ކޮންޓޭނަރު ގުދަނުގެ އަލިފާން 3 ދުވަސް ފަހުން ކޮންޓްރޯލް ކޮށްފި

ބަނގްލަދޭޝްގެ އިރުދެކުނު އައްސޭރީގެ ބަނދަރު ރަށެއް ކަމަށްވާ ޗިޓަގޮންގެ ކައިރީގައި އޮންނަ ސިޓަކުންޑާ އަވަށުގައި ހުރި ކޮންޓޭނަރު ރައްކާކުރާ ގުދަނެއްގައި ރޯވި އަލިފާންގަނޑު ތިން ދުވަހުގެ ބުރަ މަސައްކަތުން ކޮންޓްރޯލުވެއްޖެ ކަމަށް މިއަދު ބުނެފި އެވެ.

ތިން ދުވަސް ފަހުން އަލިފާންގަނޑު ކޮންޓްރޯލުވި އިރު، އެ ހާދިސާގައި މަރުވި މީހުންގެ އަދަދު މިހާރު ވަނީ 41 އަށް އަރައިފަ އެވެ. ކޮންޓޭނަރުތައް ހުރި ގުދަނުގައި އަލިފާން ރޯވި ސަބަބެއް މުޅިން ދެނެ ނުގަނެވުނަސް، އަލިފާން ނިއްވާ މީހުން ބުނާ ގޮތުގައި، އެ ގުދަނުގައި ރައްކާތެރިކަމުގެ ގޮތުން އެކަށީގެންވާ ފިޔަވަޅުތަކެއް އަޅައިފައެއް ނެތެވެ.

އެ ގުދަންތަކުގައި ކޮންޓޭނަރުތައް ރައްކާކުރުމުގެ މަސައްކަތުގައި އުޅޭ ބައެއް މީހުން ބުނި ގޮތުގައި، ކޮންޓޭނަރުތަކުގައި ރޯވި އަލިފާންގަނޑުގެ ސަބަބުން، ބާރު ގަދަ ގޮވުމެއް ގޮވީ، ކެމިކަލް އަޅާފައި ހުރި ކޮންޓޭނަރެއްގައި ރޯވުމުގެ ސަބަބުންނެވެ. އެ ތަނުގައި ހުރި ބައެއް ކޮންޓޭނަރުތަކަކީ، ހައޮޑްރޯޖަން ޕްރޮކްސައިޑް ރައްކާކޮށްފައި ހުރި ކޮންޓޭނަރުތަކެއް ކަމަށް ވެސް، އެ ތަނުގައި މަސައްކަތް ކުރާ މީހުން ބުނެ އެވެ.

އަލިފާން ނިއްވާ މީހުން ބުނި ގޮތުގައި އަލިފާންގަނޑު ކޮންޓްރޯލް ކުރެވިފައި ވިޔަސް، އަލިފާންގަނޑު މުޅިން ނިއްވައެއް ނުލެވެ އެވެ. އެހެން ނަމަވެސް، އެ ގުދަނުގައި ހުރި ކެމިކަލް ހިމެނޭ ހުރިހާ ކޮންޓޭނަރުތަކެއް ވަކިވަކިން ދެނެގަނެވި، އެ ކޮންޓޭނަރުތައް އަލިފާނުގެ އަސަރު ނުކުރާ ހިސާބަށް ދުރުކުރެވިފައިވާތީ، އިތުރު ގޮވުމެއް ގޮވުމުގެ ފުރުސަތު މިހާރު ނެތް ކަމަށް، އަލިފާން ނިއްވާ ޓީމުން ބުނެ އެވެ.

އެ ޓީމުން ބުނި ގޮތުގައި ނުރައްކާތެރި ސާމާނުތަކެއް ރައްކާކޮށްފައި ހުރި ތަނަކަށް ވާއިރު، އަލިފާނުގެ ހާދިސާއަކުން ރައްކާތެރިވުމަށްޓަކައި އަޅަންޖެހޭ އެންމެ އާދައިގެ ފިޔަވަޅުތައް ވެސް އެ ތަނުގައި އަޅައިފައެއް ނެތެވެ. އެކޮންޓޭނަރުތައް ހުރި ގުދަނުގައި އަލިފާން ނިއްވާ ފުޅިތަކެއް ބަހައްޓާފައި ހުރުން ފިޔަވައި އިތުރު އެއްވެސް ކަމެއް ކޮށްފައެއް ނެތެވެ.

އަލިފާނުގެ މިހާދިސާއާ ގުޅޭ ގޮތުން އެ ގައުމުގެ ދާޚިލީ ވަޒީރު އަސަދުއްޒަމާން ޚާން މިއަދު ވިދާޅުވީ، އެ ހާދިސާ މިހާރު ތަހުގީގު ކުރަމުން އަންނަ ކަމަށެވެ. އަދި އެ ކަމުގައި ޒިންމާވާންޖެހޭ އެންމެން ވެސް ޝަރީއަތަށް ހުށަހަޅާނެ ކަމަށް އޭނާ ވިދާޅުވި އެވެ.

ބަނގްލަދޭޝް އަކީ މުޅި ދުނިޔޭގެ ނިސްބަތުން ބަލާއިރު ވެސް، އަންނައުނުގެ ބާވަތްތައް ދެ ވަނަ އަށް އެންމެ ގިނައިން އުފައްދައި އެކްސްޕޯޓްކުރާ ގައުމެވެ. ނަމަވެސް އަންނައުނު އުފައްދާ ކާރުޚާނާތަކުގައި އެކަށީގެންވާ ރައްކާތެރިކަމުގެ ފިޔަވަޅުތައް އަޅާފައި ނެތުމުގެ ސަބަބުން، ކޮންމެ އަހަރަކު ވެސް އަލިފާނުގެ އެތައް ހާދިސާއެއް އެ ކާރުޚާނާތަކުގައި ހިނގައި، އެތައް ބައެއްގެ ފުރާނަ ގެއްލެ އެވެ.

އަލިފާނުގެ މި ހާދިސާގައި މަރުވި މީހުންގެ އަދަދު 41 ކަމަށް އިދާރާތަކުން ބުންޏަސް، މި ހާދިސާގައި ގެއްލިފައިވާ ބައެއް މީހުން މިހާތަނަށް ވެސް ނުފެންނާތީ އާއި، ޒަޚަމްވެގެން ފަރުވާ ދެމުންދާ މީހުންގެ ތެރޭގައި ހަށިގަނޑުގެ ބޮޑު ބައެއް ފިހިފައިވާ މީހުން ވެސް ތިބުމާއެކު، މަރުވާ މީހުންގެ އަދަދު އިތުރުވުމަކީ އެކަށީގެންވާ ކަމެކެވެ.