އީއައިބީގެ ރިލީފް ލޯނަށް އެދުމުގެ ފުރުސަތު ބީއެމްއެލް އިން އަނެއްކާވެސް ހުޅުވާލައިފި

ބީއެމްއެލް އިން ޔޫރަޕިއަން އިންވެސްޓްމަންޓް ބޭންކް (އީއައިބީ)ގެ ކޮވިޑް ރިލީފް ލޯނަށް އެދި ފޯމު ހުށަހެޅުމުގެ ފުރުސަތު ދެވަނަ ފަހަރަށް ހުޅުވާލައިފި އެވެ.

މި ލޯނު ފަންޑަށް ކަނޑައަޅާފައިވާ އަދަދު ހަމަވުމާ ގުޅިގެން، މިދިޔަ ޑިސެމްބަރު 29 ޑިސެމްބަރު ގައި ވަނީ ފޯމު ހުށަހެޅުމުގެ ފުރުސަތު ވަގުތީ ގޮތުން މެދުކަނޑާލައިފަ އެވެ. އެ ފުރުސަތުގައި ހުށަހެޅި ފޯމުތައް އިވެލުއޭޓު ކުރުމަށް ފަހު ފަންޑުގައި އިތުރު ފައިސާ ހުރުމުން އަލުން އެ ފުރުސަތު ހުޅުވާލީ ކަމަށް ބީއެމްއެލް އިން ބުންޏެވެ.

މި ފަންޑަކީ ރާއްޖޭގެ ކުދި އަދި މެދު ފަންތީގެ ވިޔަފާރިތަކަށް ކޮވިޑް-19ގެ ސަބަބުން ދިމާވި ގެއްލުންތަކަށް އަރައިގަތުމަށް އީއައިބީން ތައާރަފު ކުރި ލޯނެކެވެ. އެގޮތުން، 15.42 މިލިއަން ރުފިޔާ އީއައިބީން ވަނީ ރާއްޖެއަށް ދީފަ އެވެ.

އަލުން ހުޅުވި ފުރުސަތުގެ ދަށުން މި މަހުގެ ނިޔަލަށް ފޯމު ހުށަހެޅޭނެ އެވެ. ލޯނަށް އެދި ހުށަހަޅާ ފޯމާއި އެހެނިހެން ލިޔެ ކިޔުންތައް ބީއެމްއެލްގެ ވެބްސައިޓު eibreliefloan@bml.com.mv އިން ޑައުންލޯޑު ކުރެވޭނެ އެވެ.

އީއައިބީގެ ލޯނަކީ ހަ ޕަސެންޓު އިންޓްރެސްޓް ރޭޓުގައި ދޫކުރާ ލޯނެކެވެ. އަދި ލޯނަށް އަނބުރާ ފައިސާ ދެއްކުމަށް ހަތަރު އަހަރާއި ހަތް އަހަރާ ދެމެދުގެ މުއްދަތެއް ލިބޭނެ އެވެ.