ޓީއެމްއޭގެ ފްލީޓަށް އާ ބޯޓެއް

ރާއްޖޭގައި ސީ ޕްލޭންގެ ހިދުމަތްދޭ އެންމެ ބޮޑު ކުންފުނި، ޓްރާންސް މޯލްޑިވިއަން އެއާވޭސް (ޓީއެމްއޭ) ގެ ފްލީޓަށް އާ ބޯޓެއް ގެނެސްފި އެވެ.

ޓޫރިސްޓުން އެންމެ ގިނައިން އަންނަ ދުވަސްވަރު ނުވަތަ "ހައި" ސީޒަނާ ދިމާކޮށް މިދިޔަ ހުކުރު ދުވަހު އެ ކުންފުނިން ރާއްޖެ ގެނައީ "ޑެ ހެވިލެންޑް" ކުންފުނީގެ 'DHC-6 ޓްވިން އޮޓާސް' އެކެވެ.

ދުނިޔޭގެ އެންމެ ބޮޑު ސީ ޕްލޭން އޮޕަރޭޓަރު ޓީއެމްއޭގެ އާ ބޯޓާއެކު. އެ ކުންފުނީގެ ފްލީޓުގައި މިހާރު 59 ބޯޓު އޮންނާނެ އެވެ.

ޓީއެމްއޭ އިން ބުނީ ރާއްޖޭގައި ހުޅުވާ ރިސޯޓުތައް ގިނަވެ، ޓޫރިސްޓުން އަންނަ ވަރު އިތުރުވާތީ، އެ ކުންފުނީގެ ފްލީޓަށް ބޯޓުތައް އިތުރުކުރުމުގެ މަސައްކަތް ކުރާ ކަމަށެވެ. އެހެންވެ، ކޮވިޑްގެ ދުވަސްވަރަށް ފަހު ޓީއެމްއޭ އިން ވަނީ އިތުރު ތިން ބޯޓެއް ރާއްޖެ ގެނެސްފަ އެވެ.

އެއް މިލިއަން ފަސިންޖަރުންނަށް މި އަހަރު ނިމޭއިރު ހިދުމަތް ދެވޭނެ ކަމަށާއި އަދި އަހަރު ނިންމާނީ ޓީއެމްއޭގެ ފްލީޓަށް 60 ވަނަ ފްލައިޓެއް ގެނެސްފަައި ކަމަށް އެ ކުންފުނިން ބުނެ އެވެ.

ޓީއެމްއޭ އިން އަންނަނީ ވެލާނާ އިންޓަނޭޝަނަލް އެއާޕޯޓުން ރާއްޖޭގެ 80 އަށް ވުރެ ގިނަ ރިސޯޓުތަކަށް ސީ ޕްލޭންގެ ހިދުމަތް ފޯރުކޮށްދެމުންނެވެ.