އެވަރެސްޓް ފަރުބަދައިގެ ކުނިން އާޓް ގެލެރީއެއް ހުޅުވަނީ

ދުނިޔޭގެ އެންމެ އުސް ފަރުބަދަ ކަމަށްވާ ނޭޕާލްގެ އެވަރެސްޓަށް އަރަން މަސައްކަތްކުރާ މީހުން އެ ފަރުބަދަމައްޗާއި އޭގެ ވަށައިގެންވާ ސަރަހައްދުތަކަށް އުކައިލާ ކުނި ބޭނުންކޮށްގެން އާޓް ގެލެރީއެއް ހުޅުވަން ނިންމައިފި އެވެ.

އެ ގެލެރީ ހުޅުވަން ނިންމާފައި ވަނީ ސާގަރްމަތާ ނެކްސްޓާ ސެންޓަރުގަ އެވެ. ނަމަވެސް ހުޅުވާނެ ރަސްމީ ތާރީހެއް އަދި އިއުލާނެއްނުކުރެ އެވެ. އެކަމަކު ކުރިއަށް އޮތް ބަހާރު މޫސުމުގައި ސޮފްޓް އޯޕެނިންއަކަށް އަންނަނީ ތައްޔާރުވަމުންނެވެ.

ނޭޕާލްގެ ކަމާބެހޭ ފަރާތްތަކުން ބުނީ އާޓް ގެލެރީގައި، އެވަރެސްޓް އުކާލާފައި ހުއްޓާ ނަގާފައިވާ އެތައް ބާވަތެއްގެ ކުނިބުނި ބޭނުންކޮށްގެން ތައްޔާރުކޮށްފައިވާ އާޓްޕީސްތައް ދައްކައިލަން ބަހައްޓާނެ ކަމަށެވެ. މިފަދަ ގެލެރީއެއް ހުޅުވުމުގެ މައިގަނޑު ބޭނުމަކީ އެވަރެސްޓް ފަރުބަދަ އަށް ކުނި ނޭޅުމަށް ހިތްވަރު ދިނުމާއި ކުންޏާ މެދު ހޭލުންތެރިކަން އުފެއްދުމެވެ.

އެވަރެސްޓް ފަރުބަދައާ އަރާ މީހުންގެ ތަފާސްހިސާބުތައް ދައްކާ ގޮތުން އެ ފަރުބަދަ އަށް އަރަން އަހަރެއްގެ ތެރޭގައި މަދުވެގެން 600 މީހުން މަސައްކަތްކުރެ އެވެ. އަދި ފަރުދަބަ އަށް އަރާ ކޮންމެ މީހަކު މަދުވެގެން 8 ކިލޯގެ ކުނި އެތަނަށް ދޫކޮށްލަ އެވެ. އޭގެ ތެރޭގައި އޮކްސިޖަން ކެނިސްޓާތަކާއި ޓެންޓްތަކާއި ކާ އެއްޗެހި އަޅާ ތަކެއްޗާއި އިންސާނުންގެ ނަޖިސް ވެސް ހިމެނެ އެވެ.

ނޭޕާލްގެ ސަރުކާރުން 2019 ގައި އެވަރެސްޓް ފަރުބަދަ ސާފުކުރަން ބޮޑު ކެމްޕޭނެއް ވެސް ހިންގައި އެ އަހަރު ފަރުބަދައިން 10 ޓަނުގެ ކުނި ނަގާފައިވެ އެވެ. އެ ކެމްޕޭނަކީ ސިލްސިލާކޮށް ކުރިއަށް ގެންދަން ނިންމާފައިވާ ކެމްޕޭނެއް ކަމަށް ނޭޕާލްގެ ޓޫރިޒަމް ޑިޕާޓްމަންޓްގެ ޑިރެކްޓަރު ޖެނެރަލް ޑަންޑޫ ރާޖް ގިމީރީ ވިދާޅުވި އެވެ.

ރެކޯޑްތަކުން ދައްކާ ގޮތުގައި ޕީކް ސީޒަންގެ ގޮތުގައި ފާހަގަކުރެވޭ މެއި މަހާއި މާޗް މަހާ ދޭތެރޭ އެވަރެސްޓް ފަރުބަދަ އަށް ފަސް ޓަނުގެ ކުނި އަޅަ އެވެ.

ސާގަރުމަތާ ނެކްސްޓް ސެންޓަރުގެ އެއް ބާނީ އަދި އާޓް ގެލެރީ ޕްރޮޖެކްޓްގެ ޑިރެކްޓަރު ޓޮމީ ގަޒްޓަފްސަން ވިދާޅުވީ ގެލެރީގައި ބަހައްޓާ ކޮންމެ އާޓްޕީސް އަކީ އާޓިސްޓުންގެ ހުނަރު ވަރަށް ބޮޑަށް ފެނިގެންދާނެ އެއްޗެހި ކަމަށެވެ.

"ކުންޏަކީ ރީތި އަދި ބޭނުންކުރެވޭ އަގުހުރި ސާމާނަކަށް ވެސް ބަދަލުކުރެވިދާނެކަން އަހަރެމެން ގެލެރީގެ ތެރެއިން ފެނިގެން ދާނެ،" އޭނާ ވިދާޅުވި އެވެ. "އަހަރެމެން އުންމީދު ވެސް ކުރަން ޕްރޮޖެކްޓްގެ ތެރެއިން ކުންފުންޏާ ދޭތެރޭ މީހުން ދެކޭ ވިސްނުމަށް ވެސް ހެޔޮ ބަދަލުތަކެއް އަންނާނެ ކަމަށް."

ޓޮމީ ވިދާޅުވީ ގޮތުގައި އާޓް ގެލެރީގައި އާންމުންނަށް އާޓްގެ ހުނަރުތައް ދަސްކޮށްދީ، ކުނިން އެއްޗެހި އުފައްދާނެ ގޮތް ވެސް ދަސްކޮށްދެވޭނެ އެވެ.

"އޭރުން ކުނިބުނިން ރީތި ސްވެނިއާ އުފައްދައިގެން އާމްދަނީ ވެސް ހޯދޭނެ." އޭނާ ވިދާޅުވި އެވެ.