ސުވާލު އުފެދުނު ޕެނަލްޓީއަކުން އެތުލެޓިކޯއިން ޗެމްޕިއަން ރެއާލް ބަލިކޮށްފި

މެޑްރިޑް (މެއި 9) - ސުވާލު އުފެދުނު ޕެނަލްޓީ އަކުން ޖެހި ލަނޑަކާއެކު، ޗެމްޕިއަން ރެއާލް މެޑްރިޑްގެ މައްޗަށް އެތުލެޓިކޯ މެޑްރިޑުން ކާމިޔާބު ހޯދައިފި އެވެ.

މިދިޔަ ހަފުތާގައި ކުޅުނު މެޗުން ލަލީގާގެ ތަށި އުފުލާލި ރެއާލް އިން، ރޭ އެޓީމުގެ އަމިއްލަ ސިޓީގެ ވާދަވެރި ކްލަބާ ދެކޮޅަށް ނުކުތީ ބަދަލުތަކާއެކު އެވެ. އެއްވަނަ ގޯލް ކީޕަރު ޓިބޯ ކޯޓްއާގެ ބަދަލުގައި ދެވަނަ ކީޕަރު އެންޑްރީ ލުނިން އަށް ކޯޗު ކާލޯ އަންޗެލޮޓީ ފުރުސަތު ދިނެވެ. އަދި ސްޓާ ފޯވާޑް ކަރީމް ބެންޒެމާގެ ބަދަލުގައި މެޗުން ފުރުސަތު ދިނީ ލުކަ ޔޯވިޗު އަށެވެ.

އެތުލެޓިކޯގެ ވަންޑާ މެޓްރޯޕޮލިޓާނޯ ސްޓޭޑިއަމްގައި ކުޅުނު މެޗުގައި އެޓީމުގެ ލަނޑު ޔެނިކް ކަރެސްކޯ ޖެހީ ސުވާލު އުފެދުނު ޕެނަލްޓީ އަކުންނެވެ. އެތުލެޓިކޯގެ މެތިއުސް ކުންޔާ އަށް ރެއާލްގެ ޑިފެންޑަރު ޖީސަސް ވަލޭހޯ ފައުލު ކުރިކަމަށް ބުނެ ދިން ޕެނަލްޓީ އާމެދު ސްޕެއިންގެ ކުރީގެ ރެފްރީ އަލްފަންސޯ ޕެރޭޒް ބުރުލް ވަނީ ސުވާލު އުފައްދައިފަ އެވެ.

ލަލީގާގެ ގިނަ މެޗުތަކެއްގައި ކުރިން ރެފްރީކަން ކުރި ޕެރޭޒް ބުނީ އެއީ ޕެނަލްޓީއެއް ނޫން ކަމަށެވެ.

"ޖެހިލާފައިންލެ ވަރަށް ކުޑަ، އޭނާ ވަރަށް ކުޑަކުޑަކޮށް ނޫނީ ހިފަހައްޓާފަ އެއް ނެތް. ކުޅުންތެރިޔަކު އެވަރުގެ ކަމަކުން ނުވެއްޓޭނެ،" ޕެރޭޒް ބުންޏެވެ.

""ކުންޔާ އަށް ބޯޅަ އާ ހަމައަށް ދިއުމުގެ އެއްވެސް ފުރުސަތެއް ނެތް، ވަލޭހޯ އޭނާ ހިފަހައްޓާއިރު ވެސް ކުންޔާ ދަނީ ވެއްޓެން." .މެޗުން އެތުލެޓިކޯ މޮޅުވުމުން އެޓީމު ވަނީ ޗެމްޕިއަންސް ލީގު ޖާގަ ހޯދުމާ ގާތަށް ޖެހިލާފަ އެވެ. ޗެމްޕިއަންސް ލީގަށް އެތުލެޓިކޯ ކޮލިފައި ކޮށް ނުދެވިއްޖެނަމަ އެޓީމުގެ ކޯޗު ކަމުން ޑިއޭގޯ ސިމިއޯނީ ވަކިވާނެ މީޑިއާ ރިޕޯޓްތައް ބުނެ އެވެ.