މާޒިޔާ ބަލިކޮށް ޕްރެޒިޑެންޓްސް ކަޕްގެ ޗެމްޕިއަންކަން ވެލެންސިއާ ހޯދައިފި

ރ. އަލިފުށީގައި ކުޅުނު ފައިނަލް މެޗުގައި އިތުރު ވަގުތުގެ ދެހާފު ކުޅެ މާޒިޔާގެ މައްޗަށް 2-1 ގެ ނަތީޖާ އަކުން ކާމިޔާބު ހޯދައި ޕްރެޒިޑެންޓްސް ކަޕުގެ ޗެމްޕިއަންކަން ވެލެންސިއާ މިއަދު ހޯދައިފި އެވެ.

ސީޒަނަށް ދުރާލައި ތައްޔާރުވި މާޒިޔާގެ މައްޗަށް ވެލެންސިއާ އިން ކާމިޔާބު ހޯދުމަށް، އެ ޓީމުގެ ފުރަތަމަ ލަނޑު މެޗުގެ ވަރަށް ކުރީކޮޅު ޖެހީ ޑިފެންޑަރު ޑަކްސަން ޕުސްލާސް އެވެ.

މެޗުގެ ކުރީކޮޅު ލަނޑު ވަންނަމަވެސް، އަވަހަށް ރިކާވާވެ ގޯލް ޖެހުމަށް މާޒިޔާ އިން މަސައްކަތް ކުރި އެވެ. އެ ޓީމުން ނެގި ހުރަހެއްގައި ސަމޫހް އަލީ (ސަމުއްޓޭ) ގޯލްގެ ދަނޑި ކައިރީގައި ހުރެފައި ބޮލުން ފޮނުވައިލި ބޯޅަ ދިޔައީ ބޭރަށެވެ.

މުބާރާތުގެ ޗެމްޕިއަންކަން ވެލެންސިއާ ހޯދީ އެއްވެސް މެޗަކުން ބަލިނުވެ އެވެ. މިއީ ޕްރެޒިޑެންޓްސް ކަޕް ވެލެންސިއާ ހޯދި ހަ ވަނަ ފަހަރެވެ. ވެލެންސިއާ އިން އެންމެ ފަހުން ތަށި ހޯދީ މީގެ 14 އަހަރު ކުރިން 2008 ވަނަ އަހަރު އެވެ.

މެޗުގެ 29 ވަނަ މިނެޓްގައި މާޒިޔާ އަށް ލިބުނު ކޯނަރުން ތަނަވަސްވި ބޯޅަ ޖަހަން ހަމްޒާ މުހައްމަދު (ހަމްޕު) އަށް ވެސް ފުރުސަތު ލިބުނެވެ. އޭނާ ބޮލުން ފޮނުވާލި ބޯޅަ ބާރެއް ނެތުމުން އެބޯޅަ ގޯލަށް އަމާޒެއް ނުވެ އޭރިއާ ތެރެއަށް ވެއްޓުނީ އެވެ. ދެން އެބޯޅަ ޖަހަން މަސައްކަތް ކުރީ ސަމޫހް އެވެ. އޭނާ ފޮނުވާލި ބޯޅަ ދިޔާއީ ގޯލް ދަނޑި ކައރިން ބޭރަށެވެ.

ވެލެންސިއާގެ ކީޕަރު މުހައްމަދު ފައިސަލް ބެކުން ޖެހި ބޯޅަ ކައުންޓަ އެޓޭކު ފުރުސަތެއްގައި އަލީ ފާސިރު (ސެންޓޭ) މާޒިޔާގެ އޭރިއާގެ ތެރެއަށް ވަދެ ޑިފެންޑަރު ސަމޫހް ކައިރިން ނައްޓައިލި ތަނުން ސެންޓޭ އޭރިއާ ތެރެއަށް ވެއްޓުނެވެ. ވެލެންސިއާގެ ބެންޗުން ޕެނަލްޓީއަކަށް އެޕީލްކުރި ނަމަވެސް ރެފްރީ ނިންމީ ފައުލެއް ކޮށްފައިނުވާ ކަމަށެވެ.

