އީއައިބީ ލޯނު ނެގި ފަރާތްތަކަށް ސްޓިމިޔުލަސް ލޯނު ނުލިބޭނެ

މިދިޔަ އަހަރު ޔޫރަޕިއަން އިންވެސްޓްމަންޓް ބޭންކް (އީއައިބީ) މެދުވެރިކޮށް ދޫކުރި ލޯނުތައް ނެގި ފަރާތްތަކަށް މި އަހަރު ދޫކުރާ ސްޓިމިޔުލަސް ލޯނު ނުލިބޭނެ ކަމަށް ސަރުކާރުން ބުނެފި އެވެ.

އީއައިބީ ލޯނަކީ މިދިޔަ އަހަރު ކޮވިޑް-19ގެ ސަބަބުން ވިޔަފާރިތަކަށް ލިބުނު ގެއްލުމުން އަރައިގަތުމަށް އެހީވުމުގެ ގޮތުން ޑިސެމްބަރު މަހު ބީއެމްއެލް މެދުވެރިކޮށް ދޫކުރި ލޯނެވެ. މި ސްކީމުގެ ދަށުން މި އަހަރުގެ މާޗު މަހުގެ ނިޔަލަށް 375 މިލިއަން ރުފިޔާގެ ލޯނު ވަނީ ކުދި އަދި މެދު ފަންތީގެ ވިޔަފާރިތަކަށް ދޫކޮށްފަ އެވެ.

މިއަހަރު އަލަށް ތައާރަފު ކުރި ސްޓިމިޔުލަސް ލޯނަކީ ވެސް އީއައިބީން ފަންޑުކޮށްގެން ދޫކުރާ ލޯނެކެވެ. ނަމަވެސް މި އަހަރު ބީއެމްއެލްގެ އިތުރުން އެސްޑީއެފްސީ މެދުވެރިކޮށް ވެސް މި ލޯނުތައް ދޫކުރާނެ އެވެ. މި ލޯނުތަކަށް އެދެވޭނީ ކުރިން އީއައިބީ ލޯނު ނުލިބޭ ފަރާތްތަކަށް އެކަންޏެވެ.

އިކޮނޮމިކް މިނިސްޓަރު ފައްޔާޒު އިސްމާއިލް "މިހާރު"އަށް ވިދާޅުވީ އީއައިބީ ލޯނު ނެގި ފަރާތްތަކަށް ސްޓިމިޔުލަސް ލޯނު ނުދޭން ނިންމީ ގިނަ ވިޔަފާރިތަކަށް އެ ފުރުސަތު ދިނުމަށް ކަމަށެވެ.

"އަބަދު އެއްބަޔަކަށް ލޯނުތައް ދިނުމުގެ ބަދަލުގައި އިތުރު މީހުންނަށް އެ ފުރުސަތު ދިނުމަށް ނިންމި ގޮތެއް އެއީ. އޭރުވެސް ވަރަށް މަދު ބަޔަކަށް އެ ފުރުސަތު ލިބުނީ،" ފައްޔާޒު ވިދާޅުވި އެވެ.

އިއައިބީ ލޯނުގެ އިތުރުން ވެސް ކޮވިޑް-19އާ ގުޅިގެން ސަރުކާރުން ރިކަވަރީ ލޯނު ސްކީމެއް ތައާރަފު ކުރި އެވެ. މި ސްކީމްގެ ދަށުން ގިނަ އަދަދެއްގެ ވިޔަފާރިތަކުން ލޯނު ނަގާފައިވާއިރު އެ ވިޔަފާރިތަކަށް ސްޓިމިޔުލަސް ލޯނުތަކަށް އެދި ހުށަހެޅޭނެ އެވެ. ނަމަވެސް މި ލޯނު ދޭނީ، ދެ ލޯނު އަނބުރާ ދެއްކޭވަރުގެ ގާބިލުކަން ހުރި ވިޔަފާރިތަކަށް އެކަންޏެވެ.

ސްޓިމިޔުލަސް ލޯނު ޕެކޭޖުގެ ދަށުން ބީއެމްއެލް އިން 10 މިލިއަން ރުފިޔާއާ ހަމައަށް ކޮންމެ ވިޔަފާރިއަކަށް ވެސް ލޯނަށް އެދެވޭނެ އެވެ. އަދި އެސްޑީއެފްސީން އެއް މިލިއަން ރުފިޔާއާ ހަމައަށް ލޯނަށް އެދެވޭނެ އެވެ.

މިލޯނަކީ އެއް އަހަރު ދުވަހުގެ ގްރޭސް ޕީރިއެޑަކާ އެކު ހަ ޕަސެންޓުގެ ކުޑަ އިންޓްރެސްޓް ރޭޓެއްގައި ދޫކުރާ ލޯނެކެވެ. މި ލޯނު ދައްކަން ކޮންމެ ވިޔަފާރިއަކަށް ވެސް ހަތަރު އަހަރުގެ މުއްދަތެއް ދޭނެ އެވެ.

އެސްޑީއެފްސީ މެދުވެރިކޮށް ލޯނު ދޫކުރުމުގައި ބައެއް ވިޔަފާރިތަކަށް އިސްކަން ދޭނެ ކަމަށް ސަރުކާރުން ވަނީ ބުނެފަ އެވެ. އެގޮތުން، ކޮވިޑް-19ގެ ސަބަބުން އެންމެ ބޮޑަށް އަސަރު ކުރި ދާއިރާތަކާއި ރަށްތައް މީގެ ތެރޭގައި ހިމެނެ އެވެ.