ޗައިނާގެ ލޯފަން މީހަކު އެންމެ އުސް ފަރުބަދައަށް އަރައި ރެކޯޑް ހަދައިފި

ދުނިޔޭގެ އެންމެ އުސް ފަރުދަބަ، އެވަރެސްޓަށް އެރި އޭޝިއާގެ ފުރަތަމަ ލޯފަން މީހާގެ މަގާމު ޗައިނާގެ މީހަކަށް ލިބިއްޖެ އެވެ.

މިދިޔަ މަހުގެ 24 ވަނަ ދުވަހު އިތުރު ތިން ގައިޑުންނާ އެކު އެވަރެސްޓް ފަރުބަދައިގެ އެންމެ މައްޗަށް އެރީ ޗައިނާ ޗޮންގިން ސިޓީ އަށް އުފަން 46 އަހަރުގެ ޒަންގް ހޯންގެވެ. ފަރުބަދައިގެ ކުންނަށް އެރި އޭޝިއާގެ ފުރަތަމަ ލޯފަން މީހާގެ މަގާމު އޭނާ އަށް ލިބުނު އިރު ޒަންގް އަކީ އެވަރެސްޓް ފަރުބަދައިގެ އެންމެ މައްޗަށް ދިޔަ ލޯފަން ތިން ވަނަ މީހާ އެވެ.

ފަރުބަދައިގެ ނޭޕާލް ފަޅިން އަރައި 8،849 މީ މީޓަރަށް އެރުމަށް ފަހު ޒަންގް އާއި އޭނާގެ ޓީމު ފަރުބަދައިން ފޭބީ މެއި މަހުގެ 27 ގަ އެވެ.

މި ކާމިޔާބީއާ ބެހޭ ގޮތުން އޭނާ ބުނީ ނުކުޅެދުންތެރިކަމެއް ހުރުމަކީ ކަމެއްކުރަން އޮތް ހުރަހެއް ނޫންކަން އަބަދު ވެސް ގަބޫލުކުރާ ކަމަށެވެ.

"މީގައި އެންމެ މުހިއްމި ކަމަކީ މީހާގެ އަޒުމް،" ރޮއިޓާސް އަށް ޒަންގް ބުންޏެވެ. "އެ ހިތްވަރާ އެކު މަސައްކަތްކޮށްފި ނަމަ ކޮންމެ ކަމެއް ވެސް ކާމިޔާބުކުރެވިދާނެ."

ޒަންގް ލޯ އަނދިރިވީ އޭނާގެ އެންމެ ޒުވާން އުމުރުގައި 21 އަހަރުގަ އެވެެ. އެއީ ގުލުކޯމާ ބަލީގަ އެވެ. ލޮލުގެ ފެނުން ގެއްލުނަސް އޭނާ އަބަދު ވެސް މަސައްކަތްކުރީ އާންމު ދިރިއުޅެއް އުޅެވޭތޯ އެވެ.

ޒަންގް ބުނި ގޮތުގައި ލޯފަން މީހެއްގެ ގޮތުގައި ދުނިޔޭގެ އެންމެ އުސް ފަރުބަދަ އަށް އަރަން އޭނާ ކުރި މަސައްކަތަށް ހިތްވަރު ހޯދީ ލޯފަން މީހެއްގެ ގޮތުގައި 2001 ގައި ފަރުބަދަ އަށް އެރި އެމެރިކާގެ އެރިކް ވީހެންމޭޔާ ކުރި މަސައްކަތުގެ ވާހަކަ އަޑު އަހައިފަ އެވެ.

ޒަންގް އެވަރެސްޓް ފަރުބަދަ އަރަން ޓްރޭނިން ހެދި އިރު އެންމެ ބޮޑަށް އެހީވެދިނީ ގައިޑެއްގެ ގޮތުގައި މަސައްކަތްކުރާ ރައްޓެއްސެއް ކަމަށްވާ ގިއަންގް ޒީ އެވެ.

"ފުރަތަމަ މިކަން ފެށި އިރު ވަރަށް ބިރުގަތް ވެއްޓިދާނެތީ،" ޒަންގް ބުންޏެވެ. "އެކަމަކު މިއީ ވަރަށް ބުރަ އަދި ނުރައްކާތެރި ކަމަކަށް ވާނެކަން ގަބޫލުކޮށްގެން ހިތްވަރު ލާފައި ކުރި މަސައްކަތުން ކާމިޔާބުވީ."

އެކަން ކާމިޔާބުވުމުން ޒަންގް ވަނީ އޭނާ އަށް އެހީވެދިން ހުރިހާ އެންމެންނަށް ޝުކިރު ވެސް އަދާކޮށްފަ އެވެ.