ރަޝިޔާ ކުރި ކުށަށް އަދަބު ދޭންޖެހޭނެ: ޒެލެންސްކީ

ޔޫކްރޭނަށް އަރައިގަނެ އެ ގައުމުގެ ބިމުން ބައެއް އަޅުވެތިކުރުމުގެ ޖަރީމާ ހިންގާފައިވާތީ، އދ. މަޖިލީހުގެ ފަރާތުން ރަޝިޔާ އަށް އަދަބު ދޭންޖެހޭނެ ކަމަށް، ޔޫކްރޭންގެ ރައީސް ވޮލޮޑިމީރް ޒެލެންސްކީ އިއްޔެ ވިދާޅުވެއްޖެ އެވެ.

އދ.ގެ މައި މަރުކަޒުގައި މި މަހުގެ 20 ވަނަ ދުވަހުން ފެށިގެން ކުރިއަށް ދާ، 77 ވަނަ އާންމު މަޖިލީހުގެ ޖަލްސާގެ އިއްޔެގެ މެންދުރުފަހުގެ ދަންފަޅީގައި ތަގުރީރުކުރައްވަމުން ޒެލެންސްކީ ވިދާޅުވީ ރަޝިޔާގެ މައްޗަށް ޝަރީއަތް ހިންގުމަށް ޚާއްސަ ޓްރައިބިއުނަލެއް ވެސް އުފައްދަންޖެހޭ ކަމަށެވެ. ޔޫކްރޭންގައި ހުންނަވައި ވީޑިއޯ ލިންކުގެ ޒަރީއާއިން ދެއްވި ތަގުރީރުގައި ޒެލެންސްކީ ވިދާޅުވީ ރަޝިޔާ އިން ހިންގަމުންދާ ކުށްތަކުގެ އުގޫބާތެއްގެ ގޮތުން، ރަޝިޔާ އަށް ލިބިފައިވާ ސަލާމަތީ މަޖިލީހުގައި ވީޓޯ ކުރުމުގެ ބާރު ވެސް ރަޝިޔާގެ ކިބައިން ނިގުޅައިގަންނަންޖެހޭ ކަމަށެވެ.

"ޔޫކްރޭނާ ދެކޮޅަށް ޖަރީމާއެއް ހިންގައިފި. އަހަރެމެން ގޮވައިލަނީ އެކަމަށްޓަކައި ރަޝިޔާ އަށް އަދަބު ދޭން. އުދުވާނީ ޖަރީމާއަށް އުގޫބާތް ދޭންޖެހޭނެ. ސަރަހައްދީ ރޮނގަށް އަރައިގަނެ ސަރަހައްދީ ސަލާމަތްތެރިކަން ނިގުޅައިގެންފައިވާތީ އުގޫބާތް ދޭންޖެހޭނެ. ބައިނަލްއަގުވާމީ ގޮތުން ކަނޑައެޅިފައިވާ ސަރަހައްދީ އިން، އަނބުރާ ޔޫކްރޭނަށް ލިބެންދެން އެ އުގޫބާތްތައް ދެމިއޮންނަންވާނެ،" ޒެލެންސްކީ ވިދާޅުވި އެވެ.

މިދިޔަ ފެބްރުއަރީ މަހުގެ 24 ވަނަ ދުވަހު ރަޝިޔާ ސިފައިން ޔޫކްރޭނާ ދެކޮޅަށް ހަނގުރާމަ ފެށި ފަހުން، މިއީ ރައީސް ޒެލެންސްކީ ދުނިޔޭގެ ގައުމުތަކުގެ ވެރިންގެ ބައްދަލުވުމެއްގައި ތަގުރީރު ކުރެއްވި ފުރަތަމަ ފަހަރެވެ. އޭނާގެ ތަގުރީރު ނިންމަވާލެއްވުމާއެކު، ގިނަ ގައުމުތަކުގެ މަންދޫބުން ކޮޅަށް ތެދުވެވަޑައިގެން އޭނާ އަށް ތަރުހީބު ދެއްވި އިރު، ރަޝިޔާ އާއި އެހެން ބައެއް ގައުމުތަކުގެ މަންދޫބުން ތިއްބެވީ އިށީނދެ އެވެ.

އޭނާ ވިދާޅުވީ ހަނގުރާމަ ފެށި ފަހުން ރަޝިޔާ އިން އަބަދުވެސް ދައްކަނީ މަޝްވަރާކޮށް ވާހަކަ ދައްކައިގެން ކަންކަން ހައްލުކުރަން ބޭނުންވާ ވާހަކަ އެވެ. ނަމަވެސް ރަޝިޔާގެ ބަހާއި އަމަލު ދިމާނުވާ ކަމަށް އޭނާ ވިދާޅުވި އެވެ.

"އެމީހުން ދައްކަނީ މަޝްވަރާ ކުރާ ވާހަކަ، އެކަމަކު އިއުލާންކުރީ ރިޒާވް ސިފައިން ހަނގުރާމަ އަށް ނެރެން. އެމީހުން ދައްކަނީ މަޝްވަރާ ކުރާ ވާހަކަ، އެކަމަކު އިއުލާންކުރީ، ހިފާފައިވާ ޔޫކްރޭންގެ ބިންތަކުގައި ފެންނަ ނުފެންނަ ވޯޓެއް ނަގާ ވާހަކަ."

ޒެލެންސްކީގެ ތަގުރީރުގެ ކުރިއާއި ފަހުން ތަގުރީރު ކުރެއްވި އެހެން ގައުމުތަކުގެ ވެރިން ވެސް ވަނީ، ރަޝިޔާ އިން ޔޫކްރޭނާ ދެކޮޅަށް ކުރަމުންދާ ހަނގުރާމަ ކުށްވެރިކޮށްފަ އެވެ. އެ ގޮތުން މޮލްޑޯވާގެ ރައީސް މައިއާ ސަންޑޫ ވިދާޅުވީ ރަޝިޔާގެ ހަނގުރާމައަކީ މުޅި އދ. މަޖިލީހާ ވެސް ދެކޮޅަށް ދިން ހަމަލާއެއް ކަމަށެވެ.

އެމެރިކާގެ ރައީސް ޖޯ ބައިޑެން ވިދާޅުވީ ރަޝިޔާ އިން ޔޫކްރޭނާ ދެކޮޅަށް ކުރަމުންދާ ހަނގުރާމައަކީ، ދައުލަތެއްގެ ގޮތުގައި ދެމިއޮތުމަށް ޔޫކްރޭނަށް ލިބިގެންވާ ހައްގު ނިގުޅައިގަތުމަށް ކުރަމުންދާ ހަނގުރާމައެއް ކަމަށެވެ. އެމީހަކީ ކޮންމެ މީހެއް ކަމަށްވިޔަސް، އަދި އެމީހަކު ދިރިއުޅެނީ ކޮންމެ ތަނެއްގައި ކަމަށް ވިޔަސް، އަދި އެމީހަކު ކޮންމެ ގޮތަކަށް ގަބޫލުކުރި ކަމުގައި ވިޔަސް، އަމާންކަމާއި ހަމަޖެހުމާއެކު އެމީހަކަށް ދިރިއުޅެވެންވާނެ ކަމަށް ވެސް ބައިޑެން ވިދާޅުވި އެވެ.