"ކެމްޕެއިނެއްގެ ބޭރުން ފުލިދު އަށް ވަޑައިގެންނެވި ފުރަތަމަ ރައީސަކީ ރައީސް މުއިއްޒު"

ވ. ފުލިދޫ ކައުންސިލްގެ ރައީސް މުހައްމަދު އިމްތިޔާޒުގެ ވާހަކަ ކުރިއަށް ގެންދެވުމުގެ ކުރިން އެންމެ ފުރަތަމަ އެ ނުކުތާ ފާހަގަ ކުރެއްވުމަށް ފަހު، ކުރިއަށް ވަޑައިގަތް މައިގަނޑު ސަބަބަކީ އެއީ ތާރީހީ ކަމަކަށް ވާތީ އެވެ.

ޕްރޮޖެކްޓުތަކުގެ ވާހަކަތަކަށް ވުރެ ކުރިން އޭނާ ފާހަގަކުރެއްވި ކަމަކީ ރާއްޖެ އަށް 2008 ގައި ޑިމޮކްރެސީ ތައާރަފުވި ފަހުން، އިންތިހާބެއްގެ ކެމްޕެއިނެއްގެ ބޭރުން ފުލިދު އަށް ވަޑައިގެންނެވި ފުރަތަމަ ރައީސަކީ ރައީސް ޑރ. މުހައްމަދު މުއިއްޒު ކަމެވެ.

"ދިވެހިރާއްޖޭގައި މިނިވަން، ދެފުށް ފެންނަ އިންތިހާބުތަކަށް ހުޅުވިގެން ދިޔަ ފަހުން ރިޔާސީ އަދި ރައްޔިތުންގެ މަޖިލިސް އިންތިހާބެއްގެ ކެމްޕެއިނަށް ނޫން ގޮތަކަށް ރައްޔިތުން އިންތިހާބު ކުރައްވާފައިވާ ރައީސަކު ވ. ފުލިދު އަށް ވަޑައިގެންނެވި މިއީ ފުރަތަމަ ފަހަރު،" އާބާދީގައި 500 އެއްހާ މީހުން ދިރިއުޅޭ ރަށުގެ ކައުންސިލްގެ ރައީސް ވިދާޅުވި އެވެ.

ހަތަރު އަތޮޅެއްގެ 31 ރަށަކަށް ރައީސް މުއިއްޒު މިއަދު މެންދުރު ފެއްޓެވި ދަތުރުފުޅުގައި ހަވީރު ފުލިދު އަށް ވަޑައިގަތުން ހާއްސަވި ސަބަބަކީ އެއީ ކަމަށް ކައުންސިލްގެ ރައީސް ވިދާޅުވިއިރު އެ ރަށަށް ފުރަތަމަ ފަހަރަށް ވަރަށް ގިނަ ކަންކަން ކޮށްދެއްވަން ނިންމެވި އެވެ.

އޭގެ ތެރޭގައި ހުރިހާ ސަރުކާރެއްގައި އެދެމުން އައި ބަނދަރު ހެދުމުގެ އަމަލީ މަސައްކަތް ފެށުމާއި އޭޓީއެމްގެ ހިދުމަތް ފެށުމާއި ޑޮލަރު އޭޓީއެމްއެއް އަންނަ އަހަރުގެ މާޗު މަހުގެ ކުރިން ބަހައްޓަން ނިންމިކަން ކައުންސިލްގެ ރައީސްގެ ވާހަކައިގައި ފާހަގަކުރެއްވި އެވެ.

މުޅިން ކަހަލަ ގޮތަކަށް ޓޫރިޒަމަށް ބަރޯސާވެފައިވާ ފުލިދޫގައި ޑޮލަރު އޭޓީއެމްއެއް ބަހައްޓާނެ ކަމަށް ރައީސް މުއިއްޒު ވިދާޅުވުމަކީ ކައުންސިލްގެ ރައީސް ވިދާޅުވިގޮތުގައި ވަރަށް އުފާވެރި ޚަބަރެކެވެ.

އާބާދީ މަދު ފުލިދޫގައި މިއަދު ވަނީ އާ ސިއްހީ މަރުކަޒެއްގެ ބިންގާ ވެސް އަޅައިފަ އެވެ. އަދި އެ ރަށުގައި އައުޓްޑޯ ވޮލީ ކޯޓެއް އެޅުމުގެ އެއްބަސްވުމުގައި ވެސް މިއަދު ސޮއިކުރި އެވެ.

"އަދި ރައީސްގެ ވާހަކަފުޅުގައި އަޅުގަނޑުމެންގެ ބަހެއް، ރައްޔިތުންގެ ބަހެއް ލިބުނުހާ އަވަހަކަށަް ބިން ހިއްކުމުގެ މަޝްރޫއު ވެސް ކުރިއަށް ގެންދަވާނެކަން ދަންނަވާފައިވޭ،" އިމްތިޔާޒު ވިދާޅުވި އެވެ.

"އެހެންވީމާ މި ދެންނެވި ހުރިހާ ސަބަބުތަކަށްޓަކައި މިއަދަކީ ވ. ފުލިދު އަށް ވަރަށް އުފާވެރި ދުވަހެއްގެ ގޮތުގައި އަޅުގަނޑު ފާހަގަކޮށްލަން."

ފުލިދޫގެ ރައްޔިތުންނާ ވާހަކަފުޅު ދައްކަވަމުން ރައީސް މުއިއްޒު ވިދާޅުވީ އެ ރަށުގައި ބޯހިޔާވަހިކަމުގެ ދަތިކަމަށް ހައްލު ހޯދައިދޭން ރައްޔިތުން އެދިފައިވާ ކަމަށެވެ.

ފުލިދޫން ގޯތި ދޫނުކުރާތާ މިހާރު 15 އަހަރު ވެފައިވާ ކަމަށާއި ރައްޔިތުން ބޭނުންވާ ނަމަ ބަނދަރުގެ މަސައްކަތް ކުރާއިރު އެ ރަށު ބިން ހިއްކުމުގެ މަސައްކަތް ވެސް ކޮށްދެއްވާނެ ކަމަށް ރައީސް މުއިއްޒު މިއަދު ވިދާޅުވި އެވެ.

ރައީސް އޮފީހުން ބުނިގޮތުގައި، މިއީ ރައީސް މުއިއްޒުގެ ވައުދާ އެއްގޮތަށް ރައްޔިތުންގެ ގާތަށް ވަޑައިގެން ރައްޔިތުންގެ ހާލަތު ބެއްލެވުމަށާއި މި ރިޔާސީ ދައުރުގެ ތެރޭގައި ދެ ފަހަރު މީހުން ދިރިއުޅޭ ކޮންމެ ރަށަކަށް ޒިޔާރަތް ކުރެއްވުމަށް ވެވަޑައިގެންފައިވާ ވައުދާ އެއްގޮތަށް ސިލްސިލާކޮށް ކުރިއަށް ގެންދަވާ ދަތުރުފުޅެއް ކަމަށެވެ.