ފިޔަ ކޮށާލި ފްލެމިންގޯގެ ހާލު ވަރަށް ދެރަ

ހިޖުރަ ކުރުމުގެ ތެރޭގައި ރާއްޖެ އައި ފްލެމިންގޯތަކުގެ ތެރެއިން ބަޔަކު މީހުން ހިފައި، ފިޔަ ކޮށައި ވިއްކަން މަސައްކަތް ކުރި ފްލެމިންގޯގެ ހާލު ވަރަށް ބޮޑަށް ދެރަވެފައިވާ ކަމަށް އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ) އިން މިރޭ ބުނެފި އެވެ.

އީޕީއޭ އިން ކުރި ޓުވީޓެއްގައި ބުނީ ރިހެބިލިޓޭޓް ކުރަން ޅ. މާކޯ އަށް ގެންދިޔަ އެ ފްލެމިންގޯ އަށް ދެވެން ހުރި ހުރިހާ ފަރުވާއެއް ދެމުން އައި ނަމަވެސް، އޭގެ ހާލު ވަރަށް ބޮޑަށް ދެރަވަމުންދާ ކަމަށެވެ.

ރާއްޖޭގައި މިފަދަ ދޫނިސޫފާސޫފިތަކަށް ފަރުވާ ދެވޭނެ ރަނގަޅު ފެސިލިޓީތައް ވެސް ނެތުމުން ފަރުވާދޭން އުނދަގޫވާ ކަމަށާއި އެއީ މިފަދަ އެއްޗިއްސަށް އަނިޔާ ނުކުރަންވީ ސަބަބެއް ކަމަށް ވެސް އީޕީއޭގެ ޓްވީޓްގައި ބުނެފައިވެ އެވެ.

ހއ. ފިއްލަދޫން އެ އަތޮޅު ބާރަށަށް ދިޔަ ފްލެމިންގޯތަކެއް ހިފައި ވިއްކަން އުޅުނު މައްސަލަ އީޕީއޭ އާއި ފުލުހުން ގުޅިގެން އަންނަނީ ބަލަމުންނެވެ. ފްލެމިންގޯއެއް ވިއްކަން އުޅުނު މީހަކު ހޯދައި އެ ފްލެމިންގޯ ސަރުކާރުގެ ބެލުމުގެ ދަށަށް ގެންދިޔައީ އެވެ.

އެ ފްލެމިންގޯގެ ފިޔަ ކޮށާލާފައި އިނުމުން، އެއަށް އެހެން ދޫނިތަކާ އެކު ހިޖުރަ ކުރުމުގެ ދަތުރުގައި ބައިވެރިނުވެވޭނެތީ އީޕީއޭ އިން އެޔަށް ހިމާޔަތްދީ ރަށަކަށް ގެންދިޔައީ އެވެ.

ފްލެމިންގޯ ގެންދިޔަ މާކޯ އަކީ ބޮޑު ކުޅިއެއް އޮންނަ ރަށެކެވެ. ފްލެމިންގޯތަކަކީ މިފަދަ ތަންތަނުގައި އުޅޭ ދޫނިތަކެކެވެ. އީޕީއޭ އިން ބުނެފައި ވަނީ މާކޯގައި އެ ދޫނި ރިހެބިލިޓޭޓް ކުރަމުން އަންނައިރު، އެޓޯލް ވޮލެންޓިއާސް ޖަމިއްޔާގެ ޖަނާވާރާ ބެހޭ ޑޮކްޓަރެއް މެދުވެރިކޮށް އެ ދޫނީގެ ސިއްހަތު ރަނގަޅުތޯ ބަލަމުން ގެންދާނެ ކަމަށެވެ.

ފްލެމިންގޯ ހިފި މައްސަލަ ހޫނުވީ، ހިޖުރަ ކުރުމުގެ ތެރޭގައި އެ ދޫނީގެ އައިނެއް އައުމުން އެ ދޫނިތައް ހިފައި ވިއްކަން ބަޔަކު މަސައްކަތް ކުރުމުންނެވެ. އެ ދޫނި 30،000ރ. ވިއްކާލަން ވައިބާ ގްރޫޕެއްގައި ޖެހި އެވެ.

މި މައްސަލަ ފެންމަތިވީ ދޫނިތައް ހިޖުރަކުރާ މޫސުން އަންނާތީ ހިޖުރަ ކުރާ ދޫނިތައް ހިފާ ނަމަ ފިޔަވަޅު އަޅާނެ ކަމުގެ އިންޒާރު ދީ އީޕީއޭއިން މި މަހުގެ ނުވަ ވަނަ ދުވަހު ބަޔާނެއް ވެސް ނެރެފައި ވަނިކޮށެވެ.