އެވަރެސްޓް ފަރުބަދަ އަށް އެރި ފުރަތަމަ އަންހެން މީހާ މަރުވެއްޖެ

ޓޯކިޔޯ (އޮކްޓޯބަރު 23) - އެވަރެސްޓް ފަރުބަދަ އަށް ފުރަތަމަ އެރި އަންހެން މީހާ ޖަޕާނުގެ ޖަންކޯ ޓަބެއި އުމުރުން 77 އަހަރުގައި މަރުވެއްޖެ އެވެ.

ޓަބެއި އެވަރެސްޓަށް އެރީ މެއި، 1975 ގަ އެވެ. އޭރު އޭނާގެ އުމުރުން 35 އަހަރެވެ. ޓަބެއިގެ އާއިލާ އިން ބުނީ މީގެ ހަތަރު އަހަރު ކުރިން އޭނާ އަށް ކެންސަރު ޖެހިފައިވާ ކަމަށާއި އޭނާ މަރުވީ ސައިޓަމާ ސިޓީގެ ހޮސްޕިޓަލެއްގައި ފަރުވާ ދެމުންދަނިކޮށް ކަމަށެވެ.

އެވަރެސްޓް ފަރުބަދަ އަށް އެރުމުގެ އިތުރުން އޭނާ ވަނީ ދުނިޔޭގެ ވަރަށް ގިނަ އުސް ތަންތަނަށް އަރައިފަ އެވެ. އޭނާ އެންމެ ފަހުން އަރާފައި ވަނީ ޖަޕާނުގެ މެދުތެރޭގައި ހުންނަ މައުންޓް ފުޖީ އަށް، ޖުލައި މަހު އެވެ.

"1970 ގެ އަހަރުތަކުގައި ޖަޕާނުގައި އޮންނަނީ ވަޒީފާ އަދާކުރަން ޖެހޭނީ ފިރިހެނުން ކަމަށް ގަބޫލްކޮށްފައި. އެ މީހުން ދެކެނީ އަންހެނުންނަކީ ގޭގައި ތިބެން ޖެހޭ ބައެއް ކަމަށް. ވަޒީފާ އަށް ދާ އަންހެނަކު ނަމަވެސް ކުރަން ޖެހޭ ކަމަކީ ސައި ތައްޔާރު ކުރުން ކަހަލަ ކަންތައް،" ޖަޕާން ޓައިމްސް އަށް 2012 ގައި ދިން އިންޓަވިއުއެއްގައި ޓަބެއި ބުންޏެވެ.

އޭއެފްޕީ އަށް 2003 ވަނަ އަހަރު ދިން އިންޓަވިއުއެއްގައި ޓަބެއި ބުނީ އެވަރެސްޓަށް އަރަން އިތުރަށް ޝައުގުވެރި ނުވާ ކަމަށާއި އޭނާ އަރަން ބޭނުން ވަނީ އާ ފަރުބަދަތަކަށް ކަމަށެވެ.