މެލޭރިއާއާ ދެކޮޅު ކެމްޕޭނެއްގައި ބެކަމް މުސްކުޅިވެފައި

ދުނިޔޭގެ ވަރަށް ގިނަ ގައުމުތަކުން މިހާރު ނައްތާލެވިފައިވާ މެލޭރިއާ ބައްޔާ ދެކޮޅު ކެމްޕޭނެއްގައި އިނގިރޭސިވިލާތުގެ ކުރީގެ މަޝްހޫރު ފުޓްބޯޅަ ތަރި ޑޭވިޑް ބެކަމް ހިއްސާވެ، ހާއްސަ މެސެޖްތަކަކާ އެކު ކެމްޕޭން ވީޑިއޯއެއް އާންމުކޮށްފި އެވެ.

މެލޭރިއާއާ ދެކޮޅަށް މަސައްކަތްކުރާ ޗެރިޓީ "މެލޭރިއާ ނޯ މޯ" އިން "މެލޭރިއާ މަސްޓް ޑައި" ގެ ނަމުގައި ހިންގާ ކެމްޕޭނަށް ތައްޔާރުކުރި ވީޑިއޯގައި 45 އަހަރުގެ ބެކަމް ފެންނަނީ 70 ވަރަކަށް އަހަރުގެ މީހެއްގެ ގޮތުގަ އެވެ. އޭނާގެ ރޫ ޖެހިފައިވާ މޫނާއި ނުރަ ބޮލާއި ނުރަ ތުނބުޅިއާ އެކު ފެންނަ ވީޑިއޯގައި ޑޭވިޑް ދައްކަނީ މެލޭރިއާ އެއްކޮށް ނައްތާލެވިފައިވާ ދުނިޔެއަކަށް ކުރެވޭ އުންމީދުތަކުގެ ވާހަކަ އެވެ.

މި ކެމްޕޭން ވީޑިއޯ ބެކަމްގެ އިންސްޓަގްރާމްގައި ވެސް ހިއްސާކޮށްފައިވެ އެވެ. އޭގެ ކެޕްޝަނުގެ އޭނާ ބުނީ ކޮންމެ ދެ މިނިޓަކުން މެލޭރިއާ ބަލީގައި ކުއްޖަކު މަރުވާ ކަމަށާއި އޭނާގެ އަމިއްލަ ދަރިން ވެސް އެ ބައްޔާ ބެހޭ ގޮތުން ސުވާލުކުރާ ކަމަށެވެ.

"މިހާތަނަށް ވެސް އަހަރެމެން ވާނީ މި ނުރައްކާތެރި ވަބާއާ ދެކޮޅަށް ކާމިޔާބީ ހޯދާފައި،" އޯޑިއަންސަކާ މުހާތަބުކުރާ ގޮތަށް ދައްކުވައިދޭ ވީޑިއޯގައި ބެކަމް ބުނެ އެވެ. "މިހާތަނަށް މި ބަލީގައި ބިލިއަން މީހުން މަރު ވެސް ވެއްޖެ. މިއީ އިންސާނީ ތާރީހުގައި ވެސް އެހެން ބައްޔެއްގައި މީހުން މަރުނުވާހާ ގިނަ އަދަދެއް. އެކަމަކު މިއަދު އަހަރެމެން ވާނީ މެލޭރިއާ ބަލިކޮށްފައި. މިކަމުގެ ހުރިހާ ވެސް ޝުކުރެއް އޮތީ ދުނިޔޭގެ އެކި ކަންކޮޅުތަކުގައި މަސައްކަތްކުރި ސައިންޓިސްޓުންނާއި ޑޮކްޓަރުންނާއި ލީޑަރުންނާއި މިކަމުގައި މަސައްކަތްކުރި އާންމު ރައްޔިތުންނަށް."

ބެކަމް ބުނި ގޮތުގައި މުސްތަގުބަލުގެ ދުނިޔެ އަކީ މެލޭރިއާ ބަލިން އެއްކޮށް ސަލާމަތްވެފައިވާ ތަނަކަށް ހަދަން ޖެހެ އެވެ.

ވީޑިއޯގެ ވަކި ހިސާބަކުން ބެކަމް ދެން ފެންނަނީ އޭނާގެ މިހާރު ސިފައިގަ އެވެ. އެ ސިފައިގައި އޭނާ ބުނަނީ މެލޭރިއާ އިން ސަލާމަތްވެފައިވާ މުސްތަގުބަލުގެ ޖީލެއް އަހަރެމެންނަށް މިހާރު ވެސް ހޯދޭނެ ކަމަށެވެ.

"އެކަމަށް ބޭނުން ވަނީ އެންމެން ގުޅިގެން މަސައްކަތްކުރުން. އަހަރެމެން މަސައްކަތް ހުއްޓާލާނީ މެލޭރިއާ އެއްކޮށް ނައްތާލާފައި." ބެކަމް ބުންޏެވެ.

ބެކަމް އަކީ 2009 އިން ފެށިގެން"މެލޭރިއާ ނޯ މޯ"އާ އެކު މަސައްކަތް ކުރަމުން އަންނަ މީހެކެވެ.

މެލޭރިއާ އަކީ މަދިރީގެ ޒަރީރާ އިން ޖެހޭ ބައްޔެކެވެ.