އުންސުރު ހަމަނުވަނީ ޕީޖީގެ ނޫން ކަމެއް ވެސް ނޭނގޭ: އަފީފް

ކޮވިޑް-19 ގައި ހާލުބޮޑުވާ މީހުންނަށް ހާއްސަ ކޮށްގެން ވެންޓިލޭޓަރުތަކެއް ގެންނަން ދުބާއީގެ ކުންފުންޏަކާ ހަވާލު ކުރުމުގައި، މާލިޔައްތު ގާނޫނާ ހިލާފަށް އަމަލު ކޮށްފައިވާ ކަން އެނގޭ އިރު ވެސް އެ މައްސަލައިގައި ދައުވާ ނުކޮށް ލަސްވާތީ، ރައްޔިތުންގެ މަޖިލީހުގެގެ ވިލުފުށި ދާއިރާގެ އެމްޑީޕީ މެމްބަރު ހަސަން އަފީފު އަނެއްކާ ވެސް ޕްރޮސެކިއުޓާ ޖެނެރަލް ހުސައިން ޝަމީމަށް މިއަދު ވަރަށް ބޮޑަށް ފާޑުވިދާޅުވެއްޖެ އެވެ.

އޮޑިޓާ ޖެނެރަލް އޮފީހަށް އަންނަ އަހަރަށް ކަނޑައަޅާ ބަޖެޓާ މެދު ރައްޔިތުންގެ މަޖިލީހުގައި މިއަދު ކުރި ބަހުސްގަައި އޭނާ ވިދާޅުވީ، އޮޑިޓާ ޖެނެރަލްގެ އޮފީހުން ކުރާ އޮޑިޓްތަކުގައި އިސްލާހު ކުރަން ބުނާ ކަންތައްތައް އިސްލާހު ކުރަމުން ނުދާ ކަމަށެވެ. އޭގެ މިސާލެއްގެ ގޮތުގައި އޭނާ ދެއްކެވީ ހެލްތު މިނިސްޓްރީން ދުބާއީގެ ކުންފުންޏަކާ ހަވާލުކޮށްގެން ވެންޓިލޭޓަރު ގެންނަން މަސައްކަތްކުރި ގޮތުގެ އޮޑިޓެވެ. ދުބާއީގެ ކުންފުންޏަށް 30 މިލިޔަނަށް ވުރެ ގިނަ ރުފިޔާ ދިނީ މާލިއްޔަތު ގާނޫނާ ހިލާފަށް ކަން އޮޑިޓުން ޔަގީންވާ ކަމަށް ވެސް އަފީފު ވިދާޅުވި އެވެ.

"...ނަމަވެސް ޕްރޮސެކިއުޓާ ޖެނެރަލް [ހުސައިން ޝަމީމް] އަކަށް އޭގައި އުންސުރު ހަމައެއް ނުވި. ދެން އަޅުގަނޑަކަށް ނޭނގޭ ޕްރޮސެކިއުޓާ ޖެނެރަލްގެ އުންސުރު ހަމަނުވަނީ ކަމެއް، މި ދަންނަވާ ރިޕޯޓްގެ އުންސުރު ހަމަނުވަނީ ކަމެއް،" އަފީފު ވިދާޅުވި އެވެ.

އޭނާ ވިދާޅުވީ، މިނިވަން މުއައްސަސާތަކުން ވެސް ހިތުހުރި ގޮތަަކަށް ކަންތައްތައް ކޮށްގެން ނުވާނެ ކަމަށާއި އެ ތަންތަނުން ގާނޫނާ އެއްގޮތަށް ކަންތައް ނުކުރާ ނަމަ އިސްލާހު ކުރަން މަޖިލީހުން ފިޔަވަޅު އަޅަން ޖެހޭ ކަމަށެވެ.

ކޮވިޑް-19ގެ ފަރުވާ އަށް ވެންޓިލޭޓަރު ހޯދަން ދުބާއީގެ އެގްޒެކިއުޓާސް ޖެނެރަލް ޓްރޭޑިންއާ ހަވާލުކުރުމުގައި އަމަލު ކޮށްފައިވާ ގޮތް ތަހުގީގުކޮށް، ހެލްތު މިނިސްޓަރު އަބްދުﷲ އަމީނާއި އެ މިނިސްޓްރީގެ އިސް ބައެއްގެ މައްޗަށް ދައުވާ ކޮށްދޭން އެދި އޭސީސީން ޕީޖީ އޮފީހަށް ހުށަހެޅި މައްސަލަ ޕީޖީ އޮފީހުން އަނބުރާ ފޮނުވައިލީ މިދިޔަ އަހަރު އެވެ.

އޭސީސީން އެ މައްސަލަ ބެލީ މަޖިލީހުން އެދިގެން އޮޑިޓާ ޖެނެެރަލްގެ އޮފީހުން ކުރި އޮޑިޓަކަށް ފަހުގަ އެވެ.

އޭސީސީން ޕީޖީގައި އެދުނީ އޭރުގެ ހެލްތު މިނިސްޓަރު އަމީންއާ އެކު 11 މީހެއްގެ މައްޗަށް ދައުވާކޮށްދޭށެވެ. އެއީ، ފައިނޭންޝަލް އެގްޒެކެޓިވް އަހްމަދު އަސްލަމާއި ޑެޕިއުޓީ މިނިސްޓަރު ނިޝާމާ މުހައްމަދާއި ޑެޕިއުޓީ މިނިސްޓަރު ޝިޔާމާ މުހައްމަދާއި ޑިރެކްޓަރު ނައުޝާދު އަލީ އާއި ބިޑް ކޮމިޓީ މެމްބަރު އާމިނަތު ޝައުފާ އާއި އެސިސްޓެންޓް ޑިރެކްޓަރު ފާތުމަތު ލިމްޔާ އާއި ލީގަލް އޮފިސަރު އަލީ ޝިހާމާއި އެސިސްޓެންޓް ޑައިރެކްޓަރު އަބްދުﷲ ހަފީޒާއި އެސިސްޓެންޓް އެޑްމިނިސްޓްރޭޓިވް އޮފިސަރު ހުސައިން ނިޔާޒެވެ.

އެ މައްސަލަ ޕީޖީ އޮފީހުން ފުރަތަމަ އަނބުރާ ފޮނުވައިލީ ދައުވާ ކުރެވޭ ވަރަށް އުންސުރު ހަމަނުވާ ކަމަށް ބުނެފަ އެވެ.