ޝަރުތު ހަމަނުވާ ބަޔަކަށް ދޫކުރި އިންކަމް ސަޕޯޓް އެލަވަންސް އަނބުރާ ހޯދަން އަންގައިފި

ކޮވިޑް-19 އާ ގުޅިގެން ވަޒީފާ ގެއްލުނު މީހުންނަށް ސަރުކާރުން ދޫކުރި އިންކަމް ސަޕޯޓް އެލަވަންސަށް ޝަރުތު ހަމަނުވާ ބަޔަކަށް ދޫކޮށްފައިވާ ހަތަރު ލައްކައަށް ވުރެ ގިނަ ރުފިޔާ އަނބުރާ ހޯދަން އާ އޮޑިޓާ ޖެނެރަލް ހުސައިން ނިޔާޒީ އަންގަވައިފި އެވެ.

އިންކަމް ސަޕޯޓް އެލަވަންސްގެ ގޮތުގައި 5،000ރ. ދޭން މިދިޔަ އަހަރު ސަރުކާރުން ފެށީ ކޮވިޑް-19 އާ ގުޅިގެން ވަޒީފާ ގެއްލުނު މީހުންނާއި މުސާރަ ނުލިބޭ ގޮތަށް ޗުއްޓީއަށް ފޮނުވި މުވައްޒަފުންނަށެވެ. ނަމަވެސް 5،000ރ. އަށް ވުރެ މަތިން އާމްދަނީއެއް ލިބިއްޖެ ނަމަ، އެ މީހަކަށް އިންކަމް ސަޕޯޓް އެލަވަންސް ނުދޭ ގޮތަށް އޮތީ ހަމަޖައްސައިފަ އެވެ.

އިންކަމް ސަޕޯޓް އެލަވަންސް ދޫކުރި ގޮތާ ބެހޭގޮތުން އޮޑިޓާ ޖެނެރަލްގެ އޮފީހުން ތައްޔާރުކުރި އޮޑިޓް ރިޕޯޓުގައިވަނީ އިންކަމް ސަޕޯޓްގެ ގޮތުގައި މިހާތަނަށް 158 މިލިއަން ރުފިޔާ ސަރުކާރުން ދޫކުރިއިރު، އޭގެ ތެރެއިން ޝަރުތު ހަމަނުވާ 217 މީހަކަށް ހަތަރު ލައްކައަށް ވުރެ ގިނަ ރުފިޔާ ދޫކޮށްފައިވާ ކަން ފާހަގަވެފައިވާ ކަމަށެވެ. އެހެންވެ، ފައިސާ ހޯދުމަށްޓަކައި ކުރަންޖެހޭ ކަންކަން ކުރުމަށް އެ ރިޕޯޓުގައި އޮޑިޓާ ޖެނެރަލް ނިޔާޒީ އަންގަވާފައިވެ އެވެ.

އެ ރިޕޯޓުގައިވާ ގޮތުން އިންކަމް ސަޕޯޓް އެލަވަންސް މައިގަނޑު ގޮތެއްގައި ދޫކޮށްފައި ހުރީ އުސޫލުތަކާ އެއްގޮތަށް ކަމަށް ވިޔަސް، އެލަވަންސް ލިބުނީ ޝަރުތު ހަމަވާ މީހުންނަށް ކަން ކަށަވަރު ކުރެވޭނެ ފުރިހަމަ ނިޒާމެއް ގާއިމްވެފައެއް ނެތެވެ. ސަބަބަކީ ޕެންޝަން އޮފީހާއި އިކޮނޮމިކް މިނިސްޓްރީއާ ދެމެދު އެކަން ބެލޭނެ ނިޒާމެއް ގާއިމްވެފައި ނެތުމުންނާއި ނަގުދު ފައިސާ އިން މުސާރަ ލިބޭ މީހުން ވެސް ތިބޭތީ އިތުރު އާމްދަނީއެއް ލިބުނުކަން ނުވަތަ ނޫންކަން ކަށަވަރު ނުވާތީ ކަމަށް އެ ރިޕޯޓުގައިވެ އެވެ.

ރިޕޯޓުގައި ވަނީ އެކަށީގެންވާ ނިޒާމެއް ނެތަސް، އިކޮނޮމިކް މިނިސްޓްރީން އެލަވަންސް ދޫކޮށްފައި ހުރީ އެއިރެއްގެ ހާލަތަށް ރިއާޔަތްކޮށް، މައުލޫމާތުގެ ސައްހަކަން ކަށަވަރު ކުރެވެން ހުރި ގޮތްގޮތަށް ކަށަވަރު ކުރުމަށްފަހު ކަމަށެވެ. އަދި އެލަވަންސަށް އެދި ހުށަހެޅުމަށާއި އެލަވަންސް ދޫކުރުމުގައި ރަނގަޅު ނިޒާމުތަކެއް ގާއިމްވެފައި އޮތް ކަމަށް ވެސް ރިޕޯޓުގައިވެ އެވެ.

ރިޕޯޓުގައިވާ ގޮތުން ޝަރުތު ހަމަވި މީހުންގެ ތެރެއިން 86 ޕަސެންޓް މީހުންނަށް އެލަވަންސް ދީފައިވާއިރު، އޭގެ ތެރެއިން 52 ޕަސެންޓް މީހުންނަކީ ޓޫރިޒަމް ދާއިރާގެ މަސައްކަތްތެރިންނެވެ. ދެވަނައަށް އެންމެ ގިނައީ ދަތުރުފަތުރާ ގުޅުން ހުރި ދާއިރާތަކުގެ މުވައްޒަފުންނެވެ.

އެކަމަކު އެލަވަންސް ލިބުނު ގިނަ މީހުންގެ މާލީ ހާލަތު ރަނގަޅު ނުވާ ކަމަށް ރިޕޯޓުގައިވެ އެވެ. އެގޮތުން ފުރަތަމަ ފިޔަވަހީގައި އެލަވަންސް ލިބުނު މީހުންގެ ތެރެއިން 59 ޕަސެންޓް މީހުންނަށް ދެވަނަ ފިޔަވަހީގައި ވެސް އެލަވަންސް ދީފައިވާ ކަމަށާއި އެހެންވެ، އެ މީހުންނަށް އިތުރު ތަމްރީނު ދިނުމާ އެކު ވަޒީފާގެ ބާޒާރަށް އެ މީހުން ނެރެން އިތުރު މަސައްކަތްތަކެއް ކުރަންޖެހޭ ކަމަށް އެ ރިޕޯޓުގައިވެ އެވެ.