އީރާނުން އދ. އަށް އެއްބާރުލުން ދޭން ނިންމައިފި

އީރާނުގައި ތަރައްގީކުރަމުން އަންނަ އެ ގައުމުގެ ނިއުކްލިއާ ހަކަތައާ ބެހޭ ޕްރޮގްރާމަށް ފާރަވެރިވުމުގެ ފުރުސަތު، އދ.ގެ އެޓޮމިކް ހަކަތައާ ބެހޭ އިދާރާ، އިންޓަނޭޝަނަލް އެޓޮމިކް އެނާޖީ އޭޖެންސީ (އައިއޭއީއޭ) އަށް އަލުން ދިނުމަށް އެގައުމުން އިއްޔެ ނިންމައިފި އެވެ.

އައިއޭއީއޭގެ ވެރިޔާ ރަފައެލް ގްރޮސީ މިހާރު އީރާނަށް ކުރައްވަމުން ގެންދަވާ ދަތުރުގައި، އީރާންގެ ރައީސް އިބްރާހީމް ރައީސީއާ އިއްޔެ ބައްދަލުކުރެއްވުމަށް ފަހު، ވިދާޅުވި ގޮތުގައި އީރާންގެ ނިއުކްލިއާ އެކުވެނިތަކުގައި ހުރި ސީސީޓީވީ ކެމެރާތައް އަލުން ގުޅައިދިނުމަށް އީރާނުން ވަނީ ނިންމައިފަ އެވެ. އޭގެ އިތުރުން އެ އެކުވެނިތަކުގެ ހަރަކާތްތައް ބެލުމަށް އައިއޭއީއޭގެ ފަރާތުން އެ އެކުވެނިތަކުގައި ހަރުކޮށްފައިވާ އެހެން އާލާތްތައް ވެސް މަސައްކަތް ކުރާ ގޮތް ހަދައިދިނުމަށް، އީރާންގެ ރައީސް މިހާރު ވަނީ ނިންމަވައިފަ އެވެ.

އީރާނުން މިކަމަށް މި އެއްބަސްވީ، އެ ގައުމުގެ ނިއުކްލިއާ މަޝްރޫއުގެ މަސައްކަތްތައް ކުރާ ބިންގަރާސް އެކުވެއްޏެއް ކަމަށްވާ ފޯޑޯއާ ވަރަށް ކައިރި ސަރަހައްދަކުން، 83.7 ޕަސެންޓަށް ފައްކާކޮށްފައިވާ ޔޫރޭނިއަމްގެ ކުނޑިފުއްތަކެއް ފެނިފައިވާ ކަމަށް އައިއޭއީއޭގެ އިންސްޕެކްޓަރުން ބުނެފައިވަނިކޮށެވެ.

ނިއުކްލިއާ ހަތިޔާރު އުފެއްދެނީ އެންމެ ދަށްވެގެން ވެސް 90 ޕަސެންޓަށް ނުވަތަ އެއަށް ވުރެ މަތީ ނިސްބަތަކަށް ޔޫރޭނިއަމް ފައްކާ ކޮށްގެންނެވެ. އެހެންކަމުން، 83.7 ޕަސެންޓަށް ޔޫރޭނިއަމް ފައްކާކޮށްފައިވާ ނަމަ، މަދުވެގެން ދެތިން ދުވަސް ތެރޭގައި ނިއުކްލިއާ ހަތިޔާރެއް އުފެއްދުމުގެ ގާބިލުކަން އީރާނަށް ލިބިގެންވާ ކަމަށް، ދާއިރާގެ ތަޖުރިބާކާރުން ބުނެ އެވެ.

އައިއޭއީއޭގެ ވެރިޔާ ރަފައެލް ގްރޮސީ ވިދާޅުވި ގޮތުގައި އެމެރިކާ އާއި ހުޅަނގުގެ ގައުމުތަކުން އީރާނާ އެކުގައި ގާއިމުކުރަން އުޅުނު ނިއުކްލިއާ މުއާހަދާގެ މަޝްވަރާތައް މެދުކެނޑުމާ ގުޅިގެން، އީރާނުން ވަނީ ނިއުކްލިއާ އެކުވެނިތަކުގައި ހުރި ކެމެރާތައް ބޭނުންނުކުރެވޭ ގޮތް ހަދައިފަ އެވެ. ޖޫން 2022 ގައި، ސީސީޓީވީ ކެމެރާތަކުގެ ވާތައް ވަކިކޮށްލައި، އެ ތަންތަނަށް ފާރަނުލެވޭނެ ގޮތް ހެދުމަށް ފަހު އީރާނުން ވަނީ ޔޫރޭނިއަމް ފައްކާ ކުރުމުގެ މަސައްކަތް ވަރަށް ބޮޑަށް އިތުރުކޮށްފަ އެވެ.

އީރާންގެ ރައީސްގެ އިތުރުން އެ ގައުމުގެ ޚާރިޖީ ވަޒީރު ހުސައިން އާމިރު އަބްދުﷲއާން އާއި އީރާންގެ އެޓޮމިކް ހަކަތައާ ބެހޭ އިދާރާގެ ވެރިޔާ މުހައްމަދު އިސްލާމީއާއާ ބައްދަލުކުރެއްވުމަށް ފަހު، ރަފައޭލް ވިދާޅުވި ގޮތުގައި "މިއީ ހަމައެކަނި ވާހަކަތަކެއް ނޫނެވެ." އީރާންގެ ނިއުކްލިއާ އެކުވެނިތައް ބެލުމުގެ މަސައްކަތް އަލުން ފެށުމަށް، އެ ގައުމުން ވަނީ ފުރިހަމަ ޔަގީންކަން ދީފައި ކަމަށް ރަފައޭލް ވިދާޅުވި އެވެ.