183 ބައިވެރިންނާ އެކު ގައުމީ ގުރުއާން މުބާރާތް ފަަށައިފި

ބަދަލުތަކާ އެކު 31 ވަނަ ގައުމީ ގުރުއާން މުބާރާތް ރޭ ފަށައިފި އެވެ. މި މުބާރާތުގައި 183 މީހުން ބައިވެރިވި އެވެ.

މިފަހަރުގެ މުބާރާތުގައި 12 އަތޮޅަކުން، ބަލައިގެން 131 ދަރިވަރުން އަދި ނުބަލާ 52 ދަރިވަރުން ބައިވެރިވި އެވެ. ވިހި ޖަމިއްޔާއަކުން ވެސް ވަނީ މި މުބާރާތުގައި ބައިވެރިވެފަ އެވެ. ކޮންމެ ދުވަހެއްގައި ވެސް ހަތަރު ސެޝަނަކަށް ކުރިއަށްދާ މި މުބާރާތުގެ ކިޔެވުން ނިންމާލަން ހަމަޖައްސާފައިވަނީ އަންނަ ހޮނިހިރު ދުވަހެވެ.

މި މުބާރާތް ފަށަން އިސްލާމީ މަރުކަޒުގައި ބޭއްވި ޖަލްސާގައި ހަ މީހުންނަށް ހާފިޒުކަމުގެ ސަނަދު ވެސް، ދެއްވާފައި އެވެ. އެ ހަ މީހުންނަކީ؛

1. ބައްސާމާ ސުލެއިމާން، ހއ. ދިއްދޫ، ފުނަކުރި

2. ސުލްތާން މުހައްމަދު ލަތީފް، ދ. މީދޫ، ފެހިގެ

3. ހިމްނާ މުހައްމަދު އިޔާޒު، މާލެ، ހ. ލަކީ

4. މަރިޔަމް ހުލްމާ މަޝްކޫރު، ސ. ހިތަދޫ، އިހާ

5. އާލާ އަޘުމަތު ޖަމީލް، މާލެ، މއ. ނާރެސް

6. އަހުމަދު ޝުޖާއު ޝަރީފް، ހުޅުމާލެ ފްލެޓް

އިސްލާމިކް މިނިސްޓްރީގެ މީޑިއާ އޮފިޝަލަކު ވިދާޅުވީ މި މުބާރާތުގެ ނަތީޖާ ފާޅުކުރުމުގެ ހަފުލާ ބާއްވަން ހަމަޖައްސާފައިވަނީ މި މަހުގެ 13 ވަނަ ދުވަހު ކަމަށެވެ.

މިއަހަރުގެ މުބާރާތުގެ ތަފާތަކީ، އޮފިޝަލަކު ވިދާޅުވި ގޮތުގައި، މުބާރާތުގައި ބައިވެރިވާ ވަކި އުމުރުފުރާއެއް ކަނޑައަޅާފައި ނުވުމާއި، މުބާރާތުގެ ދެ ގޮފީގެ ތެރެއިން ކޮންމެ ބައެއްގައި އަންހެނަކާއި ފިރިހެނަކު ބައިވެރިވެވޭއިރު މުބާރާތުގައި ބައިވެރިވުމަށް ދަށްވެގެން ވަކި އަދަދެއްގެ ކަނޑައަޅާފައި ނުވުން ކަމަށެވެ.

ގުރުއާން މުބާރާތުގެ އުސޫލަށް ގުރުއާނާބެހޭ މަރުކަޒުން ގެނައި ބަދަލުތަކުން ބައެއް ކައުންސިލްތަކުން ވަނީ ހިތްހަމަނުޖެހުން ފާޅުކޮށްފަ އެވެ. އަދި މުބާރާތުގައި ބައިވެރިނުވާން ވެސް ބައެއް ކައުންސިލްތަކުން ނިންމި އެވެ.