ފްލެޓް އަޅަން އެގްޒިމް ބޭންކުން ލޯނު ނެގީ 1.75 ޕަސެންޓް އިންޓަރެސްޓް ރޭޓުގައި

ހުޅުމާލޭގެ ދެ ވަނަ ފިޔަވަހީގައި 4،000 ފްލެޓު އެޅުމަށް އިންޑިއާގެ އެގްޒިމް ބޭންކުން 227 މިލިއަން ޑޮލަރުގެ ލޯނު ނެގީ، 1.75 ޕަސެންޓް އިންޓަރެސްޓް ރޭޓުގައި ކަމަށް ފިނޭންސް މިނިސްޓްރީން މިއަދު ބުނެފި އެވެ.

ފަހި ދިރިއުޅުން ކޯޕަރޭޝަން (އެފްޑީސީ) އިން އަޅާ ފްލެޓުތަކަށް ސަރުކާރުން ސޮވެރިން ގެރެންޓީ ދީގެން 116.45 މިލިއަން ޑޮލަރު އަދި 110.5 މިލިއަން ޑޮލަރުގެ ލޯނު ނަގާފައިވެ އެވެ. އެ ލޯނުގެ އެއްބަސްވުމުގައި މިދިޔަ މަހުގެ 23 ވަނަ ދުވަހު ވަނީ ސޮއިކޮށްފަ އެވެ.

އެކަމުގެ ތަފްސީލު ހިއްސާކޮށް ފިނޭންސް މިނިސްޓްރީން ބުނީ ދަށް އަދި ލޯވަ/މިޑްލް އިންކަމްގެ ގައުމުތަކުގެ ތެރޭގައި ހިމެނޭ ރާއްޖެއަށް އެގްޒިމް ބޭންކުން ލޯނު ދީފައި ވަނީ 20 އަހަރުގެ ތެރޭގައި އަނބުރާ ދައްކާ ގޮތަށް ކަމަށެވެ. ގްރޭސް ޕީރިއަޑުގެ ގޮތުގައި ފަސް އަހަރު ލިބޭނެ އެވެ.

މިއީ، ހިޔާ ފްލެޓުތައް އެޅުމަށް ކުރީގެ ރައީސް އަބްދުﷲ ޔާމީންގެ ވެރިކަމުގައި ޗައިނާއިން ނެގި ލޯނަށްވުރެ ކުޑަ އިންޓަރެސްޓް ހިމެނޭ ލޯނެކެވެ.

ޔާމީންގެ ސަރުކާރުން އޭރު ލޯނު ނަގާފައިވަނީ އަށް ޕަސެންޓް އިންޓްރެސްޓް ރޭޓެއްގައި 20 އަހަރުން އަނބުރާ ދައްކާ ގޮތަށެވެ.

ސޯޝަލް ހައުސިންގެ ތެރޭގައި ހިމެނޭ އެ ފްލެޓުތަކުގެ މަސައްކަތް އެފްޑީސީން ހަވާލުކޮށްފައިވަނީ އިންޑިއާގެ ދެ ކުންފުންޏަކަށެވެ. އެއީ، ނޭޝަނަލް ބިލްޑިންސް ކޮންސްޓްރަކްޝަން ކުންފުނި (އެންބީސީސީ) އަދި ޖޭއެމްސީ ޕްރޮޖެކްޓްސް އެވެ.

އެންބީސީސީއާ އެކު މަޝްރޫއު ކުރިއަށް ގެންދަން ފެބްރުއަރީ 2، 2021 ގައި އަދިި ޖޭއެމްސީ ޕްރޮޖެކްޓްސްއާ އެކު މާޗު 8، 2021 ގައި ވަނީ ސޮއިކޮށްފަ އެވެ. އެ ކޮންމެ ކުންފުންޏަކަށް ދީފައި ވަނީ 2،000 ފްލެޓު އަޅާށެވެ.

ހުޅުމާލޭގެ ދެ ވަނަ ފިޔަވަހީގައި އިމާރާތްކުރާ 4،000 ހައުސިން ޔުނިޓުގެ މަޝްރޫއުގެ ދަށުން ހަމަޖައްސާފައިވަނީ ދެ ކޮޓަރި އާއި ތިން ކޮޓަރީގެ ތަންތަން ހަދާށެވެ. އޭގެ ތެރޭގައި ދެ ކޮޓަރީގެ ޔުނިޓުތަކުގެ ބޮޑު މިނުގައި 650 އަކަފޫޓު ހުންނާނެ އެވެ. އަދި ތިން ކޮޓަރީގެ ޔުނިޓުތަކުގެ ބޮޑު މިނަކީ 900 އަކަފޫޓެވެ.

އެ ކުންފުނިން އަންނަނީ މި އަހަރުގެ ތެރޭގައި އަމަލީ މަސައްކަތް ފެށުމަށް ތައްޔާރުވަމުންނެވެ.