ވާދަވެރި ޓީމުތަކުގެ ކޯޗުން ބުނަނީ ރާއްޖޭގެ ގޭމް ވަރުގަދަކަމަށް

ފުރަތަމަ ދުވަހުގެ މެޗުން އެންމެ ފަހުގެ ޗެމްޕިއަން ދިވެހިރާއްޖެ ނޭޕާލް އަތުން ބަލިވުމުން ގިނަ ބަޔަކަށް ލިބުނީ ހައިރާން ކަމެވެ. އެކަމަކު ވާދަވެރި ޓީމުތަކުގެ ކޯޗުން ވަނީ ރާއްޖޭގެ ގޭމަށް ތައުރީފްކޮށްފަ އެވެ.

އިންޑިއާގެ ކޯޗް އީގޯ ސްޓިމަކް ބުނީ، މުބާރާތުގެ ފައިނަލުގެ ކުރިން ކޮންމެ ޓީމަކަށް އޮތް ހަތަރު މެޗުގައި ކޮންމެ ގޮތެއް ވެސް ވެދާނެ ކަމަށެވެ. އޭގެ މިސާލެއްގެ ގޮތުގައި އޭނާ ދެއްކީ ރާއްޖެ އެވެ.

"އަހަރެން ބެލިން އެ މެޗު. އެހާ ވަރަށް ކުޅެފައި ވެސް އެ މީހުން ބަލިވީ، މިހާރު އެ ޓީމު އެ އޮތީ އުނދަގޫ ހާލަތަކަށް ވެއްޓިފައި،" ސްޓިމަކް ބުންޏެވެ.

އިންޑިއާ އާއި ރާއްޖެ ކުޅޭ މެޗު އޮތީ ރައުންޑް ރޮބިން ބުރުގެ އެންމެ ފަހުގެ މެޗުގެ ގޮތުގަ އެވެ. ސްޓިމަކް، ސާފް ޗެމްޕިއަންޝިޕާ މެދު ދެކެނީ އޭޝިއަން ކަޕް ކޮލިފިކޭޝަނަށް އޭނާގެ ޓީމަށް ރަނގަޅު ވޯމްއަޕެއްގެ ގޮތުގަ އެވެ.

ލަންކާގެ ކޯޗް އާމިރު އަލަގިޗް ބުނީ، މޮޅަށް ކުޅުނަސް ނަތީޖާ ކޮންމެ ގޮތަކަށް ވެސް ހިނގައިދާނެ ކަމުގެ ހެއްކަކީ ރާއްޖޭގެ މެޗު ކަމަށެވެ.

"ރާއްޖެ މުޅި ގޭމް ކޮންޓްރޯލް ކުރި. ރާއްޖެއިން 300 ޕަސެންޓަށް ހަމަލާތައް އުފެއްދިި،" ރާއްޖޭގެ ނިއު ރޭޑިއަންޓްގައި ވެސް ކުރިން މަސައްކަތް ކުރި އަލަގިޗް ބުންޏެވެ. "އެކަމަކު އެންމެ އެޓޭކް އަކުން ނޭޕާލް މެޗުން މޮޅުވީ. މިއީ ފުޓްބޯޅައިގައި ވާނެ ގޮތް."

ރާއްޖެއާ ދެކޮޅަށް ކުޅުނު ނޭޕާލްގެ ކޯޗް، އަބްދުﷲ އަލް މުތައިރީ މުޅި ގޭމް ކޮންޓްރޯލް ކުރީ ރާއްޖޭގެ އެންމެ އިސް ފޯވަޑް އަލީ އަޝްފާގް ބަނދެލައިގެންނެވެ. އޭނާ ބުނީ އަޝްފާގް ކުޅުނު މެޗުތަކުގެ ވީޑީއޯ އޭނާ ބެލި ކަމަށެވެ.

"އަޝްފާގަކީ ބޯޅަ ހޯދަން ކޮންމެވެސް ވަރަކަށް ފަހަތަށް ޖެހިލާ ކުޅުންތެރިޔެއް. އެކަން ދެނެގަނެގެން އަހަރެމެން އޭނާ އަށް ލިބޭ ފުރުސަތުތައް ބަންދުކުރީ،" މުތައުރީ ބުންޏެވެ.

މިރޭ، ނޭޕާލް ނުކުންނާނީ ލަންކާއާ ދެކޮޅަށެވެ. މުތައުރީ ބުނީ ރާއްޖެ އަތުން ވީ މޮޅު އޭނާ ހަނދާން ނައްތާލާފައިވާ ކަމަށެވެ. އެ މެޗުން މޮޅުވިޔަސް މިހާރު ހޯދޭނެ އެއްވެސް ފައިދާއެއް ނެތް ކަމަށް މުތައުރީ ބުންޏެވެ. އޭނާ ސިފަކުރީ މިރޭ ލަންކާއާ ދެކޮޅަށް ކުޅޭ މެޗަކީ މުބާރާތުގައި ނޭޕާލްގެ ފުރަތަމަ މެޗުގެ ގޮތުގަ އެވެ.

މިއަދު ހަވީރު ކުޅޭ މެޗުގައި ނުކުންނާނީ ބަންގްލަދޭޝް އާއި އިންޑިއާ އެވެ. މިރޭ ކުޅޭ މެޗުގައި ނުކުންނާނީ ނޭޕާލް އާއި ލަންކާ އެވެ. ރާއްޖެ ދެން ކުޅެން ޖެހޭ މެޗު އޮންނާނީ އަންނަ ބުރާސްފަތި ދުވަހުގެ ރޭ ބަންގްލަދޭޝް އާ ދެކޮޅަށެވެ.