ދައުލަތަށް ނުލިބި ހުރި ޓޫރިޒަމާ ގުޅޭ ޓެކްސްގެ އަދަދު ބިލިއަނަކަށް ވުރެ މަތި

ޓޫރިޒަމްގެ ސިނާޔަތުން ނަގާ ޓީޖީއެސްޓީ އަދި ގްރީން ޓެކްސްގެ ގޮތުގައި ދައުލަތަށް ދައްކަން ޖެހޭ ފައިސާގެ ތެރެއިން އެއް ބިލިއަނަށް ވުރެ ގިނަ ރުފިޔާ އަދި ނުލިބޭ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.

ގްރީން ޓެކުހާއި ޓީޖީއެސްޓީގެ ނުލިބި ހުރި އަދަދުތައް ސާފުކުރުމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އިބްރާހިމް ރަޝީދު ކުރެއްވި ސުވާލަކަށް ލިއުމުން ޖަވާބު ދެއްވަމުން މިނިސްޓަރު ވިދާޅުވީ އޭގެ ތެރެއިން ގިނައީ ޓީޖީއެސްޓީ ކަމަށެވެ.

އަމީރު ވިދާޅުވީ މިދިޔަ މަހުގެ ނިޔަލަށް ޓީޖީއެސްޓީ އާއި އެ ޓެކްސް ނުދައްކައިގެން ނަގާ ޖޫރިމަނާއާ އެކު ޖުމްލަ 872 މިލިއަން ރުފިޔާ އަށް ވުރެ ގިނަ ރުފިޔާ ދައުލަތަށް ލިބެން ޖެހޭ ކަމަށެވެ. ޓީޖީއެސްޓީއަކީ ދައުލަތުން 2011 ވަނަ އަހަރު ތައާރަފް ކުރި ޓެކުހެކެވެ.

ރިސޯޓުތަކާއި ހޮޓާތަކުގެ އިތުރުން ސަފާރީތަކުގައި ތިބޭ ބޭރުގެ ޓޫރިސްޓުންގެ އަތުން 2015 ވަނަ އަހަރު ނަގަން ފެށި ގްރީން ޓެކްސްގެ ގޮތުގައި 85 މިލިއަން ރުފިޔާ ނުލިބި ހުރިއިރު، އެ ޓެކްސް ނުދައްކައިގެން ޖޫރިމަނާގެ ގޮތުގައި ލިބެންޖެހޭ 42 މިލިއަން ރުފިޔާ ނުލިބޭ ކަން މިނިސްޓަރު ފާހަގަކުރެއްވި އެވެ. އެއާކު، އޮގަސްޓް މަހުގެ ނިޔަލަށް ގްރީން ޓެކްސްގެ ގޮތުގައި ދައްކަން ޖެހޭ ޖުމްލަ 128 މިލިއަން ރުފިޔާ ދައުލަތަށް ނުލިބެ އެވެ.

މިދިޔަ މަހު މީރާ އަށް ވަނީ ޖުމްލަ އާމްދަނީގެ ގޮތުގައި 1.4 ބިލިއަން ރުފިޔާ ލިބިފަ އެވެ. އޭގެ ތެރެއިން، 45.6 ޕަސެންޓަކީ ޓީޖީއެސްޓީ ހިމެނޭހެން ޖުމްލަ ޖީއެސްޓީގެ ގޮތުގައި ލިބުނު އާމްދަނީ އެވެ. އަދި ގްރީން ޓެކްސްގެ ގޮތުގައި މީރާ އިން ބަލައިގެންފައި ވަނީ އާމްދަނީގެ 5.5 ޕަސެންޓެވެ.