ގުރުއާނާ ބެހޭ މަރުކަޒު ސަލްމާން މިސްކިތަށް ބަދަލުކުރަނީ

ކީރިތި ގުރުއާނާ ބެހޭ މަރުކަޒު ހިންގުން ސަލްމާން މިސްކިތަށް ބަދަލުކުރުމުގެ މަސައްކަތް ފަށައިފި އެވެ.

އެ މަރުކަޒުގެ އޮފިޝަލަކު "މިހާރު" އަށް މިއަދު ވިދާޅުވީ ދިރާސީ އާ އަހަރުގެ ކިޔެވުން އަންނަ އާދިއްތަ ދުވަހު ފަށާއިރު، އެ މަރުކަޒުން ހިންގާ ކޯސްތައް ފެށުމަށް މިހާރު ނިންމާފައި ވަނީ ސަލްމާން މިސްކިތުގައި ކަމަށެވެ.

ގުރުއާނާ ބެހޭ މަރުކަޒު ހިންގުމަށް ސަލްމާން މިސްކިތުގެ ތިންވަނަ ފުލޯއިން ވަނީ ޖާގަ ހަމަޖައްސައިފަ އެވެ.

"އެތަނަށް ސާމާނު ބަދަލުކުރުމުގެ މަސައްކަތް މިހާރު ވެސް އަންނަނީ ކުރަމުން. އެކަމަކު އިންޓަނެޓް ކަހަލަ ބައެއް ވަސީލަތްތައް ސަލްމާން މިސްކިތުގައި އަދި ނެތީމަ އިދާރީ ބައެއް މަސައްކަތްތައް ދުވަސްކޮޅަކަށް އަދިވެސް ކުރިއަށްދަނީ މިހާރު ވެސް ބޭނުންކުރާ މަރުކަޒުގައި،" އޮފިޝަލް ވިދާޅުވި އެވެ.

އޭނާ ވިދާޅުވި ގޮތުގައި، އެ މަރުކަޒުގެ ކޯސްތަކުގެ ކުލާސްތައް ބޭއްވުމަށް ސަލްމާން މިސްކިތުގެ ސެމިނާ ރޫމަކާއި ބައްދަލުވުންތައް ބޭއްވުމަށް އޮޑިޓޯރިއަމް ބޭނުންކުރެވޭނެ އިންތިޒާމު ވެސް ހަމަޖައްސައިދީފައިވާ ކަމަށެވެ.

ގުރުއާނާ ބެހޭ މަރުކަޒު ހިންގުން ސަލްމާން މިސްކިތަށް ބަދަލުކުރާއިރު، އެ މަރުކަޒު މިހާރު ހިންގަމުން އަންނަ އިމާރާތް ވަނީ ވަރަށް ބޮޑަށް ބާވެ، ހަލާކުވެފަ އެވެ. އެތަނުގައި ޖާގައިގެ ދަތިކަން ވެސް ވަރަށް ބޮޑެވެ.

އެ މަރުކަޒަކީ އެކި އުމުރުފުރާގެ މީހުންނަށް ގުރުއާން ކުލާސްތަކާއި ކޯސްތަކާއި ގާރީ ކޯހާއި އިމާމް ކޯހުގެ އިތުރުން ހާފިޒުން ވެސް ތަމްރީނުކުރާ ތަނެކެވެ.