މޮރޮކޯގައި ބާއްވާ އިންޓަނޭޝަނަލް ގުރުއާން މުބާރާތެއްގައި ބައިވެރިވުމުގެ ފުރުސަތު ހުޅުވާލައިފި

މޮރޮކޯގައި ބާއްވާ އިންޓަނޭޝަނަލް ގުރުއާން މުބާރާތެއްގައި ބައިވެރިވުމުގެ ފުރުސަތު ދިވެހިންނަށް ގުރުއާނާ ބެހޭ މަރުކަޒުން މިއަދު ހުޅުވާލައިފި އެވެ.

އިސްލާމިކް މިނިސްޓްރީން ބުނީ މޮރޮކޯގައި އަންނަ އޯގަސްޓް މަހު ބޭއްވާ އިންޓަނޭޝަނަލް ގުރުއާން މުބާރާތެއްގައި ބައިވެރިވުމުގެ ދައުވަތު ރާއްޖެ އަށް ލިބުމުން، އެ މުބާރާތުގައި ބައިވެރިވުމުގެ ފުރުސަތު ކީރިތި ގުރުއާނާ ބެހޭ މަރުކަޒުން އާންމުކޮށް މިހާރު ހުޅުވާލާފައިވާ ކަމަށެވެ.

އެ މުބާރާތުގައި ދެ ކެޓެގަރީއަކުން ވާދަކުރެވޭނެ ކަމަށާއި ކޮންމެ ކެޓެގަރީއަކުން އެއް ބައިވެރިޔަކު ބައިވެރިކުރުމުގެ ފުރުސަތު ހުޅުވާލާފައިވާ ކަމަށް ވެސް މިނިސްޓްރީން ބުންޏެވެ.

މުބާރާތުގައި ބައިވެރިވުމުގެ ޝަރުތުތައް

• ހިޖުރީ ގޮތުން އުމުރުން 10 އަހަރާއި 40 އަހަރާއި ދެމެދުގެ މީހަކަށް ވުން

• ދިވެއްސަކަށް ވުން

• ރާއްޖޭގެ މަޝްހޫރު ގާރީއަކަށް ނުވުން

• ކުރީގައި މި މުބާރާތުގައި ބައިވެރިވެފައިވާ މީހަކަށް ނުވުން

ގުރުއާނާ ބެހޭ މަރުކަޒުން ބުނީ މި މުބާރާތަކީ ދެ ޖިންސަށް ވެސް ބައިވެރިވެވޭ ގޮތަށް ހުޅުވާލާފައިވާ މުބާރާތެއް ކަމަށާއި ކޮންމެ ކެޓަގަރީއަކުން އެއް ބައިވެރިޔަކު ހޮވާނީ އެ މަރުކަޒުން އިމްތިހާނުކުރުމަށް ފަހުގައި ކަމަށެވެ.

އުމުރުން 18 އަހަރު ނުވާ ކުއްޖަކު ނުވަތަ ފެނުމުން މަހުރޫމުވެފައިވާ މީހުންނާއި ހާއްސަ އެހީއަށް ބޭނުންވާ މީހަކު މި މުބާރާތަށް ދިއުމަށް ހޮވިއްޖެ ނަމަ، އެ ބައިވެރިޔަކާ އެކުގައި އެއް ބެލެނިވެރިޔަކު ގެންދިޔުމަށް ބޭނުންވާ އިންތިޒާމު މުބާރާތް ބާއްވާ ފަރާތުން ހަމަޖައްސައިދޭނެ ކަމަށް ގުރުއާނާ ބެހޭ މަރުކަޒުން ބުންޏެވެ.

މިި މުބާރާތުގައި ބައިވެރިވާން އެދޭ މީހުން މުބާރާތުގައި ބައިވެރިވުމަށް އެދި ހުށަހަޅާ ސިޓީ އާއި އެހެނިހެން ލިޔެކިޔުންތައް މި މަހު 21 ވަނަ ދުވަހުގެ 12:00 ގެ ކުރިން ގުރުއާނާ ބެހޭ މަރުކަޒަށް ނުވަތަ އެ މަރުކަޒުގެ އީ-މެއިލް "info@nchq.gov.mv" އަށް ފޮނުވުމަށް ވަނީ އެދިފަ އެވެ.