ދެކުނު އެފްރިކާގެ އިމާރާތެއްގައި ރޯވެ 64 މީހަކު މަރުވެއްޖެ

ދެކުނު އެފްރިކާގެ ވެރިރަށް ޖޮހަނަސްބާގްގެ މެދުތެރޭގައި ހުރި ފަސް ބުރި އިމާރާތެއްގައި ރޭ ދަންވަރު ރޯވެ ހިނގި އަލިފާނުގެ ހާދިސާއެއްގައި މަދުވެގެން 64 މީހަކު މަރުވެ އެތައް ބަޔަކު ޒަޚަމްވެއްޖެ އެވެ.

ޖޮހަނަސްބާގްގެ ފުލުހުން ބުނި ގޮތުގައި އިމާރާތުގައި ރޯވި އަލިފާންގަނޑު ކޮންޓްރޯލް ކުރެވިފައި ވިޔަސް، އިމާރާތުން އަދިވެސް ވަރަށް ގަދައަށް ދުން އަރަމުން ދާތީ، އިމާރާތުގެ އެތެރޭގެ ހާލަތު އަދި ދެނެގަނެވޭ ގޮތެއް ނުވެ އެވެ. ދުންގަނޑު މައިތިރިވެ އެތެރޭގެ ހޫނުމިން ދަށްވުމުން އެތެރެއަށް ވަދެ ބަލައި ފާސްކުރާ އިރު، މަރުވެފައިވާ އިތުރު ބަޔަކު ފެނުމަކީ އެކަށީގެންވާ ކަމެއް ކަމަށް ފުލުހުން ބުނެ އެވެ.

މަރުވެފައިވާ 63 މީހެއްގެ ހަށިގަނޑު މިހާތަނަށް ފެނިފައިވާ އިރު، އޭގެ ތެރެއިން ބައެއް މީހުންގެ ހަށިގަނޑު ހުރީ ކާކުކަން ވަކިކުރަން ދަތިވާ ވަރަށް އަނދައިފަ އެވެ. އަލިފާނުގެ ސަބަބުން ހަށިގަނޑުގެ އެކި ތަންތަން ފިހިފައިވާ 43 މީހަކާއި ދުމުގެ އަސަރުކޮށް ނޭވާ އަށް އުނދަގޫވާ އެތައް ބަޔަކު ހޮސްޕިޓަލަށް ގެންގޮސް މިހާރު ފަރުވާ ދެމުން އަންނަ ކަމަށް ފުލުހުން ބުންޏެވެ.

މަންޒަރު ދުށް މީހުން ބުނި ގޮތުގައި އިމާރާތުގައި އެންމެ ފުރަތަމަ ރޯވީ ތިރީ ބުރީގަ އެވެ. އަދި ރޯވެ އަނދަމުން ދިޔަ އަލިފާންގަނޑު މަތީ ބުރިތަކަށް ފެތުރެން ފެށުމާ އެކު، ފުރާނަ ސަލާމަތް ކުރުމުގެ ގޮތުން ބައެއް މީހުން ވަނީ ތިން ވަނަ ބުރިންނާއި ހަތަރު ވަނަ ބުރިން ވެސް ތިރިއަށް ފުންމާލައިފަ އެވެ. އޭގެ ތެރެއިން ބައެއް މީހުން ވަނީ މަރުވެފަ އެވެ.

ދެކުނު އެފްރިކާ ސަރުކާރުން ބުނި ގޮތުގައި އަލިފާން ރޯވި އިމާރާތަކީ، ގިނަ ދުވަސްވުމުގެ ސަބަބުން މީހުން ހުސްކޮށް ބޭނުން ނުކުރާ ތަނެއްގެ ގޮތުގައި ދޫކޮށްލާފައި ހުރި ފަޅު އިމާރާތެކެވެ. ނަމަވެސް އެތަން ބަލަހައްޓާނެ ބަޔަކު ނެތުމުން، ބޯހިޔާވަހިކަމެއް ނެތް ގިނަ އަދަދެއްގެ ބަޔަކު އެ ތަނުގައި އަމިއްލަ އަށް ދިރިއުޅެމުން އަންނަތާ ދެތިން އަހަރުވެދާނެ އެވެ.

އެ އިމާރާތުގެ ތެރޭގައި 200 އަށް ވުރެ ގިނަ ފަގީރުން އުޅޭނެ ކަމަށް ލަފާކުރެވޭ ކަމަށް އެ ސަރަހައްދުގައި ދިރިއުޅޭ އާންމުން ބުނެ އެވެ. އެ އިމާރާތުގައި ދިރިއުޅޭ މީހުންގެ ފުރިހަމަ މައުލޫމާތު އެނގޭނެ ރަސްމީ އެއްވެސް ލިޔެކިޔުމެއް ނެތުމުން، އަލިފާނުގެ ހާދިސާގައި ގެއްލިފައިވަނީ ކިތައް މީހުން ކަމެއް އަދި އެއީ ކޮން ބައެއްކަން ވެސް ދެނެގަތުން އުނދަގޫވާނެ އެވެ.

ޖޮހަނަސްބާގްގެ އިމަޖެންސީ ޚިދުމަތްތަކާ ބެހޭ އިދާރާ އިން ބުނި ގޮތުގައި އެ އިމާރާތުގައި އަލިފާން ރޯވެފައިވާ ކަމުގެ ރިޕޯޓް ލިބުނީ ރޭ މެންދަމުން އަލިވެ 1:30 ހިނގި ތަނާ އެވެ. ނަމަވެސް އަލިފާން ރޯވާން މެދުވެރިވި ސަބަބެއް މިހާތަނަށް ދެނެނުގަނެވޭ ކަމަށާއި އެކަން ދެނެގަތުމަށް އެ ހާދިސާ ތަހުގީގު ކުރަމުން އަންނަ ކަމަށް ވެސް އެ އިދާރާ އިން ބުންޏެވެ.