މާފަރުގެ އިހްތިސާސުން ވަކިކުރި ފަޅުގެ ބައެއް ހޯދަން ރައީސަށް ހުށަހަޅަނީ

ނ.މާފަރުގެ ފަޅުތެރޭގައި އޮންނަ ދެ ފަޅުރަށާ އެކު، އެރަށުގެ އިހްތިސާސުން ފަޅުގެ ބޮޑު ބައެއް ވަކިކޮށްފައި އޮންނާތީ އެކަން ބަދަލުކޮށްދިނުމަށް އެދި ރައީސް އިބްރާހިމް މުހައްމަދު ސޯލިހަށް ހުށަހަޅަން އަތޮޅު ކައުންސިލުން ގަރާރެއް ފާސްކޮށްފި އެވެ.

މާފަރުގެ ބޮޑު ފަޅުތެރޭގައި އޮންނަ ދެ ފަޅުރަށް ކަމަށްވާ ބައްތިޖެހި ރަށާއި ފަރުމުލި ކުރިން އޮންނަނީ މާފަރުގެ އިހްތިސާސްގެ ތެރޭގަ އެވެ. ނަމަވެސް ރައީސްގެ ގަރާރަކުން މިދިޔަ އަހަރު ވަނީ އެ ދެ ރަށް ވެސް ހިމެނޭ ގޮތަށް ފަޅުން 80 ހެކްޓަރުގެ ސަރަހައްދެއް ރަށުގެ އިހްތިސާސުން ވަކިކޮށްފަ އެވެ.

މާފަރު ކައުންސިލްގެ ރައީސް އަދި އެ އަތޮޅު ކައުންސިލް މެންބަރު މުހައްމަދު އަދުނާން "މިހާރު" އަށް މިއަދު ވިދާޅުވީ، އެގޮތަށް ރަށުގެ ފަޅުން ބޮޑު ބައެއް އުނިކުރީ ކީއްވެކަން ކައުންސިލަށް ނޭނގޭ ކަމަށެވެ. އެކަން ބަދަލުކުރުމަށް ކައުންސިލްގެ ފަރާތުން މިވަގުތު ވެސް މަސައްކަތްކުރަމުން އަންނަ ކަމަށް އޭނާ ވިދާޅުވި އެވެ.

އަތޮޅު ކައުންސިލުން މިހާރު ނިންމާފައިވަނީ ރަށުގެ ފަޅުގެ ބޮޑު ބައެއް އިހްތިސާސުން އުނިކުރަން ނިންމި ގަރާރު އިސްލާހުކޮށްދިނުމަށް އެދި އަންނަ ހަފްތާގައި ރައީސަށް ގަރާރެއް ހުށަހަޅާށެވެ. އެކަމަށް ފާސްކުރި ގަރާރުގައި ވަނީ ރައީސްގެ ގަރާރު އިސްލާހުކޮށްދެއްވައި ދެ ފަޅުރަށް ވެސް ލިބޭ ގޮތް ހަދައިދޭށެވެ. އަދި ބޮޑު ސަރަހައްދެއް ފަޅުން ގެއްލުމަކީ ރައްޔިތުންނާއި ކައުންސިލްގެ ކަންބޮޑުވުމެއް ކަމަށް ވެސް ގަރާރުގައިވެ އެވެ.

މާފަރު ބިމާއި ފަޅުގައި ސަރުކާރުން އެއްވެސް މަސައްކަތެއް ކުރަންވާނީ މާފަރު ރައްޔިތުންގެ މަޝްވަރާއާއި ރުހުން އޮވެގެން ކަމަށް ދެކޭ ކަމަށާއި އެނޫން ގޮތަކަށް ހިނގާ މަސައްކަތެއްގެ މަންފާ މާޒީގައި ރައްޔިތުންނަށް ލިބިފައި ނުވާ ކަމަށް ވެސް ގަރާރުގައިވެ އެވެ.

"އިދާރީ ދާއިރާތަށް ލާމަރުކަޒީ އުސޫލުން ހިންގުމުގެ ގާނުނަށާ، ގާނޫނޫއަސާސީގައި ދިވެހިރާއްޖޭގެ އިދާރީ ދާއިރާތަށް ހިންގަންވާނީ ލާމަރުކަޒީ އުސޫލުންކަމަށް ބަޔާންކުރާ ކުރުމަށް ސަރުކާރުގެ ވުޒާރާތަކުން ވެސް ބޯލަނބައި ގަދަރުކުރެއްވުމަށް އެ ވުޒާރާތަކަށް ހަނދުމަފުޅުކޮށްދެއްވުން އެދި ދަންނަމެވެ،" ނ. އަތޮޅު ކައުންސިލުން ރައީސަށް ހުށަހަޅަން ފާސްކޮށްފައިވާ ގަރާރުގައި ބުނެފައިވެ އެވެ.

ހއ. ފިއްލަދޫގެ ބައެއްގެ ގޮތުގައި އޮންނަ ދައްޕަރު ވެސް އެރަށުގެ އިހްތިސާސުން ވަކިކުރަން ނިންމުމުން އެ ރަށުން ވަނީ ޝަކުވާކޮށްފަ އެވެ. އެ މައްސަލައިގައި ދައްޕަރު އަލުން ފިއްލަދޫގެ އިހްތިސާސްގެ ދަށަށް ގެނެސްދިނުމަށް ގޮވާލައި ފިއްލަދޫ ރައްޔިތުން ވެސް ވަނީ ޕެޓިޝަނެއްގައި ސޮއިކުރަން ފަށައިފަ އެވެ.