މަރުގެ ދައުވާލިބޭ ކުއްޖާ ގޭބަންދުގައި ބަހައްޓަން ނިންމި މައްސަލަ ސުޕްރީމް ކޯޓަށް

ހުޅުމާލޭގައި ކުޑަކުއްޖަކު ރަހީނުކޮށް، މަރާލުމުގެ ދައުވާލިބޭ ކުއްޖާ ގޭބަންދުގައި ބަހައްޓަން ނިންމި ނިންމުމަށް ހައި ކޯޓުން ތާއީދުކުރި މައްސަލަ ސުޕްރީމް ކޯޓުގައި އިސްތިއުނާފްކުރަން ނިންމައިފި އެވެ.

ހުޅުމާލޭގައި މިދިޔަ އަހަރުގެ ޖޫން މަހު 13 އަހަރުގެ ކުއްޖަކު ރަހީނުކޮށް، މަރާލުމަށް ފަހު ފޮއްޓަކަށް ލައިގެން ގެންގޮސް އެއްލާލި މައްސަލާގައި ދައުވާލިބޭ ކުއްޖާ ގޭބަންދަށް ބަދަލުކުރަން ޖުވެނައިލް ކޯޓުން ނިންމި ނިންމުން ހައި ކޯޓުން އިއްޔެ ވަނީ ދަމަހައްޓައިފަ އެވެ. އޭގެކުރިން ވެސް އެ ނިންމުން ހައި ކޯޓުން ދެމެހެއްޓި އެވެ.

ޕްރޮސެކިއުޓާ ޖެނެރަލްގެ އޮފީހުން ބުނީ އެ މައްސަލަ އިސްތިއުނާފް ކުރަން މާދަމާ ސުޕްރީމް ކޯޓަށް ހުށަހަޅާނެ ކަމަށެވެ.

އެ މައްސަލަ ސުޕްރީމް ކޯޓުގައި އިސްތިއުނާފް ކުރަން ނިންމިއިރު، ސުޕްރީމް ކޯޓުން މިދިޔަ މަހު ވަނީ އެ ކުއްޖާ ގޭ ބަންދަށް ބަދަލުކުރީ ގޯސްކޮށް ކަމަށް ހުކުމްކޮށްފަ އެވެ. އެކަމަކު އޭރު ޖުވެނައިލް ކޯޓުގެ އަމުރުގެ މުއްދަތު ހަމަވެފައިވާތީ އެ ކުއްޖާ ޖަލު ބަންދަށް ބަދަލު ކުރާކަށް ސުޕްރީމް ކޯޓުން އަމުރެއް ނުކުރެ އެވެ.

އޭގެފަހުން އަނެއްކާވެސް އެ ކުއްޖާގެ ބަންދު މުރާޖާ ކުރުމަށްފަހު ޖުވެނައިލް ކޯޓުން ނިންމީ އަނެއްކާވެސް އެ ކުއްޖާ ގޭ ބަންދުގައި ބެހެއްޓުމަށެވެ. އެ ނިންމުން ހައި ކޯޓުން އިއްޔެ ވަނީ ދަމަހައްޓައިފަ އެވެ.