ރާއްޖެ-ލަންކާ މެޗު ބައްލަވަން ނަމަލް ރާއްޖޭގައި

ސާފް ޗެމްޕިއަންޝިޕް ފުޓުބޯޅަ މުބާރާތުގައި ރާއްޖެ އާއި ސްރީ ލަންކާ މިއަދު ކުޅޭ މެޗު ބައްލަވައިލެއްވުމަށް އެ ގައުމުގެ ސްޕޯޓްސް މިނިސްޓަރު އަދި ލަންކާގެ ބޮޑުވަޒީރު މަހިންދަ ރާޖަޕަކްސާގެ ދަރިކަލުން ނަމަލް ރާޖަޕަކްސާ ރާއްޖެ އަށް ވަޑައިގެންފި އެވެ.

ނަމަލް ކުރެއްވި ޓްވީޓެއްގައި ވިދާޅުވީ، އޭނާ ރާއްޖެ ވަޑައިގަތީ ކެންޔާ އަށް ކުރެއްވި ދަތުރަށް ފަހު އެނބުރި ގައުމަށް ވަޑައިގެންނެވުމުގެ މަގުމަތީގައި ކަމަށެވެ. ރާއްޖޭގައި މަޑުކޮޮށްލައްވާ ވަގުތުކޮޅުގެ ތެރޭގައި ބައްދަލުވުންތަކެއް އޮތް ނަމަވެސް ފުޓުބޯޅަ އަށް ވަގުތުކޮޅެއް ދެއްވޭނެ ކަަމަށް އުއްމީދު ކުރައްވާ ކަމަށްް ޓްވީޓްގައި އޭނާ ވިދާޅުވި އެވެ.

ލަންކާގެ ކެބިނެޓުގައި އެންމެ ޒުވާން އެއް މިނިސްޓަރު ނަމަލް ވަނީ މަގާމާ ހަވާލުވެވަޑައިގަތުމުގެ ކުރިން ވެސް މީގެ ކުރިން އެކި ފަހަރުމަތިން ރާއްޖެ ވަޑައިގެންފަ އެވެ. ރާއްޖޭގެ ސިޔާސީ އެކި ބޭފުޅުންނާ ގާތްގުޅުމެއް ބާއްވަވާ ނަމަލް އަކީ ޔޫތޫ އެންޑް ސްޕޯޓްސް މިނިސްޓަރު އަހުމަދު މަހްލޫފުގެ ވެސް ވަރަށް އަރިސް ބޭފުޅެކެވެ.

ސާފްޗެމްޕިއަންޝިޕްގައި ލަންކާ ޓީމުން މިހާތަނަށް ދެ މެޗު ކުޅުނުއިރު އެއްވެސް މެޗަކުން މޮޅެއް ނުވެ އެވެ. ލަންކާއިން ކުޅުނު ފުރަތަމަ މެޗުގައި ބަންގްލަދޭޝް އަތުން ބަލިމީ 0-1 އިންނެވެ. ދެވަނަ މެޗުގައި ނޭޕާލް އަތުން ބަލިވީ 2-3 އިންނެވެ.

ރާއްޖެ އާއި ލަންކާ ބައްދަލުކުރާ މެޗު އޮންނާނީ މިއަދު ހަވީރު 4:00 ގަ އެވެ. ލަންކާ އިން މިހާތަނަށް ދައްކަމުން އަންނަ ކުޅުމަށް ބަލާއިރު، ފުޓުބޯޅައިގެ މާހިރުން ދެކޭ ގޮތުގައި މިއީ ރާއްޖޭން ފަސޭހަކަމާ އެކު ކާމިޔާބުކުރާނެ މެޗެކެވެ.