ފުރަތަމަ ހާފުގައި ވެލެންސިއާގެ ޑިފެންޑަރު ޑަކްސަން އަށް ދެފަހަރެއްގެ މަތިން ފަރުވާ ދޭން ޖެހުނެވެ. ފުރަތަމަ އޭނާ އަށް ފަރުވާ ދިނީ ނިތްކުރިމަތި ފަޅައިގެން ދިއުމުންނެވެ. ވެލެންސިއާގެ މެޑިކަލް ޓީމުން ފަރުވާ ދީގެން ވެސް ލޭ މަނާ ނުވާތީ ގައުމީ ޓީމުގެ ޑޮކްޓަރު، އަބްދު ރާފިއު ވެސް ދަނޑަށް އަރައި ވެލެންސިއާގެ މެޑިކަލް ޓީމަށް އެހީތެރިވި އެވެ.

މާޒިޔާއިން މެޗުގެ ނަތީޖާ ހަމަހަމަ ކުރީ 40 ވަނަ މިނެޓްގަ އެވެ. އިބްރާހިމް އައިސަމް (ޓޯނީ) ނެގި ކޯނަރުން އޭރިއާ ތެރެއަށް ހުރަސްވި ބޯޅަ މާޒިޔާގެ މުހައްމަދު އިރުފާން ފައިން ޖައްސާލައި ބޯޅަ ގޯލަށް ވައްދާލި އެވެ. ބޯޅަ ގޯލަށް ވަނީ ކީޕަރު ފައިސަލް އަތްދަށުން ގޮހެވެ. ދެ ޓީމުގެ ކުޅުންތެރިން އޭރިއާ ތެރެއަށް ބޮނޑިވެފައިވުމުން ބޯޅަ ދިޔަގޮތް ފައިސަލަށް ވެސް އޮޅުނީ އެވެ.

މެޗުގެ 53 ވަނަ މިނެޓްގައި މާޒިޔާގެ އައިސަމް އޭރިއާ ތެރެއަށް ވަދެ މަސައްކަތް ކުރީ ޑިފެންޑަރު ޑަކްސަން ކަޓުވައިލުމަށެވެ. ނަމަވެސް ޑަކްސަން ވަނީ އައިސަމް އަތުން ބޯޅަ ހޯދައިފަ އެވެ.

އޭގެ ފަހުން ވެސް މާޒިޔާ އަށް ރަނގަޅު ފުރުސަތެއް ލިބުނެވެ. ހުސއިން ނިހާން (ނިހާޓް) ތަނަވަސްކޮށްދިން ބޯޅަ ކޯނޭލިއަސް ސްޓްވާޓް ފޮނުވާލުމުން އެބޯޅަ އަމާޒުވީ ގޯލްގެ އަރިމަތީ ދާގަނޑަށެވެ. އެކަމަކު ބޯޅަ ދިޔައީ ކީޕަރު ފައިސަލް އަތުގައި ޖެހިފަ އެވެ.

މެޗުގެ 74 ވަނަ މިނެޓްގައި ނާއިޒު ހަސަން (ދާދު) އަށް ހުސް ފުރުސަތެއް ލިބުނެވެ. އޭރިއާގެ ކަނާ ދިމާލުން އޭނާ އަރައި ކުރިއަށް ފޮނުވައިލި ބޯޅަ ކީޕަރު ފައިސަލް ސަލާމަތް ކުރީ އެވެ.

މެޗުގެ 80 ވަނަ މިނެޓްގައި މާޒިޔާގެ ހާފުގެ މެދެއްހާ ހިސާބުން ވެލެންސިއާ އަށް ލިބުނު ހިލޭ ޖެހުމެއްގައި ސެންޓޭ އޭރިއާ ތެރެއަށް ނަގައިދިނުމުން ބޯހާސް މާޓިން ވެއްޓިގެންފައި ބޮލުން ފޮނުވައިލި ބޯޅަ ދިޔައީ ގޯލް ހުރަސް ދަނޑިމަތިން ބޭރަށެވެ.

އެކްސްޓްރާ ޓައިމްގެ ފުރަތަމަ ހާފުގައި ވެލެންސިއާގެ ސެންޓޭ އަށް ފައުލު ކުރުމުން ނާއިޒް ހަސަން (ދާދު) އަށް ރަތް ކާޑު ދައްކައި ދަނޑުން ފޮނުވައިލި އެވެ. އެ ފައުލާ ގުޅިގެން ސެންޓޭ އަށް އަނިޔާވުމުން އޭނާ އިތުރަށް މެޗު ކުރިއަށް ގެންދެވޭ ގޮތެއް ނުވި އެވެ. އޭނާގެ ބަދަލުގައި އިސްމާއީލް އީސާ ކުޅެން އެރުވި އެވެ. ވެލެންސިއާ މެޗުން މޮޅުކޮށްދިން ލަނޑު ބޯހަސް މާޓީން ޖެހީ މާާޒިޔާއިން އެއް ކުޅުންތެރިޔަކު މަދުކޮށް ކުޅމުން ދަނިކޮށެވެ.

އެކްސްޓްރާ ޓައިމްގެ ދެވަނަ ހާފު ފެށުމަށް ދެ ޓީމު ދަނޑަށް ނުކުތް ފަހުން ދެން ކުރިމަތިލާން ޖެހުނީ އެހެން މައްސަލައެކެވެ. ދަނޑުގެ ހަރުކޮށްފައިވާ ލައިޓްތަކުގެ ތެރެއިން ބައެއް ލައިޓް ނުދިއްލޭތީ އެކަށީގެންވާ އައްޔެއް ނެތި ކުޅެން ޖެހުމުން އެ މައްސަލަ ހައްލު ކުރުމަށް ވަގުތު ހޭދަވި ވި އެވެ. އެކްސްޓްރާ ޓައިމް ވެސް ކުޅުނީ އެކަށީގެންވާ ވަރަށް އަލި ނެތި އެވެ.

އެކްސްޓްރާ ޓައިމްގެ ދެވަނަ ހާފު ފެށުމުގެ ކުރިން އިތުރު ލައިޓްތައް ދިއްލޭގޮތްވުމުން އަލި އިތުރަށް ގަދަވި އެވެ. އެކަމަކު މެޗެއްގައި ހުންނަން ޖެހޭ މިންވަރަށް ލައިޓެއް ނެތެވެ.

އެއް ލަނޑުގެ ތަފާތުން މާޒިޔާ ފަހަތުގައި އޮތުމުން ލަނޑު ޖެހުމަށްޓަކައި މުޅި ޓީމުން ކުރިއަރައި ކުޅެން މަސއްކަތް ކުރި އެވެ. އެކްސްޓްރާ ޓައިމްގެ ފަހު ހަތަރު މިނެޓް ވެލެންސިއާ އަށް އިން ވެސް ވަނީ ކުރިއަށް ޖެހި ކުޅެން މަސައްކަތް ކޮށްފަ އެވެ. އޭގެ ސަބަބުން މާޒިޔާގެ ފަހަތަށް ބާރު ބޮޑުވި އެވެ.

ފައިނަލް މެޗުގެ މޮޅު ކުޅުންތެރިޔަކަށް ހޮވުނީ ބޯހާސް މާޓީން އެވެ. މުބާރާތުގެ އެންމެ ގިނަ ލަނޑު ޖެހި ކުޅުންތރިޔާގެ އެވޯޑާއި އެންމެ މޮޅު ކުޅުންތެރިޔާގެ އެވޯޑް ހޯދީ ސެންްޓޭ އެވެ.

ރައީސް އިބްރާހިމް މުހައްމަދު ސޯލިހް ވަޑައިގަންނަވަން އޮތް ރަސްމިއްޔާތަށް، ބަދަލުގައި ނައިބު ރައީސް ފައިސަލް ނަސީމް ވަޑައިގެންނެވީ ރައީސް ކޮވިޑް-19 އަށް ޕޮޒިޓިވް ވުމުންނެވެ.

މި ރަށުގެ ދަނޑުގައި މިއަދު ހަވީރު ކުޅުނު މެޗު ބަލާލަށް ކައިރީ ރަށްރަށުގެ މީހުން ވެސް ވަނީ އަލިފުއްޓަށް ޒިޔާރަތްކޮށްފަ އެވެ.