ޖެފް ބެޒޯސްގެ ބްލޫ އޮރިޖިންގެ ފުރަތަމަ ޖައްވީ ދަތުރު ޖުލައިގައި

ޖައްވީ ޓޫރިމަށް ކުރަމުން އަންނަ މަސައްކަތުގެ ތެރެއިން ދުނިޔޭގެ އެންމެ ބޮޑު މަހުޖަނު ޖެފް ބެޒޯސްގެ ކުންފުނި ބްލޫ އޮރިޖިން އިން ބާއްވާ ފުރަތަމަ ދަތުރު އަންނަ ޖުލައި މަހު ބާއްވަން ނިންމައިފި އެވެ.

މިކަން އިއުލާންކޮށް އެ ކުންފުނިން ބުނީ ނިއު ޝެފަޑް ކިޔާ އުޅަނދުގައި ބާއްވާ ދަތުރު އޮންނާނީ ޖުލައި މަހުގެ 20 ގައި ކަމަށެވެ. މި ދަތުރުގެ އެއް ސީޓް ނީލަން އުސޫލުން ވިއްކައިލަން ވެސް ވަނީ ނިންމައިފަ އެވެ. އެ ސީޓުން ލިބޭ ފައިސާ ބޭނުން ކުރާނީ "ކުލަބް ފޯ ދަ ފިއުޗާ" ފައުންޑޭޝަނަށެވެ.

ނީލަމުގައި ވިއްކާ ސީޓާ ބެހޭ ގޮތުން ބްލޫ އޮރިޖިންގެ އެއޮރޮނޯޓް ސޭލްސްގެ ޑިރެކްޓަރު އަރިއާން ކޯނެލް ވިދާޅުވީ ނީލަމުގައި ސީޓް އޮންނާނީ ކުރިއަށް އޮތް ފަސް ހަފުތާގެ މުއްދަތަށް ތިން ފޭހުގެ ޕްރޮސެސްއަކަށް ކަމަށެވެ.

ސީޓަށް ބިޑްކުރަން ޝައުގުވެރިވާ ފަރާތްތަކަށް Blue Origin.com އިން ރަޖިސްޓްރީކުރެވޭނެ އެވެ. މިކަމާ ބެހޭ އިތުރު މައުލޫމާތު ވެސް ސައިޓުން ލިބޭނެ އެވެ. ނީލަން މެނޭޖްކުރަނީ މެސެޗޫޒެސްގެ އާރްއާރް އޮކްޝަންސްއިންނެވެ.

ޖައްވަށް ކުރާ ދަތުރުތަކުގައި ބްލޫ އޮރިޖިން އިން ބޭނުން ކުރަން ހަމަޖެހިފައިވާ ނިއު ޝެފަޑަކީ ރޮކެޓް ފަރުމާ އަށް ހަދާފައިވާ 60 ފޫޓް ދިގު އެއްޗެކެވެ. މީގައި ހިމެނެނީ ހަ ސީޓެވެ. މި އުޅަނދުގައި ޖައްވުގެ ތެރޭގައި 10 މިނިޓްގެ މައިކްރޮގްރެވިޓީ ތަޖުރިބާކޮށްލެވޭނެ އެވެ.

ބްލޫ އޮރިޖިންގެ ދަތުރުތަކަށް ނަގާނެ އަގުތަކެއް އަދި ހާމައެއްނުކުރެ އެވެ.

"އަގުތަކާ މެދު ގޮތެއް ނިންމާނީ ނީލަމުގައި ވިއްކާ ސީޓަށް ލިބޭ އަގަށް ބަލާފައި،" ކޯނެލް ވިދާޅުވި އެވެ. "އެއަށް ފަހު އަހަރެމެން ރަސްމީކޮށް އަގުތައް އިއުލާންކުރާނަން."

ބްލޫ އޮރިޖިންގެ ފުރަތަމަ ދަތުރު ޖުލައި 20 ގައި ބޭއްވުމަށް ފަހު، އަހަރުގެ ފަހުކޮޅު އިތުރު ދަތުރުތަކެއް ބާއްވަން ވެސް ވަނީ ނިންމައިފަ އެވެ.

އެމެޒޯން ކުންފުނީގެ ވެރިޔާ ބެޒޯސްގެ ބްލޫ އޮރިޖިން އަކީ 2000 ވަނަ އަހަރު ވުޖޫދަށް އައި ކުންފުންޏެކެވެ.