Roadha Mihaaru
އީރާންގެ ނިއުކްލިއާ ކާރުހާނާގައި ސީސީޓީވީ ހަރުކުރަނީ

އީރާންގެ ނިއުކްލިއާ ކާރުހާނާގައި ސީސީޓީވީ ކެމެރާ ހަރުކުރަނީ

16 ޑިސެމްބަރ 2021

އީރާންގެ ކަރާޖްގައި ހުންނަ ނިއުކްލިއާ ކާރުހާނާގައި ކުރިން ހަރުކޮށްފައި ހުރި ސީސީޓީވީ ކެމެރާތަކުގެ ބަދަލުގައި އާ ކެމެރާ ހަރުކުރުމުގެ ހުއްދަ، އީރާން ސަރުކާރުން ދީފައިވާ ކަމަށް، އެޓޮމިކް ހަކަތައާ ބެހޭ ބައިނަލްއަގުވާމީ އިދާރާ، އައިއޭއީއޭ އިން އިއްޔެ ބުނެފި އެވެ.

އީރާންގެ ކަރާޖްގައި ހުންނަ ނިއުކްލިއާ ކާރުހާނާގައި ކުރިން ހަރުކޮށްފައި ހުރި ސީސީޓީވީ ކެމެރާތަކުގެ ބަދަލުގައި އާ ކެމެރާ ހަރުކުރުމުގެ ހުއްދަ، އީރާން ސަރުކާރުން ދީފައިވާ ކަމަށް، އެޓޮމިކް ހަކަތައާ ބެހޭ ބައިނަލްއަގުވާމީ އިދާރާ، އައިއޭއީއޭ އިން އިއްޔެ ބުނެފި އެވެ.

އެ އިދާރާ އިން ބުނި ގޮތުގައި އީރާނުން ދީފައިވާ ހުއްދައިގެ ދަށުން އެ ކާރުހާނާގައި އާ ކެމެރާތައް ހަރުކުރުމުގެ މަސައްކަތް ވަރަށް އަވަހަށް ފަށާނެ އެވެ. މީގެ ކުރިން އެ ތަނުގައި ހުރި ކެމެރާތައް ހަލާކުވީ. މިދިޔަ ޖޫން މަހުގެ ތެރޭގައި އެ ކާރުހާނާ އަށް، ގޮތް ނޭނގޭ ބަޔަކު ދިން ހަމަލާއެއްގައި ކަމަށް އީރާނުން ބުނެ އެވެ.

އީރާން ސަރުކާރުން ބުނި ގޮތުގައި އެ ކާރުހާނާގައި އާ ކެމެރާތައް ހަރުކުރުމުގެ ހުއްދަ އަލުން ދިނީ ވަކި ބަޔަކު ބުނެގެން ނުވަތަ ވަކި ބައެއްގެ ފިއްތުންތަކެއް ކުރިމަތިވެގެނެއް ނޫނެވެ. އެއީ އީރާނުން އަމިއްލައަށް ދިން ހުއްދައެއް ކަމަށާއި، އެކަމަށް ހުއްދަ ދިނީ، އީރާންގެ ނިއުކްލިއާ މަޝްރޫއާ ބެހޭ ގޮތުން ކުށް ހީތައް ކުރުމުގެ ފުރުސަތު ނުދިނުމުގެ ގޮތުން ކަމަށް ވެސް އީރާނުން ބުނެ އެވެ.

އީރާން ސަރުކާރުން ބުނި ގޮތުގައި ކަރަޖްގައި ހުރި ނިއުކްލިއާ ކާރުހާނާ އަށް ޖޫން މަހުގެ ތެރޭގައި ހަމަލާ ދިނީ އިޒްރޭލުންނެވެ. އަދި އެހާދިސާގެ ފުރިހަމަ ތަހުގީގެއް މިހާރު ހިންގައި ނިމިފައިވާ ކަމަށާއި، އިޒްރޭލުން ދިން އެ ހަމަލާ، އައިއޭއީއޭ އިން ވެސް ކުށްވެރިކޮށްފައިވާ ކަމަށް އީރާނުން ބުނެ އެވެ.

ކަރްޖްގެ ނިއުކްލިއާ ކާރުހާނާގައި، ފާރަލާ ކެމެރާތައް ހަރުކުރުމުގެ ހުއްދަ އީރާން ސަރުކާރުން ދިނުމަކީ، އެ ކާރުހާނާގައި ހިނގާ ކަންތައް ބެލުމުގެ މަސައްކަތަށް ލިބުނު ވަރަށް ބޮޑު ކުރިއެރުމެއް ކަމަށް އައިއޭއީއޭ އިން ބުނެ އެވެ.

އައިއޭއީއޭ އިން އީރާންގެ ނިއުކްލިއާ ކާރުހާނާތަކުގައި ފާރަލާ ކެމެރާތައް ހަރުކޮށްފައި ހުއްޓަސް، އެ ކެމެރާތަކުން ރެކޯޑްކުރެވޭ މަންޒަރާއި އަޑުތައް، އައިއޭއީއޭ އަށް ދިނުން، އީރާންގެ ގާނޫނު ހަދާ މަޖިލީހުން ފާސްކުރި ގާނޫނަކުން މިހާރު ވަނީ މެދުކަނޑާލައިފަ އެވެ.

އީރާނުން ބުނާ ގޮތުގައި އެ ކެމެރާތައް މިހާރު ވެސް ދަނީ ބަރާބަރަށް އެ ސަރަހައްދުގެ މަންޒަރުތަކާއި އަޑުތައް ރެކޯޑް ކުރަމުންނެވެ. ނަމަވެސް އެ މަންޒަރުތަކާއި އަޑުތައް، އައިއޭއީއޭ އަށް ދޭނީ، އެމެރިކާ އިން 2018 ވަނަ އަހަރު އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވައިލުމުން ކަމަށް ވެސް، އެ ގާނޫނުގައި ބުނެފައިވެ އެވެ.

އެމެރިކާ އާއި ވިލާތުގެ ގައުމުތަކުން، 2015 ވަނަ އަހަރު އީރާނާ އެކުގައި ސޮއިކޮށްފައިވާ ނިއުކްލިއާ މުއާހަދާ އިން އެމެރިކާ ވަކިވީ 2018 ވަނަ އަހަރުގެ ތެރޭގަ އެވެ. އެ މުއާހަދާ އިން އެމެރިކާ އަމިއްލަ އަށް ވަކިވުމަށް ފަހު، އީރާނާ ދެކޮޅަށް ދަތިކުރުމުގެ ފިޔަވަޅުތަކެއް އެޅުމާ ގުޅިގެން، އީރާނުން ވަނީ އެ ގައުމުގެ ނިއުކްލިއާ ކާރުހާނާތަކުގައި ޔޫރޭނިއަމް ފައްކާ ކުރުމުގެ މަސައްކަތް އިތުރުކޮށްފަ އެވެ.

މިއަހަރުގެ ކުރީކޮޅު އެމެރިކާގެ ވެރިކަމާ ހަވާލުވެވަޑައިގަތުމަށް ފަހު، ރައީސް ޖޯ ބައިޑެން ނިންމަވާފައިވަނީ، އީރާންގެ ނިއުކްލިއާ މުއާހަދާގައި އަލުން ބައިވެރިވުމަށެވެ. އެކަމާ ބެހޭ ގޮތުން އެ މުއާހަދާގެ ބައިވެރިންގެ މެދުގައި އޮސްޓްރިއާގެ ވިއެނާގައި މިހާރުވެސް އަންނަނީ މަޝްވަރާތައް ކުރަމުންނެވެ.