ރަޝިއާ އާއި އިރުމަތީ ޔޫރަޕުން އިތުރު އެއާލައިންތައް ގެންނަން މަޝްވަރާކޮށްފި

ރަޝިއާ އާއި އިރުމަތީ ޔޫރަޕުން ރާއްޖެ އަށް އިތުރު އެއާލައިންތަކެއްގެ ދަތުރުތައްފެށުމުގެ މަޝްވަރާތަކުގައި ޓޫރިޒަމް މިނިސްޓްރީން ބައިވެރިވެއްޖެ އެވެ.

ރަޝިއާގައި ހުންނަ ދިވެހި ޓުއާ އޮޕަރޭޓިން ކުންފުންޏެއް ކަމަށްވާ ރިސޯޓް ލައިފް ހޮލިޑޭސްގައި މިދިޔަ ބުދަ ދުވަހު ބޭއްވި މި މަޝްވަރާ ބައްދަލުވުމުގައި ޓޫރިޒަމް މިނިސްޓަރު ޑރ. އަބްދުﷲ މައުސޫމް ވެސް ބައިވެރިވެވަޑައިގަތެވެ.

ރިސޯޓު ލައިފް ހޮލިޑޭސް އާއި ރެޑްވިންގްސް އެއާލައިން ގުޅިގެން މޮސްކޯ އާއި ރާއްޖެއާ ދެމެދު ސީދާ ދަތުރުތަށް ފެށުމާ ގުޅޭ ގޮތުން ބޭއްވި މި ބައްދަލުވުމުގައި މައުސޫމް ވަނީ ރެޑްވިންގްސް އެއާލައިން ހިންގާ ޒިއާ ޓުއާސް އާއި މޮސްކޯގެ ޒުކޮވުސްކީ އިންޓަނޭޝަނަލް އެއާޕޯޓުގެ ސީއީއޯއާ ރާއްޖޭގެ ޓޫރިޒަމާ ގުޅޭ މައުލޫމާތު ހިއްސާ ކުރައްވައިފަ އެވެ.

މި ބައްދަލުވުމަށް ފަހު ޒިއާޓުއާސް އާއި ރިޒޯޓުލައިފް ހޮލިޑޭސް އާއި ދެމެދު ވަނީ އެމްއޯޔޫއެއްގައި ސޮއި ކޮށްފަ އެވެ. ރިސޯޓު ލައިފުގެ ފަރާތުން އެމްއޯޔޫގައި ސޮއި ކުރެއްވީ އެ ކުންފުނީގެ ސީއީއޯ މުހައްމަދު ޝާޒް ވަލީދެވެ. ޒިއާޓުއާސްގެ ފަރާތުން ސޮއިކުރެއްވީ އެ ކުންފުނީގެ ސީއީއޯ އެވެ.

މައުސޫމް ވަނީ ރާއްޖެއަކީ މަގުބޫލު މަންޒިލަކަށް ހެދުމަށް ރަޝިއާގެ ޓްރެވަލް ޓްރޭޑް ޕާރްޓްނަރުން ކުރަމުން އަންނަ މުހިންމު މަސައްކަތްތަކަށް ޝުކުރު އަދާ ކުރައްވައިފަ އެވެ. އެ ގައުމުން ދަތުރުތައް ފަށާއިރު ހާއްސަކޮށް ގަން އިންޓަނޭޝަނަލް އެއާޕޯޓަށް ދަތުރުތައް ފެށުމަކީ ސަރުކާރުން ވަރަށްބޮޑަށް އެދޭ ކަމެއް ކަމުގައި އޭނާ ފާހަގަކުރެއްވި އެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ރަޝިއާ އާއި އިރުމަތީ ޔޫރަޕުން ރާއްޖެ އަށް އަންނަ ޓޫރިސްޓުންގެ އަދަދު އަންނަނީ އިތުރުވަމުންނެވެ. އެގޮތުން، އިރުމަތީ ޔޫރަޕުން މި އަހަރުގެ މިހާތަނަށް 246،024 ޓޫރިސްޓުން އައިސްފައިވާއިރު، ރަޝިއާ އިން 136،955 ޓޫރިސްޓުން ވަނީ ރާއްޖެ ޒިޔާރަތް ކޮށްފަ އެވެ.