކުންފުންޏެއް ވެސް މިހާރު ރަޖިސްޓްރީކޮށްފަ އެވެ. އޭގައިވާ ގޮތުން ހެރީ އަކީ "ޕްލީޒްޑް އޭސް ހޯލްޑިންސް ލިމިޓެޑް" ގެ ނަމުގައި ރަޖިސްޓްރީީކޮށްފައިވާ ކުންފުނީގެ ޑިރެކްޓަރެކެވެ. އަދި އެ މަގާމަށް އޭނާ ހަމަޖެއްސީ މިދިޔަ މަހުގެ 25 ގަ އެވެ.

ރިޕޯޓްތައް ބުނާ ގޮތުން އޭނާގެ ވިޔަފާރީގެ ޕާޓްނަރަކީ އެމާ ސްޕްރިންގެވެ. އޭނާ އަކީ ވަރަށް ކުރިން ފެށިގެން ވެސް ހެރީއާ އެކު މަސައްކަތްކުރަމުން އަންނަ މީހެކެވެ.

ސެންޓާއި ކޮސްމެޓިކް ލައިނެއް ހެރީ ލޯންޗްކުރަން އުޅޭ ވާހަކަ މީޑިއާތަކުގައި ދެކެވުނަސް އެ ލޯންޗްކުރާނެ އިރެއް ސާފެއް ނުވެ އެވެ.

މިހާރު ސޯލޯ އާޓިސްޓެއްގެ އިތުރުން ފިލްމުތަކުގައި އެކްޓް ވެސް ކުރަމުންނަ ހެރީ އަކީ އޭނާ މި ފަހުން ހެދުން އަޅާ ގޮތުން ވަރަށް ގިނަ ބައެއްގެ ފާޑުކިޔުންތައް އަމާޒުވެފައިވާ މީހެކެވެ. އަދި އޭނާގެ ސްޓައިލްތަކަކީ "ފިރިހެނުނަށް އަރުވާ ހުތުރެއް" ގެ ގޮތުގައި ވެސް ސިފަކޮށްފައިވެ އެވެ. އެގޮތުން ވަރަށް ފަހުން ވޯގް މަޖައްލާ އަށް ދިން ކަވާ އިންޓަވިއުއަކާ އެކު ގެނެސްދިން ފޮޓޯތަކުގައި ހެރީ ބޭނުންކޮށްފައި ހުރި ހެދުންތަކާއި 2019 ގެ މެޓް ގާލާގައި ބޭނުންކުރި ހެދުމަށް ވަރަށް ބޮޑެތި ފާޑުކިޔުންތައް އަމާޒުވި އެވެ.

އެހެންވެ ހެރީގެ ސެންޓާއި ކޮސްމެޓިކް ލައިނަކީ ފިރިހެނުންނަށް ކަމުދާ އެއްޗަކަށް ވެދާނެތޯ ވެސް ބައެއް މީޑިއާތަކުން ސުވާލު އުފައްދާފައިވެ އެވެ.

ޑައިރެކްޓަރު ކްރިސްޓޯފާ ނޯލާންގެ 2017 ގެ ފިލްމު "ޑަންކާކް" ގެ ރޯލެއް ކުޅުނު ހެރީގެ ކުރިއަށް ހުރި ފިލްމުތަކުގެ ތެރޭގައި "ޑޯންޓް ވޮރީ ޑާލިން" އާއި "ދަ ޕޮލިސްމެން" ހިމެނެ އެވެ. "ޑޯންޓް ވޮރީ ޑާލިން" ގެ އަކީ ހެރީ، ލޯބިވެރިޔާ އޮލީވިއާ ވައިލްޑް، 37، އާ އެކީގައި ފެންނާނެ ފިލްމެކެވެ. އަލަތު ކައިވެނި 2011 ގައި ރޫޅިފައިވާ އޮލީވިއާ އަކީ ދެ ކުދިންގެ މައެކެވެ.