އެތުލެޓިކޯއާ އެއްވަރުކޮށް ސެވިއްޔާ ޗެމްޕިއަންސް ލީގަށް

މެޑްރިޑް (އޭޕްރީލް 16) - ފަހަތުން އަރައި އެތުލެޓިކޯ މެޑްރިޑާ އެއްވަރުކޮށް، ސެވިއްޔާއިން ޔޫއެފާ ޗެމްޕިއަންސް ލީގުގެ ޖާގައެއް ކަށަވަރުކޮށްފި އެވެ.

ބާކީ އެއް މެޗު އޮއްވައި ސެވިއްޔާއިން ޗެމްޕިއަންސް ލީގު ޖާގަ ކަށަވަރު ކުރީ ހަތަރުވަނަ ހޯދައިގެންނެވެ. އެޓީމަށް ލިބިފައި ވަނީ 67 ޕޮއިންޓެވެ. ތިންވަނައިގައި އެތުލެޓިކޯ އަށް 68 ޕޮއިންޓެވެ.

މެޑްރިޑްގެ ވަންޑާމެޓްރޯ ޕޮލިޓާނޯ ސްޓޭޑިއަމްގައި ކުޅުނު މެޗުގައި ފުރަތަމަ ލީޑް ނެގީ އެތުލެޓިކޯގެ ހޯޒޭ ހިމެނޭޒް އެވެ. މެޗުގެ 30 ވަނަ މިނެޓްގައި އޭނާ ލަނޑު ޖެހީ ޔެނިކް ކަރެސްކޯ ތަނަވަސްކޮށް ދިން ފުރުސަތަކުންނެވެ.

މެޗުގެ ފުރިހަމަ ވަގުތު ހަމަވާން ފަސް މިނެޓަށް ވެފައި ވަނިކޮށް ސެވިއްޔާ އަށް ނަތީޖާ ހަމަހަމަ ކޮށްދިނީ ޔޫސުފް އެން ނެސޭރީ އެވެ.

ފަސްވަނައިގައި އޮތް ރެއާލް ބެޓިސް ރޭ ވަނީ ގްރަނާޑާ އަތުން 2-0 ން މޮޅުވެފަ އެވެ. އެޓީމަށް ގަދަ ހަތަރަކަށް ވަދެވޭކަށް ނެތެވެ. ބާކީ އޮތް މެޗުން އެޓީމު މޮޅުވިޔަސް ލިބޭނީ 67 ޕޮއިންޓެވެ. އެކަމަކު ސެވިއްޔާ އާއި ބެޓިސްގެ ހެޑްޓްހެޑަށް ބަލައިގެން ސެވިއްޔާ އަށް ކުރި ލިބޭތީ އެޓީމު އޮތީ ބެޓިސް އަށް ވުރެ ކުރީގަ އެވެ.

ލީގު ޗެމްޕިއަން ރެއާލް މެޑްރިޑާއި ދެވަނައިގައި އޮތް ބާސެލޯނާ ރޭ ކުޅުނު މެޗުތަކުން ވީ އެއްވަރެވެ. ގެޓާފޭ އާދެކޮޅަށް ބާސާ ކުޅުނު މެޗު ނިމުނީ ލަނޑެއް ނުޖެހި އެވެ. ކާޑިޒް އާ ދެކޮޅަށް ރެއާލް ކުޅުނު މެޗު އެއްވަރުވީ 1-1 ންނެވެ.

މެޗު ފެށިގެން ފަސްވަނަ ވަނަ މިނެޓްގައި މަރިއާނޯ ޑިއަޒް ރެއާލް އަށް ލީޑް ނަގައިދިނެވެ. ކާޑިޒް އަށް މެޗުގެ ނަތީޖާ ހަމަހަމަ ކޮށްދިނީ ސޮބްރިނޯ އެވެ. ދެވަނަ ހާފުގައި ނަތީޖާ ބަދަލުކޮށްލަން ކާޑިޒްގެ އަލްވާރޯ ނެގްރޭޑޯ އަށް ޕެނަލްޓީއެއް ލިބުނެވެ. އެކަމަކު އޭނާ ފޮނުވާލި ޕެނަލްޓީ ރެއާލްގެ ކީޕަރު އަންޑްރޭ ލުނިން ދިފާއު ކުރި އެވެ.

ރޭގެ މެޗުގައި ބަދަލު ކުޅުންތެރިޔެއްގެ ގޮތުގައި ރެއާލްގެ ފޯވާޑް އެޑެން ހަޒާޑް ކުޅެން ނުކުތެވެ. އެއީ ފެބްރުއަރީގެ ފަހުން ރެއާލްގައި އޭނާ ކުޅުނު ފުރަތަމަ މެޗެވެ.