އުމުރުން 15 އަހަރު ނުވާ ކުދިންގެ ފޯނުތައް ބަލަން އަމުރު ނުލިބޭ މައްސަލާގައި ސުޕްރީމް ކޯޓަށް ނުދާން ނިންމައިފި

ކުށްކުރާ ކުދިންގެ ތެރެއިން 15 އަހަރުނުވާ ކުދިންގެ މޮބައިލް ފޯނު ފަދަ ވަސީލަތްތައް ބަލަން ކޯޓު އަމުރު ނުދެވޭނެ ކަމަށް ހައި ކޯޓުން ނިންމި މައްސަލަ ސުޕްރީމް ކޯޓުގައި އިސްތިއުނާފް ނުކުރަން ދައުލަތުން ނިންމައިފި އެވެ.

ކުޑަކުދިންގެ އަދުލުގެ ގާނޫނު އޮންނަ ގޮތުން އުމުރުން 15 އަހަރުނުވާ ކުދިންނަކީ ކުށުގެ ޒިންމާ އުފުލަން ޖެހޭ ބައެއް ނޫނެވެ. އެހެންވެ، 14 އަހަރުގެ ކުއްޖަކަށް ކުރެވުނު ތުހުމަތުތަކަކާ ގުޅިގެން އެ ކުއްޖާގެ ފޯނު ބަލަން ފުލުހުން ކޯޓު އަމުރަކަށް އެދުމުން ޖުވެނައިލް ކޯޓުން ނިންމީ އަމުރު ނުދެވޭނެ ކަމަށެވެ.

އެނގިފައިވާ ގޮތުގައި އެ މައްސަލާގައި ތުހުމަތު ކުރެވެނީ ކުޑަކުއްޖަކަށް ޖިންސީ ގޯނާ ކުރުމުގެ ތުހުމަތެވެ. އެ ކުއްޖާގެ ފޯނު ހިފަހައްޓައި، ފޯނު ބެލުމުގެ އަމުރަކަށް ފުލުހުން އެދުނީ ވެސް އެ ކުއްޖާގެ މައްޗަށް 14 ތުހުމަތެއް ކުރުމަށް ފަހު އެވެ.

ނަމަވެސް އެ މައްސަލަ ދައުލަތުން އިސްތިއުނާފް ކުރުމުން އެ ނިންމުމަށް ހައި ކޯޓުން މިދިޔަ ހަފުތާގައިވަނީ ޖުވެނައިލް ކޯޓުގެ ނިންމުމަށް ތާއީދުކޮށްފަ އެވެ. ހައި ކޯޓުން ވެސް ނިންމީ ޖިނާއީ މަސްއޫލިއްޔަތު އުފުލަން ނުޖެހޭ އުމުރުގެ ކުދިންނަށް ކުރެވޭ ތުހުމަތުތަކުގައި ކޯޓުތަކަށް އަމުރު ނުނެރެވޭނެ ކަމަށެވެ.

ހައި ކޯޓުގެ އެ ނިންމުން ސުޕްރީމް ކޯޓުގައި އިސްތިއުނާފް ނުކުރަން ނިންމާފައިވާކަން ޕްރޮސެކިއުޓާ ޖެނެރަލްގެ އޮފީހުން ކަށަވަރުކޮށްދިނެވެ. ނަމަވެސް އެގޮތަށް ނިންމި ސަބަބެއް ނުބުނެ އެވެ.

ރާއްޖޭގައި ކުރިން އޮންނަ ގޮތުން އުމުރުން 12 އަހަރުގެ ކުދިން ހުރިހާ ކުށްތަކެއްގެ ޖިނާއީ މަސްއޫލިއްޔަތު އުފުލަން ޖެހެ އެވެ. ނަމަވެސް އެ އުސޫލު ބަދަލުކޮށް، އެ އުމުރު 15 އަހަރަށް މަތިކުރީ 2019 ވަނަ އަހަރު ފާސްކުރި ޤާނޫނުގެ ދަށުންނެވެ.

މި ސަރުކާރުން ވަނީ އެ އުމުރު 12 އަހަރަށް ދަށްކުރަން ނިންމައިފަ އެވެ. ނަމަވެސް އެކަމާ ބެހޭ ބިލެއް މިހާތަނަށް މަޖިލީހަށް ހުށަހަޅާފައެއް ނުވެ އެވެ.