އެންމެ ފަހުގެ ރިވިއުގައި ވެސް ރާއްޖެ އޮތީ އިނގިރޭސިވިލާތުގެ ރެޑް ލިސްޓުގައި

ރާއްޖޭގައި ކޮވިޑްގެ ހާލަތު ވަރަށް ބޮޑަށް ރަނގަޅު ވެފައިވެފައި އޮތް ނަމަވެސް އިނގިރޭސި ވިލާތުން އަނެއްކާ ވެސް ރާއްޖެ ރެޑް ލިސްޓުގައި ހިމަނައިިފި އެވެ.

ޔޫކޭގެ ޓްރެވެލް އެކްސްޕާޓުން ވަނީ މި ފަހަރުގެ ރިވިއުއިން ރާއްޖެ "އެމްބާ" ނުވަތަ "ގްރީން" ލިސްޓަށް އެރުމުގެ ފުރުސަތު ބޮޑު ކަމަށް މިދިޔަ ހަފުތާގައި ލަފާކޮށްފަ އެވެ. އެކަމަކު ރާއްޖެ އަދިވެސް އޮތީ ކޮވިޑާ ހެދި ދަތުރުކުރުން ރައްކާތެރި ނޫން ގައުމުތަކުގެ ތެރޭގަ އެވެ. ރާއްޖޭގެ އިތުރުން އަފްގާނިސްތަނާއި އިންޑިއާ އާއި ނޭޕާލާއި ޕާކިސްތާނާއި ސްރީ ލަންކާ އާއި ޔޫއޭއީ އަދި ތުރުކީ ފަދަ ގައުމުތައް އެ ލިސްޓްގައި ހިމެނެ އެވެ.

ރާއްޖެއަކީ އިނގިރޭސި ވިލާތުން ގިނަ އަދަދެއްގެ ޓޫރިސްޓުން އަންނަ ގައުމަކަށް ވިޔަސް، މިދިޔަ މެއި މަހު ކޮވިޑްގެ ދެވަނަ ރާޅާ އެކު އިނގިރޭސި ވިލާތުން ވަނީ ރާއްޖެއަކީ ދަތުރުކުރުން މަނާ ގައުމެއްގެ ގޮތުގައި ކަނޑައަައިފަ އެވެ. އެހެންވެ ރާއްޖެއިން އިނގިރޭސި ވިލާތަށް ދަތުރުކުރާ އެންމެން ވެސް 10 ދުވަހަށް ކަރަންޓީނު ވާންޖެހޭނެ އެވެ.

ކަނޑައަޅާ ވަކި ހޮޓަލެއްގައި ކަރަންޓީނުވުމުގެ ހުރިހާ ހަރަދެއް ހަމަޖައްސަން ޖެހޭނީ ދަތުރުކުރާ މީހުން އަމިއްލައަށެވެ. މިހެން ވުމުގެ ސަބަބުން ރެޑް ލިސްޓުގައި ހިމެނޭ ގައުމުތަކަށް ދަތުރުކުރާ މީހުން ވަރަށް ބޮޑަށް މަދެވެ.

"އެމްބާ" ލިސްޓުގައި ހިމެނިއްޖެ ނަމަ، ރާއްޖެއިން ދަތުރުކުރާ އެންމެން ވެސް ޖެހޭނީ ގޭގައި 10 ދުވަހު ކަރަންޓީނުވާށެވެ. ގްރީން ލިސްޓަށް އަރާ ގައުމުތަކުން ގޮސް ކަރަންޓީނުވާކަށް ނުޖެހޭނެ އެވެ.

މިވަގުތު ގްރީން ލިސްޓުގައި ހިމެނެނީ ހޮންގް ކޮންގް، ނިއުޒީލެންޑް، އޮސްޓްރޭލިއާ އާއި ސިންގަޕޫރު ފަދަ ގައުމުތަކެވެ. އެމްބާ ލިސްޓުގައި މެލޭޝިއާ، މޮރިޝަސް، ކެނެޑާ، ގްރީސް، ރީޔޫނިއަން އަދި ތައިލެންޑް ވެސް ހިމެނެ އެވެ.