ތުހުމަތުތަކަކާއެކު ފްރާންސް ފުޓްބޯޅައިގެ ރައީސް މަސްއޫލިއްޔަތާ ދުރަށް

ޕެރިސް (ޖެނުއަރީ 12) - ބޮޑެތި ތުހުމަތުތަކެއް ކުރެވުމުން ފްރާންސް ފުޓުބޯޅަ ފެޑެރޭޝަންގެ ރައީސް ނޮއެލް ލީ ގްރޭޓް، ތަހުގީގު ނިމެންދެން މަގާމުގެ މަސްއޫލިއްޔަތުތަކުން ދުރަށް ޖެހިލައިފި އެވެ.

އޭނާ މަގާމުން އެއްފަރާތް ވެލަން ނިންމީ އެގައުމުގެ ކުރީގެ ލެޖެންޑަރީ ކުޅުންތެރިޔާ ޒައިނުއްދީން ޒިދާން އާ ގުޅޭގޮތުން އިހުތިރާމް ކުޑަ ވާ ފަދަ ވާހަކަތަކެއް ދައްކުމުން އޭނާއަށް ޕްރެޝަރު ބޮޑުވެފައިވާ ވަގުތެއްގަ އެވެ.

"[ޑިޑިއޭ] ޑެޝޯމްޕްސް އަށް ނޫނެކޭ ބުނާނީ ކާކު؟ އޭނާ އަށް ނޫނެކޭ ބުނާނެ އެކަކުވެސް ނެތް. ޒިދާން އަހަރެންނަށް ގުޅަން މަސައްކަތް ކޮށްފި ނަމަ؟ ޔަގީނުން ވެސް އަހަރެން ފޯނު ވެސް ނުނަގާނަން،" ޑެޝޯމްޕްސް ހުއްޓައި ޒިދާން އަށް ފްރާންސްގެ ގައުމީ ޓީމުގެ ކޯޗުކަން ހަވާލު ނުކުރާނެ ކަމަށް ބުނަމުން ލީ ގްރޭޓް ބުނެފައި ވެއެވެ.

"އޭނާ [ޒިދާން] ބޭނުން ތާކަށް ދާން ވީ. އެކަމާ އަހަރެންގެ އެއްވެސް ފަރުވާލެއް ނެތް."

މިއާ ގުޅިގެން ލީ ގްރޭޓް އަށް ބޮޑެތި ފާޑުކިޔުންތައް އަމާޒު ވިއެވެ. ފާޑުކިއުން އަމާޒު ކުރި ފަރާތްތަކުގެ ތެރޭގައި ފްރާންސް ގައުމީ ޓީމުގެ ކުޅުންތެރިންނާއި އެގައުމުގެ ސްޕޯޓްސް މިނިސްޓަރު އަދި ޒިދާން ކުޅުނު ކުލަބް ރެއާލް މެޑްރިޑް ވެސް ހިމެނެ އެވެ.

"ޒިދާން އަކީ ފްރާންސް، އޭނާ ފަދަ ލެޖެންޑަކަށް އަހަރެމެން އިހުތިރާމް ކުޑައެއް ނުކުރާނަން،" ފްރާންސްގެ ތަރި ކިލިއަން އެމްބާޕޭ އޭނާގެ ޓްވިޓާގައި ލިޔެފައި ވެއެވެ.

ފާޑުކިޔުންތަކާ ގުޅިގެން ލީ ގްރޭޓް ވަނީ އޭނާ އަށް ހެދުނީ ގޯހެއް ކަމަށް އެއްބަސްވެ، މާފަށް އެދިފަ އެވެ.

ލީ ގްރޭޓް އަށް ތުހުމަތު ކުރެވުނީ ޖިންސީ ފުރައްސާރައިގެ މައްސަލައެކެވެ. އެކަމަކު އޭނާ ބުނީ ތުހުމަތު ކުރަނީ އެއްވެސް ހަގީގަތެއް ނެތް ކަމެއްގެ މައްޗަށެވެ.

މިކަމާ ގުޅިގެން ފްރާންސްގެ ސަރުކާރުން ވަނީ މިދިޔަ އޮކްޓޫބަރު މަހު އެ އެސޯސިއޭޝަންގެ އޮޑިޓެއް ކުރިއަށް ގެންދަން ފަށައިފަ އެވެ. އަދި މި މަހުގެ ނިޔަލަށް އެ އޮޑިޓް ނިމި ނަތީޖާތައް ލިބޭނެކަމަށް ބެލެވެ އެވެ.

ފްރާންސް ފުޓުބޯޅަ ފެޑެރޭޝަންގެ އެތިކްސް ކޮމިޓީގެ އިސްވެރިޔާ، ޕެޓްރިކް އެންޓޮން ވަނީ މިދިޔަ ހަފްތާ، ލީ ގްރޭޓް މަގާމުން އިސްތިއުފާ ދޭން ގޮވާލައިފަ އެވެ. އޭނާ މިވަގުތަށް މަގާމުގެ މަސްއޫލިއްޔަތުތަކުން އެއްފަރާތް ވެލައިފައި ވާއިރު، ރައްކާތެރިކަމުގެ ފިޔަވަޅެއްގެ ގޮތުން އެ ފެޑެރޭޝަންގެ ޑިރެކްޓާ ޖެނެރަލް ފްލޮރެންސް ހާޑުއިން ވެސް ވަނީ ސަސްޕެންޑް ކޮށްފަ އެވެ.

ހާޑުއިން އާއި ގްރޭޓްގެ މަސްއޫލިއްޔަތުތަކާ ވަގުތީގޮތުން ހަވާލުވެފައި ވަނީ، ފެޑެރޭޝަންގެ ނައިބު ރައީސް ފިލިޕޭ ޑިއާލޯ އެވެ.

އުމުރުން 81 އަހަރުގެ ލީ ގްރޭޓް ފްރާންސް ފުޓުބޯޅަ ފެޑެރޭޝަންގެ ރައީސް ކަމަށް އައީ 2011 ވަނަ އަހަރެވެ.