މަޝްރޫއުތައް އަވަސްކުރަން ބަލްކުކޮށް ބޮޑުހިލަ ގެންނަނީ

ބަނދަރާއި ބިން ހިއްކުން ފަދަ މަޝްރޫއުތައް އަވަސްކުރަން ބަލްކުކޮށް ބޮޑުހިލަ ގެންނަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ގއ. އަދި ގދ. އަތޮޅަށް ފައްޓަވާފައިވާ ދަތުރުފުޅުގައި، ގދ. އަތޮޅުގެ އެންމެ ފަހު ރަށް، ރަތަފަންދޫގައި ބޭއްވި ޖަލްސާގައި ރައީސް ވިދާޅުވީ ރަށްރަށުގެ ތަރައްގީއަށް އެމްޓީސީސީއާ ހަވާލުކޮށްފައި ހުރި ބައެއް މަޝްރޫއުތައް ތަކެތި ލިބުމާއި ފައިސާގެ ތާށިކަމާ ހެދި މަޑުޖެހިފައިވާ ކަމަށެވެ.

އެހެންވެ، އެ މަޝްރޫއުތައް އަވަސްކުރަން ފިނޭންސް މިނިސްޓަރު މޫސާ ޒަމީރު އާއި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު އަދި ކުންފުނިތަކުގެ ވެރިންނާ އެކު މިދިޔަ ހަފުތާގައި މަޝްވަރާކޮށް ގޮތްތަކެއް ރާވާފައިވާ ކަމަށް ވިދާޅުވި އެވެ.

"އެމްޓީސީސީއާ ހަވާލުކޮށް ފެށިފައި އޮތް ގިރާ ސަރަހައްދު ހިމާޔަތްކުރުމުގެ މަޝްރޫއު، ތަކެތި ލިބުމުގައި ހުރި ދަތިކަމާ ހެދި، ފައިސާގެ ތާށިކަމާ ހެދި މަޑުޖެހިފައި އެ ހުރީ. އެ ގޮތަށް އެބަހުރި އެހެން ރަށްތަކުގައި ވެސް މަސައްކަތްތައް ނުނިމި. އަޅުގަނޑުމެން ބަލަނީ މި ގޮތަށް ހުއްޓިފައި ހުރި ހުރިހާ ރަށަކަށް ބޭނުންވާ ތަކެތި ހަމަކުރަން، ބޮޑުހިލަ އެންމެ ބޮޑަށް. އެންމެ ގިނަ ރަށްތަކުގައި ހުއްޓިފައި އޮތް ސަބަބަކީ ބޮޑު ހިލަ ނުލިބުން،" ރައީސް ވިދާޅުވި އެވެ.

"ހުރިހާ ރަށަކަށް ބޭނުންވާ ބޮޑު ހިލަ ބަލްކުކޮށް ރާއްޖެ ގެންނަން [ނިންމީ]. އެކި ރަށްރަށުގައި މި ހުރީ މަސައްކަތްތައް ހުއްޓިފައި ބޮޑު ހިލަ ނެތިގެން ނޫނީ އެ ބޭނުންވާ ޝޯ ޕްރޮޓެކްޝަނަށް ބޭނުންވާ މެޓީރިއަލް ނެތިގެން ބަނދަރުތަކާއި ރަށްގިރުމުގެ މައްސަލައާ ބިން ހިއްކުމުގައި ބޭނުންވާ ތޮށިލުމާ. މިހެން ހުރި ކަންކަމަށް ބޭނުންވާ ބޮޑު ހިލަ."

އެ މަނިކުފާނު ވިދާޅުވީ އެކަން ކުރަން ބޭނުންވާ ފައިސާ ހަމަޖައްސާފައިވާ ކަމަށެވެ. އެއާއެކު، މި ރަށުގެ މަސައްކަތް ވެސް ފަށައި، މޫދަށް އެރޭ ސަރަަހައްދަކާ އެކު ބަނދަރު ހަދައިދޭނެ ކަމަށް ވިދާޅުވި އެވެ.

ރަށްރަށުގައި ފެނާއި ނަރުދަމާ ނިޒާމު ގާއިމްކުރަން މީގެ ކުރިން ހަވާލުކުރިއަސް ގިނަ މަޝްރޫއުތައް މަޑުޖެހިފައިވާ ކަމަށް ވެސް ރައީސް ވިދާޅުވި އެވެ. އޭގެ ތެރޭގައި ރަތަފަންދޫގައި ފެނާއި ނަރުދަމާ އެޅުން ހިމެނެ އެވެ. އެ ކުންފުންޏާ ހަވާލުކުރި އިތުރު ރަށްރަށުގައި ވެސް މަސައްކަތް ކުރިއަށްނުދާކަން ފާހަގަކުރެއްވި އެވެ.

ރައީސް ވިދާޅުވީ މަސައްކަތް އަވަސްކުރަން ފައިސާ ހަމަޖެއްސުމުގެ މަސައްކަތް ކުރަމުން އަންނަ ކަމަށާއި އޭގައި ކުރިއެރުންތައް ލިބިފައިވާ ކަމަށެވެ.

ރަތަފަންދޫގައި ފެނާއި ނަރުދަމާގެ މަސައްކަތް ވެސް އަލުން ވަރަށް އަވަހަށް ފަށާނެ ކަމަށް ރައީސް މިއަދު ވިދާޅުވި އެވެ.