ފިތުރު އީދު ވާނީ ހޯމަދުވަހަށް ކަން ހިސާބުތަކުން ދައްކާ

މި ހިނގާ ބަރަކާތްތެރި ރަމަޟާން މަސް ވާނީ 30 ދުވަހުގެ މަހަކަށް ކަމުގައި އިތުބާރު ހުރި ފަލަކީ ހިސާބު ކަށަވަރުކޮށްދެ އެވެ.

މިހެން މި ދެންނެވީ މި ހިނގާ ރަމަޟާން މަހުގެ 29 ވަނަ ދުވަހުގެ އިރުއޮއްސުމުގެ ކުރިން އިސްލާމީ ހުރިހާ ގައުމަކަށް ވެސް ހަނދު އޮއްސޭނެ ކަމަށް ވާތީ އެވެ. ފަލަކީ ހިސާބުން ދައްކާގޮތުގައި، ރާއްޖެ އަށް އެ ދުވަހުގެ އިރުއޮއްސުމުގެ 17 މިނެޓު ކުރިން ހަނދު އޮއްސެ އެވެ. މައްކާ އަށް އެ ދުވަހުގެ އިރުއޮއްސުމުގެ 15 މިނެޓު ކުރިން، މިސުރަށް އިރުއޮއްސުމުގެ 15 މިނެޓު ކުރިން، ތުރުކީ އަށް އިރުއޮއްސުމުގެ 17 މިނެޓު ކުރިން، މޮރޮކޯ އަށް އިރުއޮއްސުމުގެ 10 މިނެޓު ކުރިން ހަނދު އޮއްސޭ ކަމަށް ހިސާބުން ދައްކަ އެވެ.

އެއްވެސް ގައުމަކަށް މި މަހުގެ 29 ވަނަ ދުވަހުގެ ރޭ ހަނދު ފެނުމުގެ ފުރުސަތެއް ނޯންނާނެކަން ޔަގީން ވާތީ، ވިދިގެން އަންނަ ދުވަސްވާނީ ރަމަޟާން މަހުގެ 30 ވަނަ ދުވަހަށެވެ. އަދި ހުރިހާ ގައުމަކަށް ވެސް ފިތުރު އީދު ވާނީ ވިދިގެން އަންނަ ދުވަސް ކަމުގައިވާ މެއި މަހުގެ 2 ވާ ހޯމަ ދުވަހެވެ.