10 ވަނަ ފަހަރަށް މައުންޓް އެވަރެސްޓަށް އަރައިގެން ރިކޯޑް އާކޮށްފި

ނޭޕާލުގެ އަންހެނަކު 10 ވަނަ ފަހަރަށް، ދުނިޔޭގެ އެންމެ އުސް ފަރުބަދަ، އެވަރެސްޓް މައްޗަށް އަރައިގެން އޭނާ ކުރިން ހެދި ރިކޯޑް އާކޮށްފި އެވެ.

ލަކްޕާ ޝަރްޕާ ކިޔާ 48 އަހަރުގެ އެ މީހާ އަކީ ނުވަ ފަހަރު އެވަރެސްޓަށް އަރައިގެން، އެންމެ ގިނައިން އެ ފަރުބަދަ އަށް އެރި އަންހެން މީހާގެ ރިކޯޑް ހިފަހައްޓަމުން އަންނަ މީހާ އެވެ.

ފިރިހެނަކަށް އެ ރިކޯޑް ހިފަހައްޓަނީ ހަމަ ނޭޕާލުގެ މީހެއް ކަމަށްވާ، ކާމި ރީޓާ ޝަރްޕާ އެވެ. އޭނާ 26 ފަހަރު އެ ފަރުބަދަ މައްޗަށް އެރި އެވެ.

ޝަރްޕާ މީގެ ކުރިން، އެންމެފަހުން އެ ފަރުބަދަ އަށް އެރީ 2018 ގަ އެވެ.

އެވަރެސްޓްގެ އުސްމިން ބެލިފަހުން، 10،657 ފަހަރު އެކި މީހުން އެ ފަރުބަދަ އަށް އަރާފައިވެ އެވެ. އެ ފަރުބަދައިގެ އުސްމިން އެންމެ ފުރަތަަމަ ބެލީ 1953 ގަ އެވެ. އެ ފަރުބަދައިގެ އުސްމިނުގައި 8،849 މީޓަރު ހުރެ އެވެ.

އެކި ފަހަރު މަތިން، އެކި މީހުން އެ ފަރުބަދަ އަށް އެރިއިރު، 311 މީހަކު މަރުވެފައިވެ އެވެ.