އައިލެންޑް އޭވިއޭޝަންގެ މުވައްޒަފުންގެ އާއިލާތަކަށް ދިއްލީ ދެކޮޅު ދަތުރު 150 ޑޮލަރަށް

އައިލެންޑް އޭވިއޭޝަންގެ މުވައްޒަފުންގެ އާއިލާތަކާއި ރައްޓެހިންނަށް ދިއްލީ އަށް ދާން ހާއްސަ ފެއާތަކެއް ހަމަޖައްސައިފި އެވެ.

އައިލެންޑް އޭވިއޭޝަންގެ މުވައްޒަފުންގެ އާއިލާ އާއި ރައްޓެހިންނަށް ދިއްލީ އަށް ދަތުރުކުރެވޭ މި ފެއާގެ ދަށުން އެ ކުންފުނީގެ މުވައްޒަފުންގެ އާއިލާ އާއި ރައްޓެހިންނަށް 150 ޑޮލަރަށް ދިއްލީ ދެކޮޅު ޓިކެޓް ގަނެވޭނެ އެވެ.

މިފެއާ ކުރިއަށް ދަނީ މި ނޮވެމްބަރު މަހުގެ ނިޔަލަށެވެ.

ރާއްޖެ އާއި ދިއްލީއާ ދެމެދު ސީދާ ދަތުރުތައް ފެށުމާ ގުޅުވައިގެން އިންސްޓަގްރާމުގައި ވެސް އައިލެންޑް އޭވިއޭޝަންގެ މޯލްޑިވިއަން އިން ވަނީ ގިވްއަވޭ ޕްރޮމޯޝަނެއް ކުރިއަށް ގެންގޮސްފަ އެވެ. މި ގިވްއަވޭއިން ހޮވޭ ނަސީބުވެރިއަކަށް ދިއްލީ އަށް ދެކޮޅު ޓިކެޓުގެ އިތުރުން ތިން ދުވަހުގެ ހުރުން ވެސް ލިބުނެވެ.

ކޮވިޑަށް ފަހު އާ މަންޒިލްތަކަށް މޯލްޑިވިއަން އިން އަންނަނީ ދަތުރުތައް ކުރަމުންނެވެ. ދިއްލީ އަށް އަލުން ދަތުރުތައް ފެށީ މިދިޔަ މަހު އެވެ. އެއަށްފަހު ދިއްލީ އަށް ދަތުރުކުރުމާ ގުޅޭ ގިނަ ޕްރޮމޯޝަންތަކެއް މޯލްޑިވިއަން އިން ކުރިއަށް ގެންދިޔަ އެވެ.