ރަށްރަށުގެ ކުނި މެނޭޖުކުރާ ސެންޓަރުތަކުގެ ފެންވަރު ރަނގަޅު ކުރަނީ

ރަށްރަށުގެ އާބާދީއާ ބަލައި، ކުނި މެނޭޖުކުރާ ސެންޓަރުތަކުގެ ފެންވަރު ރަނގަޅު ކުރުމުގެ މަސައްކަތް މި އަހަރު ފަށާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ގއ. އަދި ގދ. އަތޮޅަށް އިއްޔެ ފެއްޓެވި ދަތުރުފުޅުގައި، ގދ. އަތޮޅުގެ އެންމެ ފަހު ރަށް، ރަތަފަންދޫގައި ބޭއްވި ޖަލްސާގައި އެ މަނިކުފާނު ވިދާޅުވީ، ރަށްރަށުގައި ކުނީގެ މައްސަލަ ވަރަށް ބޮޑު ކަމަށެވެ. އެކަން ހައްލު ކުރަން މި އަހަރުގެ މަސައްކަތް ކުރައްވާނެ ކަމަށް ރައީސް ވިދާޅުވި އެވެ.

ރައީސް ވިދާޅުވީ ކުނީގެ މައްސަލަ ހައްލުކުރާނީ އެ ރަށެއްގެ އާބާދީ އާއި އެކަން ބޭނުންވެފައިވާ މިންވަރަށް ބަލައި، އެކަން ކުރަން ބޭނުންވާ ކެޕޭސިޓީގައި ކަމަށެވެ.

"އެ ރަށަށް ބޭނުންވާ ފެންވަރުގައި ހުރިހާ ކަމެއް ހަމަކުރެވިފައިވާ، ތަކެތީގެ ގޮތުންނާއި ވަސީލަތްތަކުގެ ގޮތުން ކަންތައް ފުރިހަމަ ކުރެވިފައިވާ ކުނި މެނޭޖުކުރުމުގެ މަރުކަޒެއް، ވޭސްޓް މެނޭޖްމަންޓު ސެންޓަރެއް އަޅުގަނޑުމެން މި ރަށުގައި ގާއިމް ކޮށްދޭނަން،" ރައީސް މުއިއްޒު ވިދާޅުވި އެވެ.

ސައުދީ ފަންޑުގެ އެހީގައި އައިސްޕްލާންޓުތައް ހަދާނެ ކަމަށާއި އެކަމާ ގުޅޭ މަޝްވަރާ ކުރަން އަންނަ ހަފުތާގައި ފިނޭންސް މިނިސްޓްރީން އެ ފަންޑާ ބައްދަލުކުރާނެ ކަމަށް ވެސް ވިދާޅުވި އެވެ.

ރައީސް ވިދާޅުވިގޮތުގައި، އެ ކަމަށް ބޭނުންވާ ފަންޑު ވެސް ވަނީ ހަމަޖެހިފަ އެވެ. ހަމައެކަނި ލަސްތަކެއް އުޅެނީ އިދާރީ މަސައްކަތްތަކުގެ ސަބަބުން ކަމަށް ވިދާޅުވި އެވެ.

"ކަންބޮޑުވުން އޮތް ކަމެއް ނޫން އެއީ،" ރައީސް މުއިއްޒު ވިދާޅުވި އެވެ.

ރަށުގެ ފެނާއި ނަރުދަމާގެ އިތުރުން ރައީސް ވަނީ މި ރަށަށް ކޮށްދެއްވާނެ އިތުރު ކަންކަން އިއުލާންކުރައްވައިފަ އެވެ. އޭގެ ތެރޭގައި، ސްކޫލުގެ ޖާގައިގެ ދަތިކަން ހައްލުކުރުމާއި ސިއްހީ މަރުކަޒުގެ ހާލަތު ރަނގަޅުކުރުމާއި އިންޑޯ ޖިމަކާއި ޔޫތު ސެންޓަރެއް އަޅައިދޭނެ ކަމަށް އިއުލާންކުރެއްވި އެވެ